śrī rāma sahasranāma stotraṃ
asya śrīrāmasahasranāmastotra mahāmaṃtrasya, bhagavān īśvara ṛṣiḥ, anuṣṭupchaṃdaḥ, śrīrāmaḥ paramātmā devatā, śrīmānmahāviṣṇuriti bījaṃ, guṇabhṛnnirguṇo mahāniti śaktiḥ, saṃsāratārako rāma iti maṃtraḥ, saccidānaṃdavigraha iti kīlakaṃ, akṣayaḥ puruṣaḥ sākṣīti kavacaṃ, ajeyaḥ sarvabhūtānāṃ ityastraṃ, rājīvalocanaḥ śrīmāniti dhyānaṃ śrīrāmaprītyarthe divyasahasranāmajape viniyogaḥ |
dhyānaṃ
śrīrāghavaṃ daśarathātmajamaprameyaṃ
sītāpatiṃ raghukulānvayaratnadīpam |
ājānubāhumaraviṃdadalāyatākṣaṃ
rāmaṃ niśācaravināśakaraṃ namāmi ||
nīlāṃ bhujaśyāmala komalāṃgaṃ
sītā samāropita vāmabhāgam |
pāṇau mahāsāyaka cāru cāpaṃ
namāmi rāmaṃ raghuvaṃśanātham ||
lokābhirāmaṃ raṇaraṃgadhīraṃ
rājīvanetraṃ raghuvaṃśanātham |
kāruṇyarūpaṃ karuṇākaraṃ taṃ
śrī rāmacaṃdraṃ śaraṇaṃ prapadye ||
dhyāyedājānubāhuṃ dhṛtaśaradhanuṣaṃ baddhapadmāsanasthaṃ
pītaṃ vāso vasānaṃ navakaladaḻaspardhinetraṃ prasannam |
vāmāṃkārūḍhasītāmukhakamalamilalocanaṃ nīradābhaṃ
nānālaṃkāradīptaṃ dadhatamurujaṭāmaṃḍalaṃ rāmacaṃdram ||
nīlāṃbhodarakāṃti kāṃtamanuṣaṃ vīrāsanādhyāsinaṃ
mudrāṃ jñānamayīṃ dadhānamaparaṃ hastāṃbujaṃ jānuni |
sītāṃ pārśvagatāṃ saroruhakarāṃ vidyunnibhāṃ rāghavaṃ
paśyaṃtīṃ mukuṭāṃgadādi vividha kalpojjvalāṃgaṃ bhaje ||
stotraṃ
rājīvalocanaḥ śrīmān śrīrāmo raghupuṃgavaḥ |
rāmabhadraḥ sadācāro rājeṃdro jānakīpatiḥ || 1 ||
agragaṇyo vareṇyaśca varadaḥ parameśvaraḥ |
janārdano jitāmitraḥ parārthaikaprayojanaḥ || 2 ||
viśvāmitrapriyo dāṃtaḥ śatrujicchatrutāpanaḥ |
sarvajñaḥ sarvadevādiḥ śaraṇyo vālimardanaḥ || 3 ||
jñānabhāvyo’paricchedyo vāgmī satyavrataḥ śuciḥ |
jñānagamyo dṛḍhaprajñaḥ kharadhvaṃsī pratāpavān || 4 ||
dyutimānātmavānvīro jitakrodho’rimardanaḥ |
viśvarūpo viśālākṣaḥ prabhuḥ parivṛḍho dṛḍhaḥ || 5 ||
īśaḥ khaḍgadharaḥ śrīmān kausaleyo’nasūyakaḥ |
vipulāṃso mahoraskaḥ parameṣṭhī parāyaṇaḥ || 6 ||
satyavrataḥ satyasaṃdho guruḥ paramadhārmikaḥ |
lokajño lokavaṃdyaśca lokātmā lokakṛtparaḥ || 7 ||
anādirbhagavān sevyo jitamāyo raghūdvahaḥ |
rāmo dayākaro dakṣaḥ sarvajñaḥ sarvapāvanaḥ || 8 ||
brahmaṇyo nītimān goptā sarvadevamayo hariḥ |
suṃdaraḥ pītavāsāśca sūtrakāraḥ purātanaḥ || 9 ||
saumyo maharṣiḥ kodaṃḍī sarvajñaḥ sarvakovidaḥ |
