śiva suvarṇamālā stuti
atha kathamapi madrāsanāṃ tvadguṇaleśairviśodhayāmi vibho |
sāṃba sadāśiva śaṃbho śaṃkara śaraṇaṃ me tava caraṇayugam || 1 ||
ākhaṃḍalamadakhaṃḍanapaṃḍita taṃḍupriya caṃḍīśa vibho |
sāṃba sadāśiva śaṃbho śaṃkara śaraṇaṃ me tava caraṇayugam || 2 ||
ibhacarmāṃbara śaṃbararipuvapurapaharaṇojjvalanayana vibho |
sāṃba sadāśiva śaṃbho śaṃkara śaraṇaṃ me tava caraṇayugam || 3 ||
īśa girīśa nareśa pareśa maheśa bileśayabhūṣaṇa bho |
sāṃba sadāśiva śaṃbho śaṃkara śaraṇaṃ me tava caraṇayugam || 4 ||
umayā divyasumaṃgaḻavigrahayāliṃgitavāmāṃga vibho |
sāṃba sadāśiva śaṃbho śaṃkara śaraṇaṃ me tava caraṇayugam || 5 ||
ūrīkuru māmajñamanāthaṃ dūrīkuru me duritaṃ bho |
sāṃba sadāśiva śaṃbho śaṃkara śaraṇaṃ me tava caraṇayugam || 6 ||
ṛṣivaramānasahaṃsa carācarajananasthitilayakāraṇa bho |
sāṃba sadāśiva śaṃbho śaṃkara śaraṇaṃ me tava caraṇayugam || 7 ||
ṝkṣādhīśakirīṭa mahokṣārūḍha vidhṛtarudrākṣa vibho |
sāṃba sadāśiva śaṃbho śaṃkara śaraṇaṃ me tava caraṇayugam || 8 ||
luvarṇadvaṃdvamavṛṃtasukusumamivāṃghrau tavārpayāmi vibho |
sāṃba sadāśiva śaṃbho śaṃkara śaraṇaṃ me tava caraṇayugam || 9 ||
ekaṃ saditi śrutyā tvameva sadasītyupāsmahe mṛḍa bho |
sāṃba sadāśiva śaṃbho śaṃkara śaraṇaṃ me tava caraṇayugam || 10 ||
aikyaṃ nijabhaktebhyo vitarasi viśvaṃbharo’tra sākṣī bho |
sāṃba sadāśiva śaṃbho śaṃkara śaraṇaṃ me tava caraṇayugam || 11 ||
omiti tava nirdeṣṭrī māyāsmākaṃ mṛḍopakartrī bho |
sāṃba sadāśiva śaṃbho śaṃkara śaraṇaṃ me tava caraṇayugam || 12 ||
audāsyaṃ sphuṭayati viṣayeṣu digaṃbaratā ca tavaiva vibho |
sāṃba sadāśiva śaṃbho śaṃkara śaraṇaṃ me tava caraṇayugam || 13 ||
aṃtaḥkaraṇaviśuddhiṃ bhaktiṃ ca tvayi satīṃ pradehi vibho |
sāṃba sadāśiva śaṃbho śaṃkara śaraṇaṃ me tava caraṇayugam || 14 ||
astopādhisamastavyastai rūpairjaganmayo’si vibho |
sāṃba sadāśiva śaṃbho śaṃkara śaraṇaṃ me tava caraṇayugam || 15 ||
karuṇāvaruṇālaya mayi dāsa udāsastavocito na hi bho |
sāṃba sadāśiva śaṃbho śaṃkara śaraṇaṃ me tava caraṇayugam || 16 ||
khalasahavāsaṃ vighaṭaya ghaṭaya satāmeva saṃgamaniśaṃ bho |
sāṃba sadāśiva śaṃbho śaṃkara śaraṇaṃ me tava caraṇayugam || 17 ||
garaḻaṃ jagadupakṛtaye gilitaṃ bhavatā samo’sti ko’tra vibho |
sāṃba sadāśiva śaṃbho śaṃkara śaraṇaṃ me tava caraṇayugam || 18 ||
ghanasāragauragātra pracurajaṭājūṭabaddhagaṃga vibho |
sāṃba sadāśiva śaṃbho śaṃkara śaraṇaṃ me tava caraṇayugam || 19 ||
jñaptiḥ sarvaśarīreṣvakhaṃḍitā yā vibhāti sā tvaṃ bho |
sāṃba sadāśiva śaṃbho śaṃkara śaraṇaṃ me tava caraṇayugam || 20 ||
capalaṃ mama hṛdayakapiṃ viṣayadrucaraṃ dṛḍhaṃ badhāna vibho |
sāṃba sadāśiva śaṃbho śaṃkara śaraṇaṃ me tava caraṇayugam || 21 ||
chāyā sthāṇorapi tava tāpaṃ namatāṃ haratyaho śiva bho |
sāṃba sadāśiva śaṃbho śaṃkara śaraṇaṃ me tava caraṇayugam || 22 ||
jaya kailāsanivāsa pramathagaṇādhīśa bhūsurārcita bho |
sāṃba sadāśiva śaṃbho śaṃkara śaraṇaṃ me tava caraṇayugam || 23 ||
jhaṇutakajhaṃkiṇujhaṇutatkiṭataka-śabdairnaṭasi mahānaṭa bho |
sāṃba sadāśiva śaṃbho śaṃkara śaraṇaṃ me tava caraṇayugam || 24 ||
jñānaṃ vikṣepāvṛtirahitaṃ kuru me gurustvameva vibho |
sāṃba sadāśiva śaṃbho śaṃkara śaraṇaṃ me tava caraṇayugam || 25 ||
ṭaṃkārastava dhanuṣo dalayati hṛdayaṃ dviṣāmaśaniriva bho |
