viṣṇu ṣaṭpadi
avinayamapanaya viṣṇo damaya manaḥ śamaya viṣayamṛgatṛṣṇām |
bhūtadayāṃ vistāraya tāraya saṃsārasāgarataḥ || 1 ||
divyadhunīmakaraṃde parimaḻaparibhogasaccidānaṃde |
śrīpatipadāraviṃde bhavabhayakhedacchide vaṃde || 2 ||
satyapi bhedāpagame nātha tavā’haṃ na māmakīnastvam |
sāmudro hi taraṃgaḥ kvacana samudro na tāraṃgaḥ || 3 ||
uddhṛtanaga nagabhidanuja danujakulāmitra mitraśaśidṛṣṭe |
dṛṣṭe bhavati prabhavati na bhavati kiṃ bhavatiraskāraḥ || 4 ||
matsyādibhiravatārairavatāravatā’vatā sadā vasudhām |
parameśvara paripālyo bhavatā bhavatāpabhīto’ham || 5 ||
dāmodara guṇamaṃdira suṃdaravadanāraviṃda goviṃda |
bhavajaladhimathanamaṃdara paramaṃ daramapanaya tvaṃ me || 6 ||
nārāyaṇa karuṇāmaya śaraṇaṃ karavāṇi tāvakau caraṇau |
iti ṣaṭpadī madīye vadanasaroje sadā vasatu ||
iti śrīmaccaṃkarācārya viracitaṃ śrī viṣṇu ṣaṭpadī stotraṃ saṃpūrṇaṃ
