śiva bhujaṃga stotraṃ
galaddānagaṃḍaṃ miladbhṛṃgaṣaṃḍaṃ
calaccāruśuṃḍaṃ jagattrāṇaśauṃḍam |
kanaddaṃtakāṃḍaṃ vipadbhaṃgacaṃḍaṃ
śivapremapiṃḍaṃ bhaje vakratuṃḍam || 1 ||
anādyaṃtamādyaṃ paraṃ tattvamarthaṃ
cidākāramekaṃ turīyaṃ tvameyam |
haribrahmamṛgyaṃ parabrahmarūpaṃ
manovāgatītaṃ mahaḥśaivamīḍe || 2 ||
svaśaktyādi śaktyaṃta siṃhāsanasthaṃ
manohāri sarvāṃgaratnorubhūṣam |
jaṭāhīṃdugaṃgāsthiśamyākamauḻiṃ
parāśaktimitraṃ namaḥ paṃcavaktram || 3 ||
śiveśānatatpūruṣāghoravāmādibhiḥ
paṃcabhirhṛnmukhaiḥ ṣaḍbhiraṃgaiḥ |
anaupamya ṣaṭtriṃśataṃ tattvavidyāmatītaṃ
paraṃ tvāṃ kathaṃ vetti ko vā || 4 ||
pravāḻapravāhaprabhāśoṇamardhaṃ
marutvanmaṇi śrīmahaḥ śyāmamardham |
guṇasyūtametadvapuḥ śaivamaṃtaḥ
smarāmi smarāpattisaṃpattihetoḥ || 5 ||
svasevāsamāyātadevāsureṃdrā
namanmauḻimaṃdāramālābhiṣiktam |
namasyāmi śaṃbho padāṃbhoruhaṃ te
bhavāṃbhodhipotaṃ bhavānī vibhāvyam || 6 ||
jagannātha mannātha gaurīsanātha
prapannānukaṃpinvipannārtihārin |
mahaḥstomamūrte samastaikabaṃdho
namaste namaste punaste namo’stu || 7 ||
virūpākṣa viśveśa viśvādideva
trayī mūla śaṃbho śiva tryaṃbaka tvam |
prasīda smara trāhi paśyāvamuktyai
kṣamāṃ prāpnuhi tryakṣa māṃ rakṣa modāt || 8 ||
mahādeva deveśa devādideva
smarāre purāre yamāre hareti |
bruvāṇaḥ smariṣyāmi bhaktyā linè bhavaṃtaṃ tato me dayāśīla deva prasīda || 9 ||
tvadanyaḥ śaraṇyaḥ prapannasya neti
prasīda smaranneva hanyāstu dainyam |
na cette bhavedbhaktavātsalyahānistato
me dayāḻo sadā sannidhehi || 10 ||
ayaṃ dānakālastvahaṃ dānapātraṃ
bhavāneva dātā tvadanyaṃ na yāce |
bhavadbhaktimeva sthirāṃ dehi mahyaṃ
kṛpāśīla śaṃbho kṛtārtho’smi tasmāt || 11 ||
paśuṃ vetsi cenmāṃ tamevādhirūḍhaḥ
kalaṃkīti vā mūrdhni dhatse tameva |
dvijihvaḥ punaḥ so’pi te kaṃṭhabhūṣā
tvadaṃgīkṛtāḥ śarva sarve’pi dhanyāḥ || 12 ||
na śaknomi kartuṃ paradrohaleśaṃ
kathaṃ prīyase tvaṃ na jāne girīśa |
tathāhi prasanno’si kasyāpi
kāṃtāsutadrohiṇo vā pitṛdrohiṇo vā || 13 ||
stutiṃ dhyānamarcāṃ yathāvadvidhātuṃ
bhajannapyajānanmaheśāvalaṃbe |
trasaṃtaṃ sutaṃ trātumagre
mṛkaṃḍoryamaprāṇanirvāpaṇaṃ tvatpadābjam || 14 ||
śiro dṛṣṭi hṛdroga śūla pramehajvarārśo jarāyakṣmahikkāviṣārtān |
tvamādyo bhiṣagbheṣajaṃ bhasma śaṃbho
tvamullāghayāsmānvapurlāghavāya || 15 ||
daridro’smyabhadro’smi bhagno’smi dūye
viṣaṇṇo’smi sanno’smi khinno’smi cāham |
bhavānprāṇināmaṃtarātmāsi śaṃbho
mamādhiṃ na vetsi prabho rakṣa māṃ tvam || 16 ||
tvadakṣṇoḥ kaṭākṣaḥ patettryakṣa yatra
kṣaṇaṃ kṣmā ca lakṣmīḥ svayaṃ taṃ vṛṇāte |
kirīṭasphuraccāmaracchatramālākalācīgajakṣaumabhūṣāviśeṣaiḥ || 17 ||
bhavānyai bhavāyāpi mātre ca pitre
mṛḍānyai mṛḍāyāpyaghaghnyai makhaghne |
śivāṃgyai śivāṃgāya kurmaḥ śivāyai
śivāyāṃbikāyai namastryaṃbakāya || 18 ||
bhavadgauravaṃ mallaghutvaṃ viditvā
prabho rakṣa kāruṇyadṛṣṭyānugaṃ mām |
śivātmānubhāvastutāvakṣamo’haṃ
svaśaktyā kṛtaṃ me¶adhaṃ kṣamasva || 19 ||
yadā karṇaraṃdhraṃ vrajetkālavāhadviṣatkaṃṭhaghaṃṭā ghaṇātkāranādaḥ |