kaviḥ sugrīvavaradaḥ sarvapuṇyādhikapradaḥ || 10 ||
bhavyo jitāriṣaḍvargo mahodāro’ghanāśanaḥ |
sukīrtirādipuruṣaḥ kāṃtaḥ puṇyakṛtāgamaḥ || 11 ||
akalmaṣaścaturbāhuḥ sarvāvāso durāsadaḥ |
smitabhāṣī nivṛttātmā smṛtimān vīryavān prabhuḥ || 12 ||
dhīro dāṃto ghanaśyāmaḥ sarvāyudhaviśāradaḥ |
adhyātmayoganilayaḥ sumanā lakṣmaṇāgrajaḥ || 13 ||
sarvatīrthamayaḥ śūraḥ sarvayajñaphalapradaḥ |
yajñasvarūpī yajñeśo jarāmaraṇavarjitaḥ || 14 ||
varṇāśramakaro varṇī śatrujit puruṣottamaḥ |
vibhīṣaṇapratiṣṭhātā paramātmā parātparaḥ || 15 ||
pramāṇabhūto durjñeyaḥ pūrṇaḥ parapuraṃjayaḥ |
anaṃtadṛṣṭirānaṃdo dhanurvedo dhanurdharaḥ || 16 ||
guṇākaro guṇaśreṣṭhaḥ saccidānaṃdavigrahaḥ |
abhivaṃdyo mahākāyo viśvakarmā viśāradaḥ || 17 ||
vinītātmā vītarāgaḥ tapasvīśo janeśvaraḥ |
kaḻyāṇaprakṛtiḥ kalpaḥ sarveśaḥ sarvakāmadaḥ || 18 ||
akṣayaḥ puruṣaḥ sākṣī keśavaḥ puruṣottamaḥ |
lokādhyakṣo mahāmāyo vibhīṣaṇavarapradaḥ || 19 ||
ānaṃdavigraho jyotirhanumatprabhuravyayaḥ |
bhrājiṣṇuḥ sahano bhoktā satyavādī bahuśrutaḥ || 20 ||
sukhadaḥ kāraṇaṃ kartā bhavabaṃdhavimocanaḥ |
devacūḍāmaṇirnetā brahmaṇyo brahmavardhanaḥ || 21 ||
saṃsārottārako rāmaḥ sarvaduḥkhavimokṣakṛt |
vidvattamo viśvakartā viśvahartā ca viśvadhṛt || 22 ||
nityo niyatakalyāṇaḥ sītāśokavināśakṛt |
kākutsthaḥ puṃḍarīkākṣo viśvāmitrabhayāpahaḥ || 23 ||
mārīcamathano rāmo virādhavadhapaṃḍitaḥ |
dussvapnanāśano ramyaḥ kirīṭī tridaśādhipaḥ || 24 ||
mahādhanurmahākāyo bhīmo bhīmaparākramaḥ |
tattvasvarūpī tattvajñaḥ tattvavādī suvikramaḥ || 25 ||
bhūtātmā bhūtakṛtsvāmī kālajñānī mahāpaṭuḥ |
anirviṇṇo guṇagrāhī niṣkalaṃkaḥ kalaṃkahā || 26 ||
svabhāvabhadraḥ śatrughnaḥ keśavaḥ sthāṇurīśvaraḥ |
bhūtādiḥ śaṃbhurādityaḥ sthaviṣṭhaḥ śāśvato dhruvaḥ || 27 ||
kavacī kuṃḍalī cakrī khaḍgī bhaktajanapriyaḥ |
amṛtyurjanmarahitaḥ sarvajitsarvagocaraḥ || 28 ||
anuttamo’prameyātmā sarvādirguṇasāgaraḥ |
samaḥ samātmā samago jaṭāmukuṭamaṃḍitaḥ || 29 ||
ajeyaḥ sarvabhūtātmā viṣvakseno mahātapaḥ |
lokādhyakṣo mahābāhuramṛto vedavittamaḥ || 30 ||
sahiṣṇuḥ sadgatiḥ śāstā viśvayonirmahādyutiḥ |
atīṃdra ūrjitaḥ prāṃśurupeṃdro vāmano balī || 31 ||
dhanurvedo vidhātā ca brahmā viṣṇuśca śaṃkaraḥ |
haṃso marīcirgoviṃdo ratnagarbho mahāmatiḥ || 32 ||
vyāso vācaspatiḥ sarvadarpitā’suramardanaḥ |
