toṭakāṣṭakaṃ
viditākhila śāstra sudhā jaladhe
mahitopaniṣat-kathitārtha nidhe |
hṛdaye kalaye vimalaṃ caraṇaṃ
bhava śaṃkara deśika me śaraṇam || 1 ||
karuṇā varuṇālaya pālaya māṃ
bhavasāgara duḥkha vidūna hṛdam |
racayākhila darśana tattvavidaṃ
bhava śaṃkara deśika me śaraṇam || 2 ||
bhavatā janatā suhitā bhavitā
nijabodha vicāraṇa cārumate |
kalayeśvara jīva viveka vidaṃ
bhava śaṃkara deśika me śaraṇam || 3 ||
bhava èva bhavāniti mè nitarāṃ
samajāyata cetasi kautukitā |
mama vāraya moha mahājaladhiṃ
bhava śaṃkara deśika me śaraṇam || 4 ||
sukṛte’dhikṛte bahudhā bhavato
bhavitā samadarśana lālasatā |
ati dīnamimaṃ paripālaya māṃ
bhava śaṃkara deśika me śaraṇam || 5 ||
jagatīmavituṃ kalitākṛtayo
vicaraṃti mahāmāha sacchalataḥ |
ahimāṃśurivātra vibhāsi guro
bhava śaṃkara deśika me śaraṇam || 6 ||
gurupuṃgava puṃgavaketana te
samatāmayatāṃ na hi ko’pi sudhīḥ |
śaraṇāgata vatsala tattvanidhe
bhava śaṃkara deśika me śaraṇam || 7 ||
viditā na mayā viśadaika kalā
na ca kiṃcana kāṃcanamasti guro |
dṛtameva vidhehi kṛpāṃ sahajāṃ
bhava śaṃkara deśika me śaraṇam || 8 ||
