śrī lakṣmī sahasranāma stotraṃ
nāmnāṃ sāṣṭasahasraṃca brūhi gārgya mahāmate |
mahālakṣmyā mahādevyā bhuktimuktyarthasiddhaye || 1 ||
gārgya uvāca
sanatkumāramāsīnaṃ dvādaśādityasannibham |
apṛcchanyogino bhaktyā yogināmarthasiddhaye || 2 ||
sarvalaukikakarmabhyo vimuktānāṃ hitāya vai |
bhuktimuktipradaṃ japyamanubrūhi dayānidhe || 3 ||
sanatkumāra bhagavansarvajño’si viśeṣataḥ |
āstikyasiddhaye nṝṇāṃ kṣipradharmārthasādhanam || 4 ||
khidyaṃti mānavāssarve dhanābhāvena kevalam |
siddhyaṃti dhanino’nyasya naiva dharmārthakāmanāḥ || 5 ||
dāridryadhvaṃsinī nāma kena vidyā prakīrtitā |
kena vā brahmavidyā’pi kena mṛtyuvināśinī || 6 ||
sarvāsāṃ sārabhūtaikā vidyānāṃ kena kīrtitā |
pratyakṣasiddhidā brahman tāmācakṣva dayānidhe || 7 ||
sanatkumāra uvāca
sādhu pṛṣṭaṃ mahābhāgāssarvalokahitaiṣiṇaḥ |
mahatāmeṣa dharmaśca nānyeṣāmiti me matiḥ || 8 ||
brahmaviṣṇumahādevamaheṃdrādimahātmabhiḥ |
saṃproktaṃ kathayāmyadya lakṣmīnāmasahasrakam || 9 ||
yasyoccāraṇamātreṇa dāridryānmucyate naraḥ |
kiṃ punastajjapājjāpī sarveṣṭārthānavāpnuyāt || 10 ||
asya śrīlakṣmīdivyasahasranāmastotramahāmaṃtrasya ānaṃdakardamaciklīteṃdirāsutādayo mahātmāno maharṣayaḥ anuṣṭupchaṃdaḥ viṣṇumāyā śaktiḥ mahālakṣmīḥ parādevatā śrīmahālakṣmīprasādadvārā sarveṣṭārthasiddhyarthe jape viniyogaḥ |
dhyānaṃ
padmanābhapriyāṃ devīṃ padmākṣīṃ padmavāsinīm |
padmavaktrāṃ padmahastāṃ vaṃde padmāmaharniśam || 1 ||
pūrṇeṃduvadanāṃ divyaratnābharaṇabhūṣitām |
varadābhayahastāḍhyāṃ dhyāyeccaṃdrasahodarīm || 2 ||
icchārūpāṃ bhagavatassaccidānaṃdarūpiṇīm |
sarvajñāṃ sarvajananīṃ viṣṇuvakṣassthalālayām |
dayālumaniśaṃ dhyāyetsukhasiddhisvarūpiṇīm || 3 ||
stotraṃ
nityāgatānaṃtanityā naṃdinī janaraṃjanī |
nityaprakāśinī caiva svaprakāśasvarūpiṇī || 1 ||
mahālakṣmīrmahākālī mahākanyā sarasvatī |
bhogavaibhavasaṃdhātrī bhaktānugrahakāriṇī || 2 ||
īśāvāsyā mahāmāyā mahādevī maheśvarī |
hṛllekhā paramā śaktirmātṛkābījarūpiṇī || 3 ||
nityānaṃdā nityabodhā nādinī janamodinī |
satyapratyayanī caiva svaprakāśātmarūpiṇī || 4 ||
tripurā bhairavī vidyā haṃsā vāgīśvarī śivā |
vāgdevī ca mahārātriḥ kālarātristrilocanā || 5 ||
bhadrakāḻī karāḻī ca mahākāḻī tilottamā |
kāḻī karāḻavaktrāṃtā kāmākṣī kāmadā śubhā || 6 ||
caṃḍikā caṃḍarūpeśā cāmuṃḍā cakradhāriṇī |
trailokyajayinī devī trailokyavijayottamā || 7 ||
