śrī siddhalakṣmī stotraṃ
asya śrīsiddhalakṣmīstotramaṃtrasya hiraṇyagarbha ṛṣiḥ anuṣṭup chaṃdaḥ, śrīmahākāḻīmahālakṣmīmahāsarasvatyo devatāḥ śrīṃ bījaṃ hrīṃ śaktiḥ klīṃ kīlakaṃ mama sarvakleśapīḍāparihārārthaṃ sarvaduḥkhadāridryanāśanārthaṃ sarvakāryasiddhyarthaṃ śrīsiddhilakṣmīstotra pāṭhe viniyogaḥ ||
ṛṣyādinyāsaḥ
oṃ hiraṇyagarbha ṛṣaye namaḥ śirasi |
anuṣṭupchaṃdase namo mukhe |
śrīmahākāḻīmahālakṣmīmahāsarasvatīdevatābhyo namo hṛdiḥ |
śrīṃ bījāya namo guhye |
hrīṃ śaktaye namaḥ pādayoḥ |
klīṃ kīlakāya namo nābhau |
viniyogāya namaḥ sarvāṃgeṣu ||
karanyāsaḥ
oṃ śrīṃ siddhalakṣmyai aṃguṣṭhābhyāṃ namaḥ |
oṃ hrīṃ viṣṇutejase tarjanībhyāṃ namaḥ |
oṃ klīṃ amṛtānaṃdāyai madhyamābhyāṃ namaḥ |
oṃ śrīṃ daityamālinyai anāmikābhyāṃ namaḥ |
oṃ hrīṃ tejaḥ prakāśinyai kaniṣṭhikābhyāṃ namaḥ |
oṃ klīṃ brāhmyai vaiṣṇavyai rudrāṇyai karatala karapṛṣṭhābhyāṃ namaḥ ||
aṃganyāsaḥ
oṃ śrīṃ siddhalakṣmyai hṛdayāya namaḥ |
oṃ hrīṃ viṣṇutejase śirase svāhā |
oṃ klīṃ amṛtānaṃdāyai śikhāyai vaṣaṭ |
oṃ śrīṃ daityamālinyai kavacāya hum |
oṃ hrīṃ tejaḥ prakāśinyai netratrayāya vauṣaṭ |
oṃ klīṃ brāhmyai vaiṣṇavyai rudrāṇyai astrāya phaṭ ||
oṃ śrīṃ hrīṃ klīṃ śrīṃ siddhalakṣmyai namaḥ iti digbaṃdhaḥ ||
atha dhyānaṃ
brāhmīṃ ca vaiṣṇavīṃ bhadrāṃ ṣaḍbhujāṃ ca caturmukhīm |
trinetrāṃ khaḍgatriśūlapadmacakragadādharām || 1 ||
pītāṃbaradharāṃ devīṃ nānālaṃkārabhūṣitām |
tejaḥpuṃjadharīṃ śreṣṭhāṃ dhyāyedbālakumārikām || 2 ||
atha stotraṃ
oṃkāraṃ lakṣmīrūpaṃ tu viṣṇuṃ vāgbhavamavyayam |
viṣṇumānaṃdamavyaktaṃ hrīṃkāraṃ bījarūpiṇīm || 3 ||
klīṃ amṛtānaṃdinīṃ bhadrāṃ satyānaṃdadāyinīm |
śrīṃ daityaśamanīṃ śaktiṃ mālinīṃ śatrumardinīm || 4 ||
tejaḥ prakāśinīṃ devīṃ varadāṃ śubhakāriṇīm |
brāhmīṃ ca vaiṣṇavīṃ raudrīṃ kālikārūpaśobhinīm || 5 ||
akāre lakṣmīrūpaṃ tu ukāre viṣṇumavyayam |
makāraḥ puruṣo’vyakto devī praṇava ucyate || 6 ||
sūryakoṭipratīkāśaṃ caṃdrakoṭisamaprabham |
tanmadhye nikaraṃ sūkṣmaṃ brahmarupaṃ vyavasthitam || 7 ||
oṃkāraṃ paramānaṃdaṃ sadaiva surasuṃdarīm |
siddhalakṣmī mokṣalakṣmī ādyalakṣmī namo’stu te || 8 ||
śrīṃkāraṃ paramaṃ siddhaṃ sarvabuddhipradāyakam |
saubhāgyā’mṛtā kamalā satyalakṣmī namo’stu te || 9 ||
hrīṃkāraṃ paramaṃ śuddhaṃ paramaiśvaryadāyakam |
kamalā dhanadā lakṣmī bhogalakṣmī namo’stu te || 10 ||
