gaurī daśakaṃ
līlālabdhasthāpitaluptākhilalokāṃ
lokātītairyogibhiraṃtaściramṛgyām |
bālādityaśreṇisamānadyutipuṃjāṃ
gaurīmaṃbāmaṃburuhākṣīmahamīḍe || 1 ||
pratyāhāradhyānasamādhisthitibhājāṃ
nityaṃ citte nirvṛtikāṣṭhāṃ kalayaṃtīm |
satyajñānānaṃdamayīṃ tāṃ tanurūpāṃ
gaurīmaṃbāmaṃburuhākṣīmahamīḍe || 2 ||
caṃdrāpīḍānaṃditamaṃdasmitavaktrāṃ
caṃdrāpīḍālaṃkṛtanīlālakabhārām |
iṃdropeṃdrādyarcitapādāṃbujayugmāṃ
gaurīmaṃbāmaṃburuhākṣīmahamīḍe || 3 ||
ādikṣāṃtāmakṣaramūrtyā vilasaṃtīṃ
bhūte bhūte bhūtakadaṃbaprasavitrīm |
śabdabrahmānaṃdamayīṃ tāṃ taṭidābhāṃ
gaurīmaṃbāmaṃburuhākṣīmahamīḍe || 4 ||
mūlādhārādutthitavīthyā vidhiraṃdhraṃ
sauraṃ cāṃdraṃ vyāpya vihārajvalitāṃgīm |
yeyaṃ sūkṣmātsūkṣmatanustāṃ sukharūpāṃ
gaurīmaṃbāmaṃburuhākṣīmahamīḍe || 5 ||
nityaḥ śuddho niṣkala eko jagadīśaḥ
sākṣī yasyāḥ sargavidhau saṃharaṇe ca |
viśvatrāṇakrīḍanalolāṃ śivapatnīṃ
gaurīmaṃbāmaṃburuhākṣīmahamīḍe || 6 ||
yasyāḥ kukṣau līnamakhaṃḍaṃ jagadaṃḍaṃ
bhūyo bhūyaḥ prādurabhūdutthitameva |
patyā sārdhaṃ tāṃ rajatādrau viharaṃtīṃ
gaurīmaṃbāmaṃburuhākṣīmahamīḍe || 7 ||
yasyāmotaṃ protamaśeṣaṃ maṇimālā-
-sūtre yadvatkāpi caraṃ cāpyacaraṃ ca |
tāmadhyātmajñānapadavyā gamanīyāṃ
gaurīmaṃbāmaṃburuhākṣīmahamīḍe || 8 ||
nānākāraiḥ śaktikadaṃbairbhuvanāni
vyāpya svairaṃ krīḍati yeyaṃ svayamekā |
kalyāṇīṃ tāṃ kalpalatāmānatibhājāṃ
gaurīmaṃbāmaṃburuhākṣīmahamīḍe || 9 ||
āśāpāśakleśavināśaṃ vidadhānāṃ
pādāṃbhojadhyānaparāṇāṃ puruṣāṇām |
īśāmīśārdhāṃgaharāṃ tāmabhirāmāṃ
gaurīmaṃbāmaṃburuhākṣīmahamīḍe || 10 ||
prātaḥkāle bhāvaviśuddhaḥ praṇidhānā-
-dbhaktyā nityaṃ jalpati gaurīdaśakaṃ yaḥ |
vācāṃ siddhiṃ saṃpadamagryāṃ śivabhaktiṃ
tasyāvaśyaṃ parvataputrī vidadhāti || 11 ||
iti śrīmatparamahaṃsaparivrājakācāryasya śrīgoviṃdabhagavatpūjyapādaśiṣyasya śrīmacchaṃkarabhagavataḥ kṛtau gaurī daśakam |