siddhalakṣmīḥ kriyālakṣmīrmokṣalakṣmīḥ prasādinī |
umā bhagavatī durgā cāṃdrī dākṣāyaṇī śivā || 8 ||
pratyaṃgirā dharāvelā lokamātā haripriyā |
pārvatī paramā devī brahmavidyāpradāyinī || 9 ||
arūpā bahurūpā ca virūpā viśvarūpiṇī |
paṃcabhūtātmikā vāṇī paṃcabhūtātmikā parā || 10 ||
kāḻī mā paṃcikā vāgmī haviḥpratyadhidevatā |
devamātā sureśānā devagarbhā’ṃbikā dhṛtiḥ || 11 ||
saṃkhyā jātiḥ kriyāśaktiḥ prakṛtirmohinī mahī |
yajñavidyā mahāvidyā guhyavidyā vibhāvarī || 12 ||
jyotiṣmatī mahāmātā sarvamaṃtraphalapradā |
dāridryadhvaṃsinī devī hṛdayagraṃthibhedinī || 13 ||
sahasrādityasaṃkāśā caṃdrikā caṃdrarūpiṇī |
gāyatrī somasaṃbhūtissāvitrī praṇavātmikā || 14 ||
śāṃkarī vaiṣṇavī brāhmī sarvadevanamaskṛtā |
sevyadurgā kuberākṣī karavīranivāsinī || 15 ||
jayā ca vijayā caiva jayaṃtī cā’parājitā |
kubjikā kālikā śāstrī vīṇāpustakadhāriṇī || 16 ||
sarvajñaśaktiśśrīśaktirbrahmaviṣṇuśivātmikā |
iḍāpiṃgalikāmadhyamṛṇālītaṃturūpiṇī || 17 ||
yajñeśānī prathā dīkṣā dakṣiṇā sarvamohinī |
aṣṭāṃgayoginī devī nirbījadhyānagocarā || 18 ||
sarvatīrthasthitā śuddhā sarvaparvatavāsinī |
vedaśāstraprabhā devī ṣaḍaṃgādipadakramā || 19 ||
śivā dhātrī śubhānaṃdā yajñakarmasvarūpiṇī |
vratinī menakā devī brahmāṇī brahmacāriṇī || 20 ||
ekākṣaraparā tārā bhavabaṃdhavināśinī |
viśvaṃbharā dharādhārā nirādhārā’dhikasvarā || 21 ||
rākā kuhūramāvāsyā pūrṇimā’numatirdyutiḥ |
sinīvālī śivā’vaśyā vaiśvadevī piśaṃgilā || 22 ||
pippalā ca viśālākṣī rakṣoghnī vṛṣṭikāriṇī |
duṣṭavidrāviṇī devī sarvopadravanāśinī || 23 ||
śāradā śarasaṃdhānā sarvaśastrasvarūpiṇī |
yuddhamadhyasthitā devī sarvabhūtaprabhaṃjanī || 24 ||
ayuddhā yuddharūpā ca śāṃtā śāṃtisvarūpiṇī |
gaṃgā sarasvatīveṇīyamunānarmadāpagā || 25 ||
samudravasanāvāsā brahmāṃḍaśroṇimekhalā |
paṃcavaktrā daśabhujā śuddhasphaṭikasannibhā || 26 ||
raktā kṛṣṇā sitā pītā sarvavarṇā nirīśvarī |
kāḻikā cakrikā devī satyā tu vaṭukāsthitā || 27 ||
taruṇī vāruṇī nārī jyeṣṭhādevī sureśvarī |
viśvaṃbharādharā kartrī gaḻārgaḻavibhaṃjanī || 28 ||
saṃdhyārātrirdivājyotsnā kalākāṣṭhā nimeṣikā |
urvī kātyāyanī śubhrā saṃsārārṇavatāriṇī || 29 ||
kapilā kīlikā’śokā mallikānavamallikā | [ mallikānavamālikā ]
devikā naṃdikā śāṃtā bhaṃjikā bhayabhaṃjikā || 30 ||
kauśikī vaidikī devī saurī rūpādhikā’tibhā |
