ಸ್ವಾಮಿ ದೇವನೇ ಲೋಕಪಾಲನೆ

ಹರಿ-ಹರ ಸ್ತುತಿ ಸ್ವಾಮಿದೇವನೆ ಲೋಕಪಾಲನೆ ತೇನಮೋಸು ನಮೋಸುತೇ | ಪ್ರೇಮದಿಂದಲಿ ನೋಡು ನಮ್ಮನು ತೇನಮೋಸ್ತು ನಮೋಸ್ತುತೇ ||ಪ|| ನೇಮಿಸೆಮ್ಮೊಳು ಧರ್ಮಮಾರ್ಗವ ತೇನಮೋಸು ನಮೋಸುತೇ | ಕ್ಷೇಮದಿಂದಲಿ ಪಾಲಿಸೆಮ್ಮನು ತೇನಮೋಸ್ತು ನಮೋಸುತೇ || ದೇವದೇವನೆ ಹಸ್ತಪಾದಗಳಿಂದಲೂ ಮನದಿಂದಲೂ | ನಾವು ಮಾಡಿದ ಪಾಪವಲ್ಲವ ಹೋಗಲಾಡಿಸು ಬೇಗನೆ ಕಾವರಿಲ್ಲವು ನಿನ್ನ ಬಿಟ್ಟರೆ ದೇವನೇ ಜಗದೀಶನೇ | ಜೀವಕೋಟಿಯು ನಿನ್ನಯೀ ಬೆಳಕಿಂದ ಜೀವಿಪುದಲ್ಲವೇ|| ರಾತ್ರಿ ನಿದ್ದೆಯ ಗೈವಕಾಲದಿ ನೀನೆ ನಮ್ಮನು ಕಾಯ್ದೆಯೆ ಮಿತ್ರನೆಂಬುವ ನಾಮಧೇಯವು ಸತ್ಯವಾದುದು ನಿನ್ನೊಳು| ಸ್ತೋತ್ರ ಮಾಡುವ ಹಾಗೆ ನಿನ್ನನು ಪಕ್ಷಿಗಳ್ ಧ್ವನಿಗೈವವೈ ಚಿತ್ರಭಾನವೆ ನಿನ್ನ ನೋಡಿ ಎಲ್ಲಿ ಪೋದುದು ಕತ್ತಲೆ || ಉತ್ತಮೋತ್ತಮ ನಿನ್ನ ಪಾದದ ಭಕ್ತಿಯೇ ಸ್ಥಿರವಲ್ಲವೇ| ಚಿತ್ತವೆಂಬುದು ಗಾಳಿಯಲ್ಲಿಹ ದೀಪದಂದದಿ ಚಂಚಲ | ಮತ್ತರಾಗುತ ಬಿಟ್ಟು ನಿನ್ನನು ಕೆಟ್ಟಯೋಚನೆ ಗೈಯದಾ| ಚಿತ್ತವನು ನಮಗಿತ್ತು ರಕ್ಷಿಸು ಪದ್ಮನಾಭ ಸುರೇಶನೆ || ಆಡುವಾಗಲು ನಾವು ಭೋಜನ ಮಾಡುವಾಗಲು ಸರ್ವದಾ| ನೋಡಿನೀ ದಯದಿಂದಲೆಮ್ಮನು ಪಾಲಿಸೈ ಭಗವಂತನೇ | ಬೇಡಿಕೊಂಬೆವು ನಮ್ಮ ದೇಹಕೆ ಸೌಖ್ಯವಂ ಬಲಪುಷ್ಟಿಯಂ ನೀಡು ನಿನ್ನಯ ಪಾದಭಕ್ತಿಯನೆಂದಿಗೂ ಬಿಡಲಾರೆವೈ || ನಿನ್ನ ದರ್ಶನಗೈದ ನೇತ್ರದ ಜನ್ಮ ಸಾರ್ಥಕವಲ್ಲವೇ | ನಿನ್ನ ಪೂಜಿಪ ಹಸ್ತವೇ ಬಹು ದೊಡ್ಡದಲ್ಲವೆ ಮಾಧವ | ನಿನ್ನ ನಾಮವ ಪೇಳ್ವ ನಾಲಗೆ ಧನ್ಯವಲ್ಲವೆ ಲೋಕದಿ | ನಿನ್ನ ಧ್ಯಾನಿಪ ಚಿತ್ರವೃತ್ತಿಯ ಯೋಗವಲ್ಲವೆ ಪರಶಿವ || ನೀನೆ ತಾಯಿಯು ನೀನೆ ತಂದೆಯು ನೀನೆಯೆಮ್ಮೊಡನಾಡಿಯು | ನೀನೆ ಬಂಧುವು ನೀನೆ ಭಾಗ್ಯವು ನೀನೆ ಬುದ್ಧಿಯು ಶಕ್ತಿಯು | ನೀನು ಪಾಲಿಸದಿದ್ದೊಡೆಮ್ಮನು ಬೇರೆ ಪಾಲಿಪರಿಲ್ಲವೈ | ದೀನ ಪಾಲನೆ ನಿನ್ನ ಧ್ಯಾನದೊಳಿರ್ಪ ನಮ್ಮನು ಪಾಲಿಸೈ || ಶ್ರೀ ಮುಕುಂದನೆ ಭೂಮಿಯಲ್ಲಿಯು ನೀರಿನಲ್ಲಿಯು ನೀನಿಹೆ | ವ್ಯೋಮದಲ್ಲಿಯು ಗಾಳಿಯಲ್ಲಿಯು ತೇಜದಲ್ಲಿಯು ನೀನಿಹೆ | ರಾಮನೂ ನರಸಿಂಹನ ಪರಮಾತ್ಮನೂ ಕೃಷ್ಣನೂ ನೀನಿಲೈ | ನೀ ಮಹಾತ್ಮನು ನಮ್ಮ ತಪ್ಪುಗಳೆಲ್ಲ ಮನ್ನಿಸಿ ಪಾಲಿಸೈ|| ಹರಿಯೆ ನೀನೆ ನಿನ್ನೊಳಡಗಿದೆ ಸರ್ವವು| ನೀ ರಮೇಶನ ಭೇದ ರೂಪನು ನೀನುಮೇಶನೇ ಸತ್ಯವು| ನೀರಜಾಸನ ಬ್ರಹ್ಮ ನೀನೇ ಆದಿಶಕ್ತಿ ಸ್ವರೂಪನೇ | ನರನು ನಿನ್ನಲಿ ಭೇದವೆಣಿಸಲು ಭ್ರಾಂತನಲ್ಲವೆ ಆತನೆ ||