jānakīvallabhaḥ pūjyaḥ prakaṭaḥ prītivardhanaḥ || 33 ||
saṃbhavo’tīṃdriyo vedyo’nirdeśo jāṃbavatprabhuḥ |
madano mathano vyāpī viśvarūpo niraṃjanaḥ || 34 ||
nārāyaṇo’graṇīḥ sādhurjaṭāyuprītivardhanaḥ |
naikarūpo jagannāthaḥ surakāryahitaḥ svabhūḥ || 35 ||
jitakrodho jitārātiḥ plavagādhiparājyadaḥ |
vasudaḥ subhujo naikamāyo bhavyapramodanaḥ || 36 ||
caṃḍāṃśuḥ siddhidaḥ kalpaḥ śaraṇāgatavatsalaḥ |
agado rogahartā ca maṃtrajño maṃtrabhāvanaḥ || 37 ||
saumitrivatsalo dhuryo vyaktāvyaktasvarūpadhṛk |
vasiṣṭho grāmaṇīḥ śrīmānanukūlaḥ priyaṃvadaḥ || 38 ||
atulaḥ sāttviko dhīraḥ śarāsanaviśāradaḥ |
jyeṣṭhaḥ sarvaguṇopetaḥ śaktimāṃstāṭakāṃtakaḥ || 39 ||
vaikuṃṭhaḥ prāṇināṃ prāṇaḥ kamaṭhaḥ kamalāpatiḥ |
govardhanadharo matsyarūpaḥ kāruṇyasāgaraḥ || 40 ||
kuṃbhakarṇaprabhettā ca gopīgopālasaṃvṛtaḥ |
māyāvī svāpano vyāpī raiṇukeyabalāpahaḥ || 41 ||
pinākamathano vaṃdyaḥ samartho garuḍadhvajaḥ |
lokatrayāśrayo lokabharito bharatāgrajaḥ || 42 ||
śrīdharaḥ sadgatirlokasākṣī nārāyaṇo budhaḥ |
manovegī manorūpī pūrṇaḥ puruṣapuṃgavaḥ || 43 ||
yaduśreṣṭho yadupatirbhūtāvāsaḥ suvikramaḥ |
tejodharo dharādhāraścaturmūrtirmahānidhiḥ || 44 ||
cāṇūramardano divyaḥ śāṃto bharatavaṃditaḥ |
śabdātigo gabhīrātmā komalāṃgaḥ prajāgaraḥ || 45 ||
lokagarbhaḥ śeṣaśāyī kṣīrābdhinilayo’malaḥ |
ātmayoniradīnātmā sahasrākṣaḥ sahasrapāt || 46 ||
amṛtāṃśurmahāgarbho nivṛttaviṣayaspṛhaḥ |
trikālajño muniḥ sākṣī vihāyasagatiḥ kṛtī || 47 ||
parjanyaḥ kumudo bhūtāvāsaḥ kamalalocanaḥ |
śrīvatsavakṣāḥ śrīvāso vīrahā lakṣmaṇāgrajaḥ || 48 ||
lokābhirāmo lokārimardanaḥ sevakapriyaḥ |
sanātanatamo meghaśyāmalo rākṣasāṃtakṛt || 49 ||
divyāyudhadharaḥ śrīmānaprameyo jiteṃdriyaḥ |
bhūdevavaṃdyo janakapriyakṛtprapitāmahaḥ || 50 ||
uttamaḥ sātvikaḥ satyaḥ satyasaṃdhastrivikramaḥ |
suvrataḥ sulabhaḥ sūkṣmaḥ sughoṣaḥ sukhadaḥ sudhīḥ || 51 ||
dāmodaro’cyutaḥ śāraṃgī vāmano madhurādhipaḥ |
devakīnaṃdanaḥ śauriḥ śūraḥ kaiṭabhamardanaḥ || 52 ||
saptatālaprabhettā ca mitravaṃśapravardhanaḥ |
kālasvarūpī kālātmā kālaḥ kalyāṇadaḥ kaviḥ |
saṃvatsara ṛtuḥ pakṣo hyayanaṃ divaso yugaḥ || 53 ||
stavyo vivikto nirlepaḥ sarvavyāpī nirākulaḥ |
anādinidhanaḥ sarvalokapūjyo nirāmayaḥ || 54 ||
raso rasajñaḥ sārajño lokasāro rasātmakaḥ |