digvastrā navavastrā ca kanyakā kamalodbhavā || 31 ||
śrīssaumyalakṣaṇā’tītadurgā sūtraprabodhikā |
śraddhā medhā kṛtiḥ prajñā dhāraṇā kāṃtireva ca || 32 ||
śrutiḥ smṛtirdhṛtirdhanyā bhūtiriṣṭirmanīṣiṇī |
viraktirvyāpinī māyā sarvamāyāprabhaṃjanī || 33 ||
māheṃdrī maṃtriṇī siṃhī ceṃdrajālasvarūpiṇī |
avasthātrayanirmuktā guṇatrayavivarjitā || 34 ||
īṣaṇātrayanirmuktā sarvarogavivarjitā |
yogidhyānāṃtagamyā ca yogadhyānaparāyaṇā || 35 ||
trayīśikhā viśeṣajñā vedāṃtajñānarūpiṇī |
bhāratī kamalā bhāṣā padmā padmavatī kṛtiḥ || 36 ||
gautamī gomatī gaurī īśānā haṃsavāhinī |
nārāyaṇī prabhādhārā jāhnavī śaṃkarātmajā || 37 ||
citraghaṃṭā sunaṃdā śrīrmānavī manusaṃbhavā |
staṃbhinī kṣobhiṇī mārī bhrāmiṇī śatrumāriṇī || 38 ||
mohinī dveṣiṇī vīrā aghorā rudrarūpiṇī |
rudraikādaśinī puṇyā kalyāṇī lābhakāriṇī || 39 ||
devadurgā mahādurgā svapnadurgā’ṣṭabhairavī |
sūryacaṃdrāgnirūpā ca grahanakṣatrarūpiṇī || 40 ||
biṃdunādakaḻātītā biṃdunādakaḻātmikā |
daśavāyujayākārā kaḻāṣoḍaśasaṃyutā || 41 ||
kāśyapī kamalādevī nādacakranivāsinī |
mṛḍādhārā sthirā guhyā devikā cakrarūpiṇī || 42 ||
avidyā śārvarī bhuṃjā jaṃbhāsuranibarhiṇī |
śrīkāyā śrīkalā śubhrā karmanirmūlakāriṇī || 43 ||
ādilakṣmīrguṇādhārā paṃcabrahmātmikā parā |
śrutirbrahmamukhāvāsā sarvasaṃpattirūpiṇī || 44 ||
mṛtasaṃjīvanī maitrī kāminī kāmavarjitā |
nirvāṇamārgadā devī haṃsinī kāśikā kṣamā || 45 ||
saparyā guṇinī bhinnā nirguṇā khaṃḍitāśubhā |
svāminī vedinī śakyā śāṃbarī cakradhāriṇī || 46 ||
daṃḍinī muṃḍinī vyāghrī śikhinī somasaṃhatiḥ |
ciṃtāmaṇiścidānaṃdā paṃcabāṇaprabodhinī || 47 ||
bāṇaśreṇissahasrākṣī sahasrabhujapādukā |
saṃdhyāvalistrisaṃdhyākhyā brahmāṃḍamaṇibhūṣaṇā || 48 ||
vāsavī vāruṇīsenā kuḻikā maṃtraraṃjanī |
jitaprāṇasvarūpā ca kāṃtā kāmyavarapradā || 49 ||
maṃtrabrāhmaṇavidyārthā nādarūpā haviṣmatī |
ātharvaṇiḥ śrutiḥ śūnyā kalpanāvarjitā satī || 50 ||
sattājātiḥ pramā’meyā’pramitiḥ prāṇadā gatiḥ |
avarṇā paṃcavarṇā ca sarvadā bhuvaneśvarī || 51 ||
trailokyamohinī vidyā sarvabhartrī kṣarā’kṣarā |
hiraṇyavarṇā hariṇī sarvopadravanāśinī || 52 ||
kaivalyapadavīrekhā sūryamaṃḍalasaṃsthitā |
somamaṃḍalamadhyasthā vahnimaṃḍalasaṃsthitā || 53 ||
vāyumaṃḍalamadhyasthā vyomamaṃḍalasaṃsthitā |
cakrikā cakramadhyasthā cakramārgapravartinī || 54 ||
