śrī lalitā sahasra nāma stotraṃ
asya śrī lalitā divya sahasranāma stotra mahāmaṃtrasya, vaśinyādi vāgdevatā ṛṣayaḥ, anuṣṭup chaṃdaḥ, śrī lalitā parābhaṭṭārikā mahā tripura suṃdarī devatā, aiṃ bījaṃ, klīṃ śaktiḥ, sauḥ kīlakaṃ, mama dharmārtha kāma mokṣa caturvidha phalapuruṣārtha siddhyarthe lalitā tripurasuṃdarī parābhaṭṭārikā sahasra nāma jape viniyogaḥ
karanyāsaḥ
aiṃ aṃguṣṭhābhyāṃ namaḥ, klīṃ tarjanībhyāṃ namaḥ, sauḥ madhyamābhyāṃ namaḥ, sauḥ anāmikābhyāṃ namaḥ, klīṃ kaniṣṭhikābhyāṃ namaḥ, aiṃ karatala karapṛṣṭhābhyāṃ namaḥ
aṃganyāsaḥ
aiṃ hṛdayāya namaḥ, klīṃ śirase svāhā, sauḥ śikhāyai vaṣaṭ, sauḥ kavacāya huṃ, klīṃ netratrayāya vauṣaṭ, aiṃ astrāyaphaṭ, bhūrbhuvassuvaromiti digbaṃdhaḥ
dhyānaṃ
aruṇāṃ karuṇā taraṃgitākṣīṃ dhṛtapāśāṃkuśa puṣpabāṇacāpām |
aṇimādibhi rāvṛtāṃ mayūkhaiḥ ahamityeva vibhāvaye bhavānīm || 1 ||
dhyāyet padmāsanasthāṃ vikasitavadanāṃ padma patrāyatākṣīṃ
hemābhāṃ pītavastrāṃ karakalita lasaddhemapadmāṃ varāṃgīm |
sarvālaṃkārayuktāṃ sakalamabhayadāṃ bhaktanamrāṃ bhavānīṃ
śrī vidyāṃ śāṃtamūrtiṃ sakala suranutāṃ sarvasaṃpat-pradātrīm || 2 ||
sakuṃkuma vilepanā maḻikacuṃbi kastūrikāṃ
samaṃda hasitekṣaṇāṃ saśaracāpa pāśāṃkuśām |
aśeṣa janamohinī maruṇamālya bhūṣojjvalāṃ
japākusuma bhāsurāṃ japavidhau smare daṃbikām || 3 ||
siṃdhūrāruṇa vigrahāṃ triṇayanāṃ māṇikya mauḻisphura-
ttārānāyaka śekharāṃ smitamukhī māpīna vakṣoruhām |
pāṇibhyā malipūrṇa ratna caṣakaṃ raktotpalaṃ bibhratīṃ
saumyāṃ ratnaghaṭastha rakta caraṇāṃ dhyāyetparāmaṃbikām || 4 ||
lamityādi paṃcapūjāṃ vibhāvayet
laṃ pṛthivī tattvātmikāyai śrī lalitādevyai gaṃdhaṃ parikalpayāmi
haṃ ākāśa tattvātmikāyai śrī lalitādevyai puṣpaṃ parikalpayāmi
yaṃ vāyu tattvātmikāyai śrī lalitādevyai dhūpaṃ parikalpayāmi
raṃ vahni tattvātmikāyai śrī lalitādevyai dīpaṃ parikalpayāmi
vaṃ amṛta tattvātmikāyai śrī lalitādevyai amṛta naivedyaṃ parikalpayāmi
saṃ sarva tattvātmikāyai śrī lalitādevyai tāṃbūlādi sarvopacārān parikalpayāmi
gururbrahmā gururviṣṇuḥ gururdevo maheśvaraḥ |
gurussākṣāt parabrahma tasmai śrī gurave namaḥ ||
hariḥ oṃ
śrīmātā, śrīmahārājñī, śrīmat-siṃhāsaneśvarī |
cidagni-kuṃḍa-saṃbhūtā, devakārya-samudyatā || 1 ||
udyadbhānu-sahasrābhā, caturbāhu-samanvitā |
rāgasvarūpa-pāśāḍhyā, krodhākārāṃkuśojjvalā || 2 ||
manorūpekṣu-kodaṃḍā, paṃcatanmātra-sāyakā |
nijāruṇa prabhāpūra majjad-brahmāṃḍamaṃḍalā || 3 ||
caṃpakāśoka punnāga saugaṃdhika lasatkacā
kuruviṃda maṇiśreṇī kanatkoṭīra maṃḍitā || 4 ||
aṣṭamī caṃdra vibhrāja daḻikasthala śobhitā |
mukhacaṃdra kaḻaṃkābha mṛganābhi viśeṣakā || 5 ||
vadanasmara māṃgalya gṛhatoraṇa cillikā |
vaktralakṣmī parīvāha calanmīnābha locanā || 6 ||
navacaṃpaka puṣpābha nāsādaṃḍa virājitā |
tārākāṃti tiraskāri nāsābharaṇa bhāsurā || 7 ||
kadaṃba maṃjarīkḷpta karṇapūra manoharā |
tāṭaṃka yugaḻībhūta tapanoḍupa maṃḍalā || 8 ||
padmarāga śilādarśa paribhāvi kapolabhūḥ |
navavidruma biṃbaśrī nyakkāri radanacchadā || 9 ||
śuddha vidyāṃkurākāra dvijapaṃkti dvayojjvalā |
karpūravīṭi kāmoda samākarṣaddigaṃtarā || 10 ||
nijasallāpa mādhurya vinirbhartsita kacchapī |
maṃdasmita