sarvaduḥkhātigo vidyārāśiḥ paramagocaraḥ || 55 ||
śeṣo viśeṣo vigatakalmaṣo raghunāyakaḥ |
varṇaśreṣṭho varṇavāhyo varṇyo varṇyaguṇojjvalaḥ || 56 ||
karmasākṣyamaraśreṣṭho devadevaḥ sukhapradaḥ |
devādhidevo devarṣirdevāsuranamaskṛtaḥ || 57 ||
sarvadevamayaścakrī śārṅgapāṇiranuttamaḥ |
mano buddhirahaṃkāraḥ prakṛtiḥ puruṣo’vyayaḥ || 58 ||
ahalyāpāvanaḥ svāmī pitṛbhakto varapradaḥ |
nyāyo nyāyī nayī śrīmānnayo nagadharo dhruvaḥ || 59 ||
lakṣmīviśvaṃbharābhartā deveṃdro balimardanaḥ |
vāṇārimardano yajvānuttamo munisevitaḥ || 60 ||
devāgraṇīḥ śivadhyānatatparaḥ paramaḥ paraḥ |
sāmagānapriyo’krūraḥ puṇyakīrtiḥ sulocanaḥ || 61 ||
puṇyaḥ puṇyādhikaḥ pūrvaḥ pūrṇaḥ pūrayitā raviḥ |
jaṭilaḥ kalmaṣadhvāṃtaprabhaṃjanavibhāvasuḥ || 62 ||
avyaktalakṣaṇo’vyakto daśāsyadvīpakesarī |
kalānidhiḥ kalārūpo kamalānaṃdavardhanaḥ || 63 ||
jayo jitāriḥ sarvādiḥ śamano bhavabhaṃjanaḥ |
alaṃkariṣṇuracalo rociṣṇurvikramottamaḥ || 64 ||
aṃśuḥ śabdapatiḥ śabdagocaro raṃjano raghuḥ |
niśśabdaḥ praṇavo mālī sthūlaḥ sūkṣmo vilakṣaṇaḥ || 65 ||
ātmayonirayoniśca saptajihvaḥ sahasrapāt |
sanātanatamaḥ sragvī peśalo javināṃ varaḥ || 66 ||
śaktimān śaṃkhabhṛnnāthaḥ gadāpadmarathāṃgabhṛt |
nirīho nirvikalpaśca cidrūpo vītasādhvasaḥ || 67 ||
śatānanaḥ sahasrākṣaḥ śatamūrtirghanaprabhaḥ |
hṛtpuṃḍarīkaśayanaḥ kaṭhino drava eva ca || 68 ||
ugro grahapatiḥ kṛṣṇo samartho’narthanāśanaḥ |
adharmaśatruḥ rakṣoghnaḥ puruhūtaḥ puruṣṭutaḥ || 69 ||
brahmagarbho bṛhadgarbho dharmadhenurdhanāgamaḥ |
hiraṇyagarbho jyotiṣmān sulalāṭaḥ suvikramaḥ || 70 ||
śivapūjārataḥ śrīmān bhavānīpriyakṛdvaśī |
naro nārāyaṇaḥ śyāmaḥ kapardī nīlalohitaḥ || 71 ||
rudraḥ paśupatiḥ sthāṇurviśvāmitro dvijeśvaraḥ |
mātāmaho mātariśvā viriṃco viṣṭaraśravāḥ || 72 ||
akṣobhyaḥ sarvabhūtānāṃ caṃḍaḥ satyaparākramaḥ |
vālakhilyo mahākalpaḥ kalpavṛkṣaḥ kalādharaḥ || 73 ||
nidāghastapano’moghaḥ ślakṣṇaḥ parabalāpahṛt |
kabaṃdhamathano divyaḥ kaṃbugrīvaḥ śivapriyaḥ || 74 ||
śaṃkho’nilaḥ suniṣpannaḥ sulabhaḥ śiśirātmakaḥ |
asaṃsṛṣṭo’tithiḥ śūraḥ pramāthī pāpanāśakṛt || 75 ||
vasuśravāḥ kavyavāhaḥ pratapto viśvabhojanaḥ |
rāmo nīlotpalaśyāmo jñānaskaṃdho mahādyutiḥ || 76 ||
pavitrapādaḥ pāpārirmaṇipūro nabhogatiḥ |