kokilākulacakreśā pakṣatiḥ paṃktipāvanī |
sarvasiddhāṃtamārgasthā ṣaḍvarṇāvaravarjitā || 55 ||
śararudraharā haṃtrī sarvasaṃhārakāriṇī |
puruṣā pauruṣī tuṣṭissarvataṃtraprasūtikā || 56 ||
ardhanārīśvarī devī sarvavidyāpradāyinī |
bhārgavī yājuṣīvidyā sarvopaniṣadāsthitā || 57 || [ bhujuṣīvidyā ]
vyomakeśākhilaprāṇā paṃcakośavilakṣaṇā |
paṃcakośātmikā pratyakpaṃcabrahmātmikā śivā || 58 ||
jagajjarājanitrī ca paṃcakarmaprasūtikā |
vāgdevyābharaṇākārā sarvakāmyasthitāsthitiḥ || 59 ||
aṣṭādaśacatuṣṣaṣṭhipīṭhikā vidyayā yutā |
kāḻikākarṣaṇaśyāmā yakṣiṇī kinnareśvarī || 60 ||
ketakī mallikā’śokā vārāhī dharaṇī dhruvā |
nārasiṃhī mahogrāsyā bhaktānāmārtināśinī || 61 ||
aṃtarbalā sthirā lakṣmīrjarāmaraṇanāśinī |
śrīraṃjitā mahākāyā somasūryāgnilocanā || 62 ||
aditirdevamātā ca aṣṭaputrā’ṣṭayoginī |
aṣṭaprakṛtiraṣṭāṣṭavibhrājadvikṛtākṛtiḥ || 63 ||
durbhikṣadhvaṃsinī devī sītā satyā ca rukmiṇī |
khyātijā bhārgavī devī devayonistapasvinī || 64 ||
śākaṃbharī mahāśoṇā garuḍoparisaṃsthitā |
siṃhagā vyāghragā devī vāyugā ca mahādrigā || 65 ||
akārādikṣakārāṃtā sarvavidyādhidevatā |
maṃtravyākhyānanipuṇā jyotiśśāstraikalocanā || 66 ||
iḍāpiṃgaḻikāmadhyāsuṣumnā graṃthibhedinī |
kālacakrāśrayopetā kālacakrasvarūpiṇī || 67 ||
vaiśāradī matiśśreṣṭhā variṣṭhā sarvadīpikā |
vaināyakī varārohā śroṇivelā bahirvaliḥ || 68 ||
jaṃbhinī jṛṃbhiṇī jaṃbhakāriṇī gaṇakārikā |
śaraṇī cakrikā’naṃtā sarvavyādhicikitsakī || 69 ||
devakī devasaṃkāśā vāridhiḥ karuṇākarā |
śarvarī sarvasaṃpannā sarvapāpaprabhaṃjanī || 70 ||
ekamātrā dvimātrā ca trimātrā ca tathā’parā |
ardhamātrā parā sūkṣmā sūkṣmārthā’rthaparā’parā || 71 ||
ekavīrā viśeṣākhyā ṣaṣṭhīdevī manasvinī |
naiṣkarmyā niṣkalālokā jñānakarmādhikā guṇā || 72 ||
sabaṃdhvānaṃdasaṃdohā vyomākārā’nirūpitā |
gadyapadyātmikā vāṇī sarvālaṃkārasaṃyutā || 73 ||
sādhubaṃdhapadanyāsā sarvauko ghaṭikāvaliḥ |
ṣaṭkarmā karkaśākārā sarvakarmavivarjitā || 74 ||
ādityavarṇā cāparṇā kāminī vararūpiṇī |
brahmāṇī brahmasaṃtānā vedavāgīśvarī śivā || 75 ||
purāṇanyāyamīmāṃsādharmaśāstrāgamaśrutā |
sadyovedavatī sarvā haṃsī vidyādhidevatā || 76 ||
viśveśvarī jagaddhātrī viśvanirmāṇakāriṇī |
vaidikī vedarūpā ca kālikā kālarūpiṇī || 77 ||
nārāyaṇī mahādevī sarvatattvapravartinī |
hiraṇyavarṇarūpā ca hiraṇyapadasaṃbhavā || 78 ||
