lalitā paṃca ratnaṃ
prātaḥ smarāmi lalitā vadanāraviṃdaṃ
biṃbādharaṃ pṛthula mauktika śobhināsam |
ākarṇadīrghanayanaṃ maṇikuṃḍalāḍhyaṃ
maṃdasmitaṃ mṛgamadojjvala phāladeśam || 1 ||
prātarbhajāmi lalitā bhujakalpavallīṃ
raktāṃguḻīya lasadaṃguḻi pallavāḍhyām |
māṇikya hemavalayāṃgada śobhamānāṃ
puṃḍrekṣucāpa kusumeṣu sṛṇīrdadhānām || 2 ||
prātarnamāmi lalitā caraṇāraviṃdaṃ
bhakteṣṭa dānanirataṃ bhavasiṃdhupotam |
padmāsanādi suranāyaka pūjanīyaṃ
padmāṃkuśadhvaja sudarśana lāṃchanāḍhyam || 3 ||
prātaḥ stuve paraśivāṃ lalitāṃ bhavānīṃ
trayyaṃtavedya vibhavāṃ karuṇānavadyām |
viśvasya sṛṣṭivilaya sthitihetubhūtāṃ
vidyeśvarīṃ nigamavāṅmanasātidūrām || 4 ||
prātarvadāmi lalite tava puṇyanāma
kāmeśvarīti kamaleti maheśvarīti |
śrīśāṃbhavīti jagatāṃ jananī pareti
vāgdevateti vacasā tripureśvarīti || 5 ||
yaḥ ślokapaṃcakamidaṃ lalitāṃbikāyāḥ
saubhāgyadaṃ sulalitaṃ paṭhati prabhāte |
tasmai dadāti lalitā jhaṭiti prasannā
vidyāṃ śriyaṃ vimalasaukhyamanaṃtakīrtim ||
