dakṣiṇā mūrti stotraṃ
śāṃtipāṭhaḥ
oṃ yo brahmāṇaṃ vidadhāti pūrvaṃ
yo vai vedāṃśca prahiṇoti tasmai |
taṃ ha devamātmabuddhiprakāśaṃ
mumukṣurvai śaraṇamahaṃ prapadye ||
dhyānaṃ
oṃ maunavyākhyā prakaṭita parabrahmatattvaṃ yuvānaṃ
varṣiṣṭhāṃte vasadṛṣigaṇairāvṛtaṃ brahmaniṣṭhaiḥ |
ācāryeṃdraṃ karakalita cinmudramānaṃdamūrtiṃ
svātmārāmaṃ muditavadanaṃ dakṣiṇāmūrtimīḍe || 1 ||
vaṭaviṭapisamīpebhūmibhāge niṣaṇṇaṃ
sakalamunijanānāṃ jñānadātāramārāt |
tribhuvanagurumīśaṃ dakṣiṇāmūrtidevaṃ
jananamaraṇaduḥkhacchedadakṣaṃ namāmi || 2 ||
citraṃ vaṭatarormūle vṛddhāḥ śiṣyā gururyuvā |
gurostu maunaṃ vyākhyānaṃ śiṣyāstucchinnasaṃśayāḥ || 3 ||
nidhaye sarvavidyānāṃ bhiṣaje bhavarogiṇām |
gurave sarvalokānāṃ dakṣiṇāmūrtaye namaḥ || 4 ||
oṃ namaḥ praṇavārthāya śuddhajñānaikamūrtaye |
nirmalāya praśāṃtāya dakṣiṇāmūrtaye namaḥ || 5 ||
cidghanāya maheśāya vaṭamūlanivāsine |
saccidānaṃdarūpāya dakṣiṇāmūrtaye namaḥ || 6 ||
īśvaro gururātmeti mūrtibhedavibhāgine |
vyomavadvyāptadehāya dakṣiṇāmūrtaye namaḥ || 7 ||
aṃguṣṭhatarjanī yogamudrā vyājenayoginām |
śrutyarthaṃ brahmajīvaikyaṃ darśayanyogatā śivaḥ || 8 ||
oṃ śāṃtiḥ śāṃtiḥ śāṃtiḥ ||
stotraṃ
viśvaṃ darpaṇa-dṛśyamāna-nagarī tulyaṃ nijāṃtargataṃ
paśyannātmani māyayā bahirivodbhūtaṃ yathā nidrayā |
ya-ssākṣātkurute prabodhasamaye svātmāname-vādvayaṃ
tasmai śrīgurumūrtaye nama idaṃ śrī dakṣiṇāmūrtaye || 1 ||
bījasyāṃtari-vāṃkuro jagadidaṃ prāṅnirvikalpaṃ punaḥ
māyākalpita deśakālakalanā vaicitryacitrīkṛtam |
māyāvīva vijṛṃbhayatyapi mahāyogīva yaḥ svecchayā
tasmai śrīgurumūrtaye nama idaṃ śrī dakṣiṇāmūrtaye || 2 ||
yasyaiva sphuraṇaṃ sadātmakamasatkalpārthakaṃ bhāsate
sākṣāttattvamasīti vedavacasā yo bodhayatyāśritān |
yatsākṣātkaraṇādbhavenna punarāvṛttirbhavāṃbhonidhau
tasmai śrīgurumūrtaye nama idaṃ śrī dakṣiṇāmūrtaye || 3 ||
nānācchidra ghaṭodara sthita mahādīpa prabhābhāsvaraṃ
jñānaṃ yasya tu cakṣurādikaraṇa dvārā bahiḥ spaṃdate |
jānāmīti tameva bhāṃtamanubhātyetatsamastaṃ jagat
tasmai śrī gurumūrtaye nama idaṃ śrī dakṣiṇāmūrtaye || 4 ||
dehaṃ prāṇamapīṃdriyāṇyapi calāṃ buddhiṃ ca śūnyaṃ viduḥ
strī bālāṃdha jaḍopamāstvahamiti bhrāṃtābhṛśaṃ vādinaḥ |
māyāśakti vilāsakalpita mahāvyāmoha saṃhāriṇe
tasmai śrī gurumūrtaye nama idaṃ śrī dakṣiṇāmūrtaye || 5 ||
rāhugrasta divākareṃdu sadṛśo māyā samācchādanāt
sanmātraḥ karaṇopasaṃharaṇato yo’bhūtsuṣuptaḥ pumān |
prāgasvāpsamiti prabodhasamaye yaḥ pratyabhijñāyate
tasmai śrī gurumūrtaye nama idaṃ śrī dakṣiṇāmūrtaye || 6 ||
bālyādiṣvapi jāgradādiṣu tathā sarvāsvavasthāsvapi
vyāvṛttā-svanuvartamāna-mahamityaṃtaḥ sphuraṃtaṃ sadā |
svātmānaṃ prakaṭīkaroti bhajatāṃ yo mudrayā bhadrayā
tasmai śrī gurumūrtaye nama idaṃ śrī dakṣiṇāmūrtaye || 7 ||
viśvaṃ paśyati kāryakāraṇatayā svasvāmisaṃbaṃdhataḥ
śiṣyācāryatayā tathaiva pitṛ putrādyātmanā bhedataḥ |
svapne jāgrati vā ya eṣa puruṣo māyā paribhrāmitaḥ
tasmai śrī gurumūrtaye nama idaṃ śrī dakṣiṇāmūrtaye || 8 ||
bhūraṃbhāṃsyanalo’nilo’ṃbara-maharnātho himāṃśuḥ pumān
ityābhāti carācarātmakamidaṃ yasyaiva mūrtyaṣṭakam |
nānyatkiṃcana vidyate vimṛśatāṃ yasmātparasmādvibhoḥ
tasmai śrī gurumūrtaye nama idaṃ śrī dakṣiṇāmūrtaye || 9 ||
sarvātmatvamiti sphuṭīkṛtamidaṃ yasmādamuṣmin stave
tenāsya śravaṇāttadartha mananāddhyānācca saṃkīrtanāt |
sarvātmatva mahāvibhūtisahitaṃ syādīśvaratvaṃ svataḥ
siddhyettatpunaraṣṭadhā pariṇataṃ caiśvarya-mavyāhatam || 10 ||
|| iti śrīmacchaṃkarācāryaviracitaṃ dakṣiṇāmūrtistotraṃ saṃpūrṇam ||