kaivalyapadavī puṇyā kaivalyajñānalakṣitā |
brahmasaṃpattirūpā ca brahmasaṃpattikāriṇī || 79 ||
vāruṇī vāruṇārādhyā sarvakarmapravartinī |
ekākṣaraparā”yuktā sarvadāridryabhaṃjinī || 80 ||
pāśāṃkuśānvitā divyā vīṇāvyākhyākṣasūtrabhṛt |
ekamūrtistrayīmūrtirmadhukaiṭabhabhaṃjinī || 81 ||
sāṃkhyā sāṃkhyavatī jvālā jvalaṃtī kāmarūpiṇī |
jāgratī sarvasaṃpattissuṣuptā sveṣṭadāyinī || 82 ||
kapālinī mahādaṃṣṭrā bhrukuṭī kuṭilānanā |
sarvāvāsā suvāsā ca bṛhatyaṣṭiśca śakvarī || 83 ||
chaṃdogaṇapratiṣṭhā ca kalmāṣī karuṇātmikā |
cakṣuṣmatī mahāghoṣā khaḍgacarmadharā’śaniḥ || 84 ||
śilpavaicitryavidyotā sarvatobhadravāsinī |
aciṃtyalakṣaṇākārā sūtrabhāṣyanibaṃdhanā || 85 ||
sarvavedārthasaṃpattissarvaśāstrārthamātṛkā |
akārādikṣakārāṃtasarvavarṇakṛtasthalā || 86 ||
sarvalakṣmīssadānaṃdā sāravidyā sadāśivā |
sarvajñā sarvaśaktiśca khecarīrūpagocchritā || 87 ||
aṇimādiguṇopetā parā kāṣṭhā parā gatiḥ |
haṃsayuktavimānasthā haṃsārūḍhā śaśiprabhā || 88 ||
bhavānī vāsanāśaktirākṛtisthākhilā’khilā |
taṃtraheturvicitrāṃgī vyomagaṃgāvinodinī || 89 ||
varṣā ca vārṣikā caiva ṛgyajussāmarūpiṇī |
mahānadīnadīpuṇyā’gaṇyapuṇyaguṇakriyā || 90 ||
samādhigatalabhyārthā śrotavyā svapriyā ghṛṇā |
nāmākṣaraparā devī upasarganakhāṃcitā || 91 ||
nipātorudvayījaṃghā mātṛkā maṃtrarūpiṇī |
āsīnā ca śayānā ca tiṣṭhaṃtī dhāvanādhikā || 92 ||
lakṣyalakṣaṇayogāḍhyā tādrūpyagaṇanākṛtiḥ |
saikarūpā naikarūpā seṃdurūpā tadākṛtiḥ || 93 ||
samāsataddhitākārā vibhaktivacanātmikā |
svāhākārā svadhākārā śrīpatyardhāṃganaṃdinī || 94 ||
gaṃbhīrā gahanā guhyā yoniliṃgārdhadhāriṇī |
śeṣavāsukisaṃsevyā capalā varavarṇinī || 95 ||
kāruṇyākārasaṃpattiḥ kīlakṛnmaṃtrakīlikā |
śaktibījātmikā sarvamaṃtreṣṭākṣayakāmanā || 96 ||
āgneyī pārthivā āpyā vāyavyā vyomaketanā |
satyajñānātmikā”naṃdā brāhmī brahma sanātanī || 97 ||
avidyāvāsanā māyāprakṛtissarvamohinī |
śaktirdhāraṇaśaktiśca cidacicchaktiyoginī || 98 ||
vaktrāruṇā mahāmāyā marīcirmadamardinī |
virāṭ svāhā svadhā śuddhā nīrūpāstissubhaktigā || 99 ||
nirūpitādvayīvidyā nityānityasvarūpiṇī |
vairājamārgasaṃcārā sarvasatpathadarśinī || 100 ||
jālaṃdharī mṛḍānī ca bhavānī bhavabhaṃjanī |
traikālikajñānataṃtustrikālajñānadāyinī || 101 ||
nādātītā smṛtiḥ prajñā dhātrīrūpā tripuṣkarā |
parājitāvidhānajñā viśeṣitaguṇātmikā || 102 ||
