ānaṃda lahari
bhavāni stotuṃ tvāṃ prabhavati caturbhirna vadanaiḥ
prajānāmīśānastripuramathanaḥ paṃcabhirapi |
na ṣaḍbhiḥ senānīrdaśaśatamukhairapyahipatiḥ
tadānyeṣāṃ keṣāṃ kathaya kathamasminnavasaraḥ || 1||
ghṛtakṣīradrākṣāmadhumadhurimā kairapi padaiḥ
viśiṣyānākhyeyo bhavati rasanāmātra viṣayaḥ |
tathā te sauṃdaryaṃ paramaśivadṛṅmātraviṣayaḥ
kathaṃkāraṃ brūmaḥ sakalanigamāgocaraguṇe || 2||
mukhe te tāṃbūlaṃ nayanayugaḻe kajjalakalā
lalāṭe kāśmīraṃ vilasati gaḻe mauktikalatā |
sphuratkāṃcī śāṭī pṛthukaṭitaṭe hāṭakamayī
bhajāmi tvāṃ gaurīṃ nagapatikiśorīmaviratam || 3||
virājanmaṃdāradrumakusumahārastanataṭī
nadadvīṇānādaśravaṇavilasatkuṃḍalaguṇā
natāṃgī mātaṃgī ruciragatibhaṃgī bhagavatī
satī śaṃbhoraṃbhoruhacaṭulacakṣurvijayate || 4||
navīnārkabhrājanmaṇikanakabhūṣaṇaparikaraiḥ
vṛtāṃgī sāraṃgīruciranayanāṃgīkṛtaśivā |
taḍitpītā pītāṃbaralalitamaṃjīrasubhagā
mamāparṇā pūrṇā niravadhisukhairastu sumukhī || 5||
himādreḥ saṃbhūtā sulalitakaraiḥ pallavayutā
supuṣpā muktābhirbhramarakalitā cālakabharaiḥ |
kṛtasthāṇusthānā kucaphalanatā sūktisarasā
rujāṃ haṃtrī gaṃtrī vilasati cidānaṃdalatikā || 6||
saparṇāmākīrṇāṃ katipayaguṇaiḥ sādaramiha
śrayaṃtyanye vallīṃ mama tu matirevaṃ vilasati |
aparṇaikā sevyā jagati sakalairyatparivṛtaḥ
purāṇo’pi sthāṇuḥ phalati kila kaivalyapadavīm || 7||
vidhātrī dharmāṇāṃ tvamasi sakalāmnāyajananī
tvamarthānāṃ mūlaṃ dhanadanamanīyāṃghrikamale |
tvamādiḥ kāmānāṃ janani kṛtakaṃdarpavijaye
satāṃ mukterbījaṃ tvamasi paramabrahmamahiṣī || 8||
prabhūtā bhaktiste yadapi na mamālolamanasaḥ
tvayā tu śrīmatyā sadayamavalokyo’hamadhunā |
payodaḥ pānīyaṃ diśati madhuraṃ cātakamukhe
bhṛśaṃ śaṃke kairvā vidhibhiranunītā mama matiḥ || 9||
kṛpāpāṃgālokaṃ vitara tarasā sādhucarite
na te yuktopekṣā mayi śaraṇadīkṣāmupagate |
na cediṣṭaṃ dadyādanupadamaho kalpalatikā
viśeṣaḥ sāmānyaiḥ kathamitaravallīparikaraiḥ || 10||
mahāṃtaṃ viśvāsaṃ tava caraṇapaṃkeruhayuge
nidhāyānyannaivāśritamiha mayā daivatamume |
tathāpi tvacceto yadi mayi na jāyeta sadayaṃ
nirālaṃbo laṃbodarajanani kaṃ yāmi śaraṇam || 11||
ayaḥ sparśe lagnaṃ sapadi labhate hemapadavīṃ
yathā rathyāpāthaḥ śuci bhavati gaṃgaughamilitam |
tathā tattatpāpairatimalinamaṃtarmama yadi
tvayi premṇāsaktaṃ kathamiva na jāyeta vimalam || 12||
tvadanyasmādicchāviṣayaphalalābhe na niyamaḥ
tvamarthānāmicchādhikamapi samarthā vitaraṇe |
iti prāhuḥ prāṃcaḥ kamalabhavanādyāstvayi manaḥ
tvadāsaktaṃ naktaṃ divamucitamīśāni kuru tat || 13||
sphurannānāratnasphaṭikamayabhittipratiphala
ttvadākāraṃ caṃcacchaśadharakalāsaudhaśikharam |
mukuṃdabrahmeṃdraprabhṛtiparivāraṃ vijayate
tavāgāraṃ ramyaṃ tribhuvanamahārājagṛhiṇi || 14||
nivāsaḥ kailāse vidhiśatamakhādyāḥ stutikarāḥ
kuṭuṃbaṃ trailokyaṃ kṛtakarapuṭaḥ siddhinikaraḥ |
maheśaḥ prāṇeśastadavanidharādhīśatanaye
na te saubhāgyasya kvacidapi manāgasti tulanā || 15||
vṛṣo vṛddho yānaṃ viṣamaśanamāśā nivasanaṃ
śmaśānaṃ krīḍābhūrbhujaganivaho bhūṣaṇavidhiḥ
samagrā sāmagrī jagati viditaiva smararipoḥ
yadetasyaiśvaryaṃ tava janani saubhāgyamahimā || 16||
aśeṣabrahmāṃḍapralayavidhinaisargikamatiḥ
śmaśāneṣvāsīnaḥ kṛtabhasitalepaḥ paśupatiḥ |
dadhau kaṃṭhe hālāhalamakhilabhūgolakṛpayā
bhavatyāḥ saṃgatyāḥ phalamiti ca kalyāṇi kalaye || 17||
tvadīyaṃ sauṃdaryaṃ niratiśayamālokya parayā
bhiyaivāsīdgaṃgā jalamayatanuḥ śailatanaye |
tadetasyāstasmādvadanakamalaṃ vīkṣya kṛpayā
pratiṣṭhāmātanvannijaśirasivāsena giriśaḥ || 18||
viśālaśrīkhaṃḍadravamṛgamadākīrṇaghusṛṇa
prasūnavyāmiśraṃ bhagavati tavābhyaṃgasalilam |
samādāya sraṣṭā calitapadapāṃsūnnijakaraiḥ
samādhatte sṛṣṭiṃ vibudhapurapaṃkeruhadṛśām || 19||
vasaṃte sānaṃde kusumitalatābhiḥ parivṛte
sphurannānāpadme sarasi kalahaṃsālisubhage |
sakhībhiḥ khelaṃtīṃ malayapavanāṃdolitajale
smaredyastvāṃ tasya jvarajanitapīḍāpasarati || 20||
|| iti śrīmacchaṃkarācāryaviracitā ānaṃdalaharī saṃpūrṇā ||
