māyā paṃcakaṃ
nirupamanityaniraṃśake’pyakhaṃḍe –
mayi citi sarvavikalpanādiśūnye |
ghaṭayati jagadīśajīvabhedaṃ –
tvaghaṭitaghaṭanāpaṭīyasī māyā || 1 ||
śrutiśatanigamāṃtaśodhakāna-
pyahaha dhanādinidarśanena sadyaḥ |
kaluṣayati catuṣpadādyabhinnā-
naghaṭitaghaṭanāpaṭīyasī māyā || 2 ||
sukhacidakhaṃḍavibodhamadvitīyaṃ –
viyadanalādivinirmite niyojya |
bhramayati bhavasāgare nitāṃtaṃ –
tvaghaṭitaghaṭanāpaṭīyasī māyā || 3 ||
apagataguṇavarṇajātibhede –
sukhaciti vipraviḍādyahaṃkṛtiṃ ca |
sphuṭayati sutadāragehamohaṃ –
tvaghaṭitaghaṭanāpaṭīyasī māyā || 4 ||
vidhihariharavibhedamapyakhaṃḍe –
bata viracayya budhānapi prakāmam |
bhramayati hariharabhedabhāvā-
naghaṭitaghaṭanāpaṭīyasī māyā || 5 ||