hiraṇyakeśinī hemabrahmasūtravicakṣaṇā |
asaṃkhyeyaparārdhāṃtasvaravyaṃjanavaikharī || 103 ||
madhujihvā madhumatī madhumāsodayā madhuḥ |
mādhavī ca mahābhāgā meghagaṃbhīranisvanā || 104 ||
brahmaviṣṇumaheśādijñātavyārthaviśeṣagā |
nābhau vahniśikhākārā lalāṭe caṃdrasannibhā || 105 ||
bhrūmadhye bhāskarākārā sarvatārākṛtirhṛdi |
kṛttikādibharaṇyaṃtanakṣatreṣṭyārcitodayā || 106 ||
grahavidyātmikā jyotirjyotirvinmatijīvikā |
brahmāṃḍagarbhiṇī bālā saptāvaraṇadevatā || 107 ||
vairājottamasāmrājyā kumārakuśalodayā |
bagaḻā bhramarāṃbā ca śivadūtī śivātmikā || 108 ||
meruviṃdhyādisaṃsthānā kāśmīrapuravāsinī |
yoganidrā mahānidrā vinidrā rākṣasāśritā || 109 ||
suvarṇadā mahāgaṃgā paṃcākhyā paṃcasaṃhatiḥ |
suprajātā suvīrā ca supoṣā supatiśśivā || 110 ||
sugṛhā raktabījāṃtā hatakaṃdarpajīvikā |
samudravyomamadhyasthā samabiṃdusamāśrayā || 111 ||
saubhāgyarasajīvātussārāsāravivekadṛk |
trivalyādisupuṣṭāṃgā bhāratī bharatāśritā || 112 ||
nādabrahmamayīvidyā jñānabrahmamayīparā |
brahmanāḍī niruktiśca brahmakaivalyasādhanam || 113 ||
kālikeyamahodāravīryavikramarūpiṇī |
vaḍavāgniśikhāvaktrā mahākavalatarpaṇā || 114 ||
mahābhūtā mahādarpā mahāsārā mahākratuḥ |
paṃjabhūtamahāgrāsā paṃcabhūtādhidevatā || 115 ||
sarvapramāṇā saṃpattissarvarogapratikriyā |
brahmāṃḍāṃtarbahirvyāptā viṣṇuvakṣovibhūṣiṇī || 116 ||
śāṃkarī vidhivaktrasthā pravarā varahetukī |
hemamālā śikhāmālā triśikhā paṃcalocanā || 117 || [ paṃcamocanā ]
sarvāgamasadācāramaryādā yātubhaṃjanī |
puṇyaślokaprabaṃdhāḍhyā sarvāṃtaryāmirūpiṇī || 118 ||
sāmagānasamārādhyā śrotrakarṇarasāyanam |
jīvalokaikajīvāturbhadrodāravilokanā || 119 ||
taṭitkoṭilasatkāṃtistaruṇī harisuṃdarī |
mīnanetrā ca seṃdrākṣī viśālākṣī sumaṃgaḻā || 120 ||
sarvamaṃgaḻasaṃpannā sākṣānmaṃgaḻadevatā |
dehahṛddīpikā dīptirjihvapāpapraṇāśinī || 121 ||
ardhacaṃdrollasaddaṃṣṭrā yajñavāṭīvilāsinī |
mahādurgā mahotsāhā mahādevabalodayā || 122 ||
ḍākinīḍyā śākinīḍyā sākinīḍyā samastajuṭ |
niraṃkuśā nākivaṃdyā ṣaḍādhārādhidevatā || 123 ||
bhuvanajñāniniśśreṇī bhuvanākāravallarī |
śāśvatī śāśvatākārā lokānugrahakāriṇī || 124 ||
sārasī mānasī haṃsī haṃsalokapradāyinī |
cinmudrālaṃkṛtakarā koṭisūryasamaprabhā || 125 ||
sukhaprāṇiśirorekhā sadadṛṣṭapradāyinī |
sarvasāṃkaryadoṣaghnī grahopadravanāśinī || 126 ||
