prātaḥsmaraṇa stotraṃ
prātaḥ smarāmi hṛdi saṃsphuradātmatattvaṃ
saccitsukhaṃ paramahaṃsagatiṃ turīyam |
yatsvapnajāgarasuṣuptamavaiti nityaṃ
tadbrahma niṣkalamahaṃ na ca bhūtasaṃghaḥ || 1 ||
prātarbhajāmi manasāṃ vacasāmagamyaṃ
vāco vibhāṃti nikhilā yadanugraheṇa |
yannetineti vacanairnigamā avocuḥ
taṃ devadevamajamacyutamāhuragryam || 2 ||
prātarnamāmi tamasaḥ paramarkavarṇaṃ
pūrṇaṃ sanātanapadaṃ puruṣottamākhyam |
yasminnidaṃ jagadaśeṣamaśeṣamūrtau
rajjvāṃ bhujaṃgama iva pratibhāsitaṃ vai || 3 ||
ślokatrayamidaṃ puṇyaṃ lokatrayavibhūṣaṇaṃ
prātaḥ kāle paṭhedyastu sa gacchetparamaṃ padam ||
