goviṃdāṣṭakaṃ
satyaṃ jñānamanaṃtaṃ nityamanākāśaṃ paramākāśam |
goṣṭhaprāṃgaṇariṃkhaṇalolamanāyāsaṃ paramāyāsam |
māyākalpitanānākāramanākāraṃ bhuvanākāram |
kṣmāmānāthamanāthaṃ praṇamata goviṃdaṃ paramānaṃdam || 1 ||
mṛtsnāmatsīheti yaśodātāḍanaśaiśava saṃtrāsam |
vyāditavaktrālokitalokālokacaturdaśalokālim |
lokatrayapuramūlastaṃbhaṃ lokālokamanālokam |
lokeśaṃ parameśaṃ praṇamata goviṃdaṃ paramānaṃdam || 2 ||
traiviṣṭaparipuvīraghnaṃ kṣitibhāraghnaṃ bhavarogaghnam |
kaivalyaṃ navanītāhāramanāhāraṃ bhuvanāhāram |
vaimalyasphuṭacetovṛttiviśeṣābhāsamanābhāsam |
śaivaṃ kevalaśāṃtaṃ praṇamata goviṃdaṃ paramānaṃdam || 3 ||
gopālaṃ prabhulīlāvigrahagopālaṃ kulagopālam |
gopīkhelanagovardhanadhṛtilīlālālitagopālam |
gobhirnigadita goviṃdasphuṭanāmānaṃ bahunāmānam |
gopīgocaradūraṃ praṇamata goviṃdaṃ paramānaṃdam || 4 ||
gopīmaṃḍalagoṣṭhībhedaṃ bhedāvasthamabhedābham |
śaśvadgokhuranirdhūtodgata dhūḻīdhūsarasaubhāgyam |
śraddhābhaktigṛhītānaṃdamaciṃtyaṃ ciṃtitasadbhāvam |
ciṃtāmaṇimahimānaṃ praṇamata goviṃdaṃ paramānaṃdam || 5 ||
snānavyākulayoṣidvastramupādāyāgamupārūḍham |
vyāditsaṃtīratha digvastrā dātumupākarṣaṃtaṃ tāḥ
nirdhūtadvayaśokavimohaṃ buddhaṃ buddheraṃtastham |
sattāmātraśarīraṃ praṇamata goviṃdaṃ paramānaṃdam || 6 ||
kāṃtaṃ kāraṇakāraṇamādimanādiṃ kāladhanābhāsam |
kāḻiṃdīgatakāliyaśirasi sunṛtyaṃtaṃ muhuratyaṃtam |
kālaṃ kālakalātītaṃ kalitāśeṣaṃ kalidoṣaghnam |
kālatrayagatihetuṃ praṇamata goviṃdaṃ paramānaṃdam || 7 ||
bṛṃdāvanabhuvi bṛṃdārakagaṇabṛṃdārādhitavaṃdeham |
kuṃdābhāmalamaṃdasmerasudhānaṃdaṃ suhṛdānaṃdam |
vaṃdyāśeṣa mahāmuni mānasa vaṃdyānaṃdapadadvaṃdvam |
vaṃdyāśeṣaguṇābdhiṃ praṇamata goviṃdaṃ paramānaṃdam || 8 ||
goviṃdāṣṭakametadadhīte goviṃdārpitacetā yaḥ |
goviṃdācyuta mādhava viṣṇo gokulanāyaka kṛṣṇeti |
goviṃdāṃghri sarojadhyānasudhājaladhautasamastāghaḥ |
goviṃdaṃ paramānaṃdāmṛtamaṃtasthaṃ sa tamabhyeti ||
iti śrī śaṃkarācārya viracita śrīgoviṃdāṣṭakaṃ samāptaṃ