kṣudrajaṃtubhayaghnī ca viṣarogādibhaṃjanī |
sadāśāṃtā sadāśuddhā gṛhacchidranivāriṇī || 127 ||
kalidoṣapraśamanī kolāhalapurasthitā |
gaurī lākṣaṇikī mukhyā jaghanyākṛtivarjitā || 128 ||
māyā vidyā mūlabhūtā vāsavī viṣṇucetanā |
vādinī vasurūpā ca vasuratnaparicchadā || 129 ||
chāṃdasī caṃdrahṛdayā maṃtrasvacchaṃdabhairavī |
vanamālā vaijayaṃtī paṃcadivyāyudhātmikā || 130 ||
pītāṃbaramayī caṃcatkaustubhā harikāminī |
nityā tathyā ramā rāmā ramaṇī mṛtyubhaṃjanī || 131 ||
jyeṣṭhā kāṣṭhā dhaniṣṭhāṃtā śarāṃgī nirguṇapriyā |
maitreyā mitraviṃdā ca śeṣyaśeṣakalāśayā || 132 ||
vārāṇasīvāsalabhyā cāryāvartajanastutā | [ vārāṇasīvāsaratā ]
jagadutpattisaṃsthānasaṃhāratrayakāraṇam || 133 ||
tvamaṃba viṣṇusarvasvaṃ namaste’stu maheśvari |
namaste sarvalokānāṃ jananyai puṇyamūrtaye || 134 ||
siddhalakṣmīrmahākāḻi mahalakṣmi namo’stu te |
sadyojātādipaṃcāgnirūpā paṃcakapaṃcakam || 135 ||
yaṃtralakṣmīrbhavatyādirādyādye te namo namaḥ |
sṛṣṭyādikāraṇākāravitate doṣavarjite || 136 ||
jagallakṣmīrjaganmātarviṣṇupatni namo’stu te |
navakoṭimahāśaktisamupāsyapadāṃbuje || 137 ||
kanatsauvarṇaratnāḍhya sarvābharaṇabhūṣite |
anaṃtānityamahiṣīprapaṃceśvaranāyaki || 138 ||
atyucchritapadāṃtasthe paramavyomanāyaki |
nākapṛṣṭhagatārādhye viṣṇulokavilāsini || 139 ||
vaikuṃṭharājamahiṣi śrīraṃganagarāśrite |
raṃganāyaki bhūputri kṛṣṇe varadavallabhe || 140 ||
koṭibrahmādisaṃsevye koṭirudrādikīrtite |
mātuluṃgamayaṃ kheṭaṃ sauvarṇacaṣakaṃ tathā || 141 ||
padmadvayaṃ pūrṇakuṃbhaṃ kīraṃca varadābhaye |
pāśamaṃkuśakaṃ śaṃkhaṃ cakraṃ śūlaṃ kṛpāṇikām || 142 ||
dhanurbāṇau cākṣamālāṃ cinmudrāmapi bibhratī |
aṣṭādaśabhuje lakṣmīrmahāṣṭādaśapīṭhage || 143 ||
bhūminīlādisaṃsevye svāmicittānuvartini |
padme padmālaye padmi pūrṇakuṃbhābhiṣecite || 144 ||
iṃdireṃdiṃdirābhākṣi kṣīrasāgarakanyake |
bhārgavi tvaṃ svataṃtrecchā vaśīkṛtajagatpatiḥ || 145 ||
maṃgaḻaṃ maṃgaḻānāṃ tvaṃ devatānāṃ ca devatā |
tvamuttamottamānāṃ ca tvaṃ śreyaḥ paramāmṛtam || 146 ||
dhanadhānyābhivṛddhiśca sārvabhaumasukhocchrayā |
āṃdoḻikādisaubhāgyaṃ mattebhādimahodayaḥ || 147 ||
putrapautrābhivṛddhiśca vidyābhogabalādikam |
āyurārogyasaṃpattiraṣṭaiśvaryaṃ tvameva hi || 148 ||
parameśavibhūtiśca sūkṣmātsūkṣmatarāgatiḥ |
sadayāpāṃgasaṃdattabrahmeṃdrādipadasthitiḥ || 149 ||
avyāhatamahābhāgyaṃ tvamevākṣobhyavikramaḥ |