sāṃba sadāśiva śaṃbho śaṃkara śaraṇaṃ me tava caraṇayugam || 26 ||
ṭhākṛtiriva tava māyā bahiraṃtaḥ śūnyarūpiṇī khalu bho |
sāṃba sadāśiva śaṃbho śaṃkara śaraṇaṃ me tava caraṇayugam || 27 ||
ḍaṃbaramaṃburuhāmapi dalayatyanaghaṃ tvadaṃghriyugaḻaṃ bho |
sāṃba sadāśiva śaṃbho śaṃkara śaraṇaṃ me tava caraṇayugam || 28 ||
ḍhakkākṣasūtraśūladruhiṇakaroṭīsamullasatkara bho |
sāṃba sadāśiva śaṃbho śaṃkara śaraṇaṃ me tava caraṇayugam || 29 ||
ṇākāragarbhiṇī cecchubhadā te śaragatirnṛṇāmiha bho |
sāṃba sadāśiva śaṃbho śaṃkara śaraṇaṃ me tava caraṇayugam || 30 ||
tava manvatisaṃjapataḥ sadyastarati naro hi bhavābdhiṃ bho |
sāṃba sadāśiva śaṃbho śaṃkara śaraṇaṃ me tava caraṇayugam || 31 ||
thūtkārastasya mukhe bhūyātte nāma nāsti yasya vibho |
sāṃba sadāśiva śaṃbho śaṃkara śaraṇaṃ me tava caraṇayugam || 32 ||
dayanīyaśca dayāḻuḥ ko’sti madanyastvadanya iha vada bho |
sāṃba sadāśiva śaṃbho śaṃkara śaraṇaṃ me tava caraṇayugam || 33 ||
dharmasthāpanadakṣa tryakṣa guro dakṣayajñaśikṣaka bho |
sāṃba sadāśiva śaṃbho śaṃkara śaraṇaṃ me tava caraṇayugam || 34 ||
nanu tāḍito’si dhanuṣā lubdhadhiyā tvaṃ purā nareṇa vibho |
sāṃba sadāśiva śaṃbho śaṃkara śaraṇaṃ me tava caraṇayugam || 35 ||
parimātuṃ tava mūrtiṃ nālamajastatparātparo’si vibho |
sāṃba sadāśiva śaṃbho śaṃkara śaraṇaṃ me tava caraṇayugam || 36 ||
phalamiha nṛtayā januṣastvatpadasevā sanātaneśa vibho |
sāṃba sadāśiva śaṃbho śaṃkara śaraṇaṃ me tava caraṇayugam || 37 ||
balamārogyaṃ cāyustvadguṇarucitāṃ ciraṃ pradehi vibho |
sāṃba sadāśiva śaṃbho śaṃkara śaraṇaṃ me tava caraṇayugam || 38 ||
bhagavanbharga bhayāpaha bhūtapate bhūtibhūṣitāṃga vibho |
sāṃba sadāśiva śaṃbho śaṃkara śaraṇaṃ me tava caraṇayugam || 39 ||
mahimā tava na hi māti śrutiṣu himānīdharātmajādhava bho |
sāṃba sadāśiva śaṃbho śaṃkara śaraṇaṃ me tava caraṇayugam || 40 ||
yamaniyamādibhiraṃgairyamino hṛdaye bhajaṃti sa tvaṃ bho |
sāṃba sadāśiva śaṃbho śaṃkara śaraṇaṃ me tava caraṇayugam || 41 ||
rajjāvahiriva śuktau rajatamiva tvayi jagaṃti bhāṃti vibho |
sāṃba sadāśiva śaṃbho śaṃkara śaraṇaṃ me tava caraṇayugam || 42 ||
labdhvā bhavatprasādāccakraṃ vidhuravati lokamakhilaṃ bho |
sāṃba sadāśiva śaṃbho śaṃkara śaraṇaṃ me tava caraṇayugam || 43 ||
vasudhātaddharatacchayarathamaurvīśara parākṛtāsura bho |
sāṃba sadāśiva śaṃbho śaṃkara śaraṇaṃ me tava caraṇayugam || 44 ||
śarva deva sarvottama sarvada durvṛttagarvaharaṇa vibho |
sāṃba sadāśiva śaṃbho śaṃkara śaraṇaṃ me tava caraṇayugam || 45 ||
ṣaḍripuṣaḍūrmiṣaḍvikārahara sanmukha ṣaṇmukhajanaka vibho |
sāṃba sadāśiva śaṃbho śaṃkara śaraṇaṃ me tava caraṇayugam || 46 ||
satyaṃ jñānamanaṃtaṃ brahmetyetallakṣaṇalakṣita bho |
sāṃba sadāśiva śaṃbho śaṃkara śaraṇaṃ me tava caraṇayugam || 47 ||
hāhāhūhūmukhasuragāyakagītāpadānapadya vibho |
sāṃba sadāśiva śaṃbho śaṃkara śaraṇaṃ me tava caraṇayugam || 48 ||
ḻādirna hi prayogastadaṃtamiha maṃgaḻaṃ sadāstu vibho |
sāṃba sadāśiva śaṃbho śaṃkara śaraṇaṃ me tava caraṇayugam || 49 ||
kṣaṇamiva divasānneṣyati tvatpadasevākṣaṇotsukaḥ śiva bho |
sāṃba sadāśiva śaṃbho śaṃkara śaraṇaṃ me tava caraṇayugam || 50 ||
iti śrīmatparamahaṃsaparivrājakācāryasya śrīgoviṃdabhagavatpūjyapādaśiṣyasya śrīmacchaṃkarabhagavataḥ kṛtau suvarṇamālā stutiḥ saṃpūrṇā ||
