manīṣā paṃcakaṃ
satyācāryasya gamane kadācinmukti dāyakam |
kāśīkśetraṃ prati saha gauryā mārge tu śaṃkaram || (anuṣṭup)
aṃtyaveṣadharaṃ dṛṣṭvā gaccha gaccheti cābravīt |
śaṃkaraḥso’pi cāṃḍalastaṃ punaḥ prāha śaṃkaram || (anuṣṭup)
annamayādannamayamathavā caitanyameva caitanyāt |
yativara dūrīkartuṃ vāṃchasi kiṃ brūhi gaccha gaccheti || (āryā vṛtta)
pratyagvastuni nistaraṃgasahajānaṃdāvabodhāṃbudhau
vipro’yaṃ śvapaco’yamityapi mahānko’yaṃ vibhedabhramaḥ |
kiṃ gaṃgāṃbuni biṃbite’ṃbaramaṇau cāṃḍālavīthīpayaḥ
pūre vā’ṃtaramasti kāṃcanaghaṭīmṛtkuṃbhayorvā’ṃbare || (śārdūla vikrīḍita)
jāgratsvapnasuṣuptiṣu sphuṭatarā yā saṃvidujjṛṃbhate
yā brahmādipipīlikāṃtatanuṣu protā jagatsākṣiṇī |
saivāhaṃ na ca dṛśyavastviti dṛḍhaprajñāpi yasyāsti ce-
ccāṃḍālo’stu sa tu dvijo’stu gururityeṣā manīṣā mama || 1||
brahmaivāhamidaṃ jagacca sakalaṃ cinmātravistāritaṃ
sarvaṃ caitadavidyayā triguṇayā’śeṣaṃ mayā kalpitam |
itthaṃ yasya dṛḍhā matiḥ sukhatare nitye pare nirmale
cāṃḍālo’stu sa tu dvijo’stu gururityeṣā manīṣā mama || 2||
śaśvannaśvarameva viśvamakhilaṃ niścitya vācā guro-
rnityaṃ brahma niraṃtaraṃ vimṛśatā nirvyājaśāṃtātmanā |
bhūtaṃ bhāvi ca duṣkṛtaṃ pradahatā saṃvinmaye pāvake
prārabdhāya samarpitaṃ svavapurityeṣā manīṣā mama || 3||
yā tiryaṅnaradevatābhirahamityaṃtaḥ sphuṭā gṛhyate
yadbhāsā hṛdayākṣadehaviṣayā bhāṃti svato’cetanāḥ |
tāṃ bhāsyaiḥ pihitārkamaṃḍalanibhāṃ sphūrtiṃ sadā bhāvaya-
nyogī nirvṛtamānaso hi gururityeṣā manīṣā mama || 4||
yatsaukhyāṃbudhileśaleśata ime śakrādayo nirvṛtā
yaccitte nitarāṃ praśāṃtakalane labdhvā munirnirvṛtaḥ |
yasminnityasukhāṃbudhau galitadhīrbrahmaiva na brahmavid
yaḥ kaścitsa sureṃdravaṃditapado nūnaṃ manīṣā mama || 5||
dāsaste’haṃ dehadṛṣṭyā’smi śaṃbho
jātasteṃ’śo jīvadṛṣṭyā tridṛṣṭe |
sarvasyā”tmannātmadṛṣṭyā tvameve-
tyevaṃ me dhīrniścitā sarvaśāstraiḥ ||
|| iti śrīmacchaṃkarabhagavataḥ kṛtau manīṣāpaṃcakaṃ saṃpūrṇam ||