samanvayaśca vedānāmavirodhastvameva hi || 150 ||
niḥśreyasapadaprāptisādhanaṃ phalameva ca |
śrīmaṃtrarājarājñī ca śrīvidyā kṣemakāriṇī || 151 ||
śrīṃbījajapasaṃtuṣṭā aiṃ hrīṃ śrīṃ bījapālikā |
prapattimārgasulabhā viṣṇuprathamakiṃkarī || 152 ||
klīṃkārārthasavitrī ca saumaṃgaḻyādhidevatā |
śrīṣoḍaśākṣarīvidyā śrīyaṃtrapuravāsinī || 153 ||
sarvamaṃgaḻamāṃgaḻye śive sarvārthasādhike |
śaraṇye tryaṃbake gaurī nārāyaṇi namo’stu te || 154 ||
punaḥ punarnamaste’stu sāṣṭāṃgamayutaṃ punaḥ |
sanatkumāra uvāca-
evaṃ stutā mahālakṣmīrbrahmarudrādibhissuraiḥ |
namadbhirārtairdīnaiśca nissvatvairbhogavarjitaiḥ || 1 ||
jyeṣṭhā juṣṭaiśca niśśrīkaissaṃsārātsvaparāyaṇaiḥ |
viṣṇupatnī dadau teṣāṃ darśanaṃ dṛṣṭitarpaṇam || 2 ||
śaratpūrṇeṃdukoṭyābhadhavaḻāpāṃgavīkṣaṇaiḥ |
sarvānsattvasamāviṣṭān cakre hṛṣṭā varaṃ dadau || 3 ||
mahālakṣmīruvāca-
nāmnāṃ sāṣṭasahasraṃ me pramādādvāpi yassakṛt |
kīrtayettatkule satyaṃ vasāmyācaṃdratārakam || 4 ||
kiṃ punarniyamājjapturmadekaśaraṇasya ca |
mātṛvatsānukaṃpāhaṃ poṣakī syāmaharniśam || 5 ||
mannāma stavatāṃ loke durlabhaṃ nāsti ciṃtitam |
matprasādena sarve’pi svasveṣṭārthamavāpsyatha || 6 ||
luptavaiṣṇavadharmasya madvrateṣvavakīrṇinaḥ |
bhaktiprapattihīnasya vaṃdyo nāmnāṃ stavo’pi me || 7 ||
tasmādavaśyaṃ tairdoṣairvihīnaḥ pāpavarjitaḥ |
japetsāṣṭasahasraṃ me nāmnāṃ pratyahamādarāt || 8 ||
sākṣādalakṣmīputro’pi durbhāgyo’pyalaso’pi vā |
aprayatno’pi mūḍho’pi vikalaḥ patito’pi ca || 9 ||
avaśyaṃ prāpnuyādbhāgyaṃ matprasādena kevalam |
spṛheyamacirāddevā varadānāya jāpinaḥ |
dadāmi sarvamiṣṭārthaṃ lakṣmīti smaratāṃ dhruvam || 10 ||
sanatkumāra uvāca-
ityuktvā’ṃtardadhe lakṣmīrvaiṣṇavī bhagavatkalā |
iṣṭāpūrtaṃ ca sukṛtaṃ bhāgadheyaṃ ca ciṃtitam || 11 ||
svaṃ svaṃ sthānaṃ ca bhogaṃ ca vijayaṃ lebhire surāḥ |
tadetat pravadāmyadya lakṣmīnāmasahasrakam |
yoginaḥ paṭhata kṣipraṃ ciṃtitārthānavāpsyatha || 12 ||
gārgya uvāca-
sanatkumāroyogīṃdra ityuktvā sa dayānidhiḥ |
anugṛhya yayau kṣipraṃ tāṃśca dvādaśayoginaḥ || 13 ||
tasmādetadrahasyaṃ ca gopyaṃ japyaṃ prayatnataḥ |
aṣṭamyāṃ ca caturdaśyāṃ navamyāṃ bhṛguvāsare || 14 ||
paurṇamāsyāmamāyāṃ ca parvakāle viśeṣataḥ |
japedvā nityakāryeṣu sarvānkāmānavāpnuyāt || 15 ||
iti śrīskaṃdapurāṇe sanatkumārasaṃhitāyāṃ lakṣmīsahasranāmastotraṃ saṃpūrṇam