uttāraṇo duṣkṛtihā durdharṣo dussaho’bhayaḥ || 77 ||
amṛteśo’mṛtavapurdharmī dharmaḥ kṛpākaraḥ |
bhargo vivasvānādityo yogācāryo divaspatiḥ || 78 ||
udārakīrtirudyogī vāṅmayaḥ sadasanmayaḥ |
nakṣatramālī nākeśaḥ svādhiṣṭhānaṣaḍāśrayaḥ || 79 ||
caturvargaphalo varṇī śaktitrayaphalaṃ nidhiḥ |
nidhānagarbho nirvyājo girīśo vyālamardanaḥ || 80 ||
śrīvallabhaḥ śivāraṃbhaḥ śāṃtirbhadraḥ samaṃjasaḥ |
bhūśayo bhūtikṛdbhūtirbhūṣaṇo bhūtavāhanaḥ || 81 ||
akāyo bhaktakāyasthaḥ kālajñānī mahāvaṭuḥ |
parārthavṛttiracalo viviktaḥ śrutisāgaraḥ || 82 ||
svabhāvabhadro madhyasthaḥ saṃsārabhayanāśanaḥ |
vedyo vaidyo viyadgoptā sarvāmaramunīśvaraḥ || 83 ||
sureṃdraḥ karaṇaṃ karma karmakṛtkarmyadhokṣajaḥ |
dhyeyo dhuryo dharādhīśaḥ saṃkalpaḥ śarvarīpatiḥ || 84 ||
paramārthagururvṛddhaḥ śucirāśritavatsalaḥ |
viṣṇurjiṣṇurvibhuryajño yajñeśo yajñapālakaḥ || 85 ||
prabhaviṣṇurgrasiṣṇuśca lokātmā lokabhāvanaḥ |
keśavaḥ keśihā kāvyaḥ kaviḥ kāraṇakāraṇam || 86 ||
kālakartā kālaśeṣo vāsudevaḥ puruṣṭutaḥ |
ādikartā varāhaśca mādhavo madhusūdanaḥ || 87 ||
nārāyaṇo naro haṃso viṣvakseno janārdanaḥ |
viśvakartā mahāyajño jyotiṣmān puruṣottamaḥ || 88 ||
vaikuṃṭhaḥ puṃḍarīkākṣaḥ kṛṣṇaḥ sūryaḥ surārcitaḥ |
nārasiṃho mahābhīmo vakradaṃṣṭro nakhāyudhaḥ || 89 ||
ādidevo jagatkartā yogīśo garuḍadhvajaḥ |
goviṃdo gopatirgoptā bhūpatirbhuvaneśvaraḥ || 90 ||
padmanābho hṛṣīkeśo dhātā dāmodaraḥ prabhuḥ |
trivikramastrilokeśo brahmeśaḥ prītivardhanaḥ || 91 ||
vāmano duṣṭadamano goviṃdo gopavallabhaḥ |
bhaktapriyo’cyutaḥ satyaḥ satyakīrtirdhṛtiḥ smṛtiḥ || 92 ||
kāruṇyaṃ karuṇo vyāsaḥ pāpahā śāṃtivardhanaḥ |
saṃnyāsī śāstratattvajño maṃdarādriniketanaḥ || 93 ||
badarīnilayaḥ śāṃtastapasvī vaidyutaprabhaḥ |
bhūtāvāso guhāvāsaḥ śrīnivāsaḥ śriyaḥ patiḥ || 94 ||
tapovāso mudāvāsaḥ satyavāsaḥ sanātanaḥ |
puruṣaḥ puṣkaraḥ puṇyaḥ puṣkarākṣo maheśvaraḥ || 95 ||
pūrṇamūrtiḥ purāṇajñaḥ puṇyadaḥ puṇyavardhanaḥ |
śaṃkhī cakrī gadī śāraṃgī lāṃgalī musalī halī || 96 ||
kirīṭī kuṃḍalī hārī mekhalī kavacī dhvajī |
yoddhā jetā mahāvīryaḥ śatrujicchatrutāpanaḥ || 97 ||
śāstā śāstrakaraḥ śāstraṃ śaṃkara śaṃkarastutaḥ |
sārathiḥ sāttvikaḥ svāmī sāmavedapriyaḥ samaḥ || 98 ||
pavanaḥ sāhasaḥ śaktiḥ saṃpūrṇāṃgaḥ samṛddhimān |