vṛṣādhīśamāruhya devaupavāhyaṃtadā
vatsa mā bhīriti prīṇaya tvam || 20 ||
yadā dāruṇābhāṣaṇā bhīṣaṇā me
bhaviṣyaṃtyupāṃte kṛtāṃtasya dūtāḥ |
tadā manmanastvatpadāṃbhoruhasthaṃ
kathaṃ niścalaṃ syānnamaste’stu śaṃbho || 21 ||
yadā durnivāravyatho’haṃ śayāno
luṭhanniḥśvasanniḥsṛtāvyaktavāṇiḥ |
tadā jahnukanyājalālaṃkṛtaṃ te
jaṭāmaṃḍalaṃ manmanomaṃdire syāt || 22 ||
yadā putramitrādayo matsakāśe
rudaṃtyasya hā kīdṛśīyaṃ daśeti |
tadā devadeveśa gaurīśa śaṃbho
namaste śivāyetyajasraṃ bravāṇi || 23 ||
yadā paśyatāṃ māmasau vetti
nāsmānayaṃ śvāsa eveti vāco bhaveyuḥ |
tadā bhūtibhūṣaṃ bhujaṃgāvanaddhaṃ
purāre bhavaṃtaṃ sphuṭaṃ bhāvayeyam || 24 ||
yadā yātanādehasaṃdehavāhī
bhavedātmadehe na moho mahānme |
tadā kāśaśītāṃśusaṃkāśamīśa
smarāre vapuste namaste smarāmi || 25 ||
yadāpāramacchāyamasthānamadbhirjanairvā vihīnaṃ gamiṣyāmi mārgam |
tadā taṃ niruṃdhaṃkṛtāṃtasya mārgaṃ
mahādeva mahyaṃ manojñaṃ prayaccha || 26 ||
yadā rauravādi smaranneva bhītyā
vrajāmyatra mohaṃ mahādeva ghoram |
tadā māmaho nātha kastārayiṣyatyanāthaṃ parādhīnamardheṃdumauḻe || 27 ||
yadā śvetapatrāyatālaṃghyaśakteḥ
kṛtāṃtādbhayaṃ bhaktivātsalyabhāvāt |
tadā pāhi māṃ pārvatīvallabhānyaṃ
na paśyāmi pātārametādṛśaṃ me || 28 ||
idānīmidānīṃ mṛtirme bhavitrītyaho saṃtataṃ ciṃtayā pīḍito’smi |
kathaṃ nāma mā bhūnmṛtau bhītireṣā
namaste gatīnāṃ gate nīlakaṃṭha || 29 ||
amaryādamevāhamābālavṛddhaṃ
haraṃtaṃ kṛtāṃtaṃ samīkṣyāsmi bhītaḥ |
mṛtau tāvakāṃghryabjadivyaprasādādbhavānīpate nirbhayo’haṃ bhavāni || 30 ||
jarājanmagarbhādhivāsādiduḥkhānyasahyāni jahyāṃ jagannātha deva |
bhavaṃtaṃ vinā me gatirnaiva śaṃbho
dayāḻo na jāgarti kiṃ vā dayā te || 31 ||
śivāyeti śabdo namaḥpūrva eṣa
smaranmuktikṛnmṛtyuhā tattvavācī |
maheśāna mā gānmanasto vacastaḥ
sadā mahyametatpradānaṃ prayaccha || 32 ||
tvamapyaṃba māṃ paśya śītāṃśumauḻipriye bheṣajaṃ tvaṃ bhavavyādhiśāṃtau
bahukleśabhājaṃ padāṃbhojapote
bhavābdhau nimagnaṃ nayasvādya pāram || 33 ||
anudyallalāṭākṣi vahni prarohairavāmasphuraccāruvāmoruśobhaiḥ |
anaṃgabhramadbhogibhūṣāviśeṣairacaṃdrārdhacūḍairalaṃ daivatairnaḥ || 34 ||
akaṃṭhekalaṃkādanaṃgebhujaṃgādapāṇaukapālādaphāle’nalākṣāt |
amauḻauśaśāṃkādavāmekaḻatrādahaṃ devamanyaṃ na manye na manye || 35 ||
mahādeva śaṃbho girīśa triśūliṃstvadīyaṃ samastaṃ vibhātīti yasmāt |
śivādanyathā daivataṃ nābhijāne
śivo’haṃ śivo’haṃ śivo’haṃ śivo’ham || 36 ||
yato’jāyatedaṃ prapaṃcaṃ vicitraṃ
sthitiṃ yāti yasminyadekāṃtamaṃte |
sa karmādihīnaḥ svayaṃjyotirātmā
śivo’haṃ śivo’haṃ śivo’haṃ śivo’ham || 37 ||
kirīṭe niśeśo lalāṭe hutāśo
bhuje bhogirājo gale kālimā ca |
tanau kāminī yasya tattulyadevaṃ
na jāne na jāne na jāne na jāne || 38 ||
anena stavenādarādaṃbikeśaṃ
parāṃ bhaktimāsādya yaṃ ye namaṃti |
mṛtau nirbhayāste janāstaṃ bhajaṃte
hṛdaṃbhojamadhye sadāsīnamīśam || 39 ||
bhujaṃgapriyākalpa śaṃbho mayaivaṃ
bhujaṃgaprayātena vṛttena klṛptam |
naraḥ stotrametatpaṭhitvorubhaktyā
suputrāyurārogyamaiśvaryameti || 40 ||