klīṃkāraṃ kāmarūpiṇyaṃ kāmanāparipūrtidam |
capalā caṃcalā lakṣmī kātyāyanī namo’stu te || 11 ||
śrīṃkāraṃ siddhirūpiṇyaṃ sarvasiddhipradāyakam |
padmānanāṃ jaganmātre aṣṭalakṣmīṃ namo’stu te || 12 ||
sarvamaṃgaḻamāṃgaḻye śive sarvārthasādhike |
śaraṇye tryaṃbake gauri nārāyaṇī namo’stu te || 13 ||
prathamaṃ tryaṃbakā gaurī dvitīyaṃ vaiṣṇavī tathā |
tṛtīyaṃ kamalā proktā caturthaṃ suṃdarī tathā || 14 ||
paṃcamaṃ viṣṇuśaktiśca ṣaṣṭhaṃ kātyāyanī tathā |
vārāhī saptamaṃ caiva hyaṣṭamaṃ harivallabhā || 15 ||
navamaṃ khaḍginī proktā daśamaṃ caiva devikā |
ekādaśaṃ siddhalakṣmīrdvādaśaṃ haṃsavāhinī || 16 ||
uttaranyāsaḥ
oṃ śrīṃ siddhalakṣmyai hṛdayāya namaḥ |
oṃ hrīṃ viṣṇutejase śirase svāhā |
oṃ klīṃ amṛtānaṃdāyai śikhāyai vaṣaṭ |
oṃ śrīṃ daityamālinyai kavacāya hum |
oṃ hrīṃ tejaḥ prakāśinyai netratrayāya vauṣaṭ |
oṃ klīṃ brāhmyai vaiṣṇavyai rudrāṇyai astrāya phaṭ ||
oṃ śrīṃ hrīṃ klīṃ śrīṃ siddhalakṣmyai namaḥ iti digvimokaḥ ||
atha phalaśṛtiḥ
etat stotravaraṃ devyā ye paṭhaṃti sadā narāḥ |
sarvāpadbhyo vimucyaṃte nātra kāryā vicāraṇā || 17 ||
ekamāsaṃ dvimāsaṃ ca trimāsaṃ ca catusthathā |
paṃcamāsaṃ ca ṣaṇmāsaṃ trikālaṃ yaḥ sadā paṭhet || 18 ||
brāhmaṇaḥ kleśito duḥkhī dāridryabhayapīḍitaḥ |
janmāṃtara sahasrotthairmucyate sarvakilbaṣaiḥ || 19 ||
daridro labhate lakṣmīmaputraḥ putravān bhavet |
dhanyo yaśasvī śatrughno vahnicaurabhayeṣu ca || 20 ||
śākinī bhūta vetāla sarpa vyāghra nipātane |
rājadvāre sabhāsthāne kārāgṛhanibaṃdhane || 21 ||
īśvareṇa kṛtaṃ stotraṃ prāṇināṃ hitakārakam |
stuvaṃtu brāhmaṇāḥ nityaṃ dāridryaṃ na ca bādhate || 22 ||
sarvapāpaharā lakṣmīḥ sarvasiddhipradāyinīm |
sādhakāḥ labhate sarvaṃ paṭhet stotraṃ niraṃtaram || 23 ||
prārthanā
yā śrīḥ padmavane kadaṃbaśikhare rājagṛhe kuṃjare
śvete cāśvayute vṛṣe ca yugale yajñe ca yūpasthite |
śaṃkhe daivakule nareṃdrabhavane gaṃgātaṭe gokule
sā śrīstiṣṭhatu sarvadā mama gṛhe bhūyāt sadā niścalā ||
yā sā padmāsanasthā vipulakaṭitaṭī padmapatrāyatākṣī
gaṃbhīrāvartanābhiḥ stanabharanamitā śuddhavastrottarīyā |
lakṣmīrdivyairgajeṃdrairmaṇigaṇakhacitaiḥ snāpitā hemakuṃbhaiḥ
nityaṃ sā padmahastā mama vasatu gṛhe sarvamāṃgaḻyayuktā ||
iti śrībrahmapurāṇe īśvaraviṣṇusaṃvāde śrī siddhalakṣmī stotram ||
