ardha nārīśvara aṣṭakaṃ

cāṃpeyagaurārdhaśarīrakāyai
karpūragaurārdhaśarīrakāya |
dhammillakāyai ca jaṭādharāya
namaḥ śivāyai ca namaḥ śivāya || 1 ||

kastūrikākuṃkumacarcitāyai
citārajaḥpuṃja vicarcitāya |
kṛtasmarāyai vikṛtasmarāya
namaḥ śivāyai ca namaḥ śivāya || 2 ||

jhaṇatkvaṇatkaṃkaṇanūpurāyai
pādābjarājatphaṇinūpurāya |
hemāṃgadāyai bhujagāṃgadāya
namaḥ śivāyai ca namaḥ śivāya || 3 ||

viśālanīlotpalalocanāyai
vikāsipaṃkeruhalocanāya |
samekṣaṇāyai viṣamekṣaṇāya
namaḥ śivāyai ca namaḥ śivāya || 4 ||

maṃdāramālākalitālakāyai
kapālamālāṃkitakaṃdharāya |
divyāṃbarāyai ca digaṃbarāya
namaḥ śivāyai ca namaḥ śivāya || 5 ||

aṃbhodharaśyāmalakuṃtalāyai
taṭitprabhātāmrajaṭādharāya |
nirīśvarāyai nikhileśvarāya
namaḥ śivāyai ca namaḥ śivāya || 6 ||

prapaṃcasṛṣṭyunmukhalāsyakāyai
samastasaṃhārakatāṃḍavāya |
jagajjananyai jagadekapitre
namaḥ śivāyai ca namaḥ śivāya || 7 ||

pradīptaratnojjvalakuṃḍalāyai
sphuranmahāpannagabhūṣaṇāya |
śivānvitāyai ca śivānvitāya
namaḥ śivāyai ca namaḥ śivāya || 8 ||

etatpaṭhedaṣṭakamiṣṭadaṃ yo
bhaktyā sa mānyo bhuvi dīrghajīvī |
prāpnoti saubhāgyamanaṃtakālaṃ
bhūyātsadā tasya samastasiddhiḥ ||