svargadaḥ kāmadaḥ śrīdaḥ kīrtido’kīrtināśanaḥ || 99 ||
mokṣadaḥ puṃḍarīkākṣaḥ kṣīrābdhikṛtaketanaḥ |
sarvātmā sarvalokeśaḥ prerakaḥ pāpanāśanaḥ || 100 ||
sarvadevo jagannāthaḥ sarvalokamaheśvaraḥ |
sargasthityaṃtakṛddevaḥ sarvalokasukhāvahaḥ || 101 ||
akṣayyaḥ śāśvato’naṃtaḥ kṣayavṛddhivivarjitaḥ |
nirlepo nirguṇaḥ sūkṣmo nirvikāro niraṃjanaḥ || 102 ||
sarvopādhivinirmuktaḥ sattāmātravyavasthitaḥ |
adhikārī vibhurnityaḥ paramātmā sanātanaḥ || 103 ||
acalo nirmalo vyāpī nityatṛpto nirāśrayaḥ |
śyāmo yuvā lohitākṣo dīptāsyo mitabhāṣaṇaḥ || 104 ||
ājānubāhuḥ sumukhaḥ siṃhaskaṃdho mahābhujaḥ |
satyavān guṇasaṃpannaḥ svayaṃtejāḥ sudīptimān || 105 ||
kālātmā bhagavān kālaḥ kālacakrapravartakaḥ |
nārāyaṇaḥ paraṃjyotiḥ paramātmā sanātanaḥ || 106 ||
viśvasṛḍviśvagoptā ca viśvabhoktā ca śāśvataḥ |
viśveśvaro viśvamūrtirviśvātmā viśvabhāvanaḥ || 107 ||
sarvabhūtasuhṛcchāṃtaḥ sarvabhūtānukaṃpanaḥ |
sarveśvareśvaraḥ sarvaḥ śrīmānāśritavatsalaḥ || 108 ||
sarvagaḥ sarvabhūteśaḥ sarvabhūtāśayasthitaḥ |
abhyaṃtarasthastamasaśchettā nārāyaṇaḥ paraḥ || 109 ||
anādinidhanaḥ sraṣṭā prajāpatipatirhariḥ |
narasiṃho hṛṣīkeśaḥ sarvātmā sarvadṛgvaśī || 110 ||
jagatastasthuṣaścaiva prabhurnetā sanātanaḥ |
kartā dhātā vidhātā ca sarveṣāṃ prabhurīśvaraḥ || 111 ||
sahasramūrdhā viśvātmā viṣṇurviśvadṛgavyayaḥ |
purāṇapuruṣaḥ sraṣṭā sahasrākṣaḥ sahasrapāt || 112 ||
tattvaṃ nārāyaṇo viṣṇurvāsudevaḥ sanātanaḥ |
paramātmā paraṃ brahma saccidānaṃdavigrahaḥ || 113 ||
paraṃjyotiḥ paraṃdhāmaḥ parākāśaḥ parātparaḥ |
acyutaḥ puruṣaḥ kṛṣṇaḥ śāśvataḥ śiva īśvaraḥ || 114 ||
nityaḥ sarvagataḥ sthāṇurugraḥ sākṣī prajāpatiḥ |
hiraṇyagarbhaḥ savitā lokakṛllokabhṛdvibhuḥ || 115 ||
rāmaḥ śrīmān mahāviṣṇurjiṣṇurdevahitāvahaḥ |
tattvātmā tārakaṃ brahma śāśvataḥ sarvasiddhidaḥ || 116 ||
akāravācyo bhagavān śrīrbhūnīlāpatiḥ pumān |
sarvalokeśvaraḥ śrīmān sarvajñaḥ sarvatomukhaḥ || 117 ||
svāmī suśīlaḥ sulabhaḥ sarvajñaḥ sarvaśaktimān |
nityaḥ saṃpūrṇakāmaśca naisargikasuhṛtsukhī || 118 ||
kṛpāpīyūṣajaladhiḥ śaraṇyaḥ sarvadehinām |
śrīmānnārāyaṇaḥ svāmī jagatāṃ patirīśvaraḥ || 119 ||
śrīśaḥ śaraṇyo bhūtānāṃ saṃśritābhīṣṭadāyakaḥ |
anaṃtaḥ śrīpatī rāmo guṇabhṛnnirguṇo mahān || 120 ||
|| iti ānaṃdarāmāyaṇe vālmīkīye śrīrāmasahasranāmastotram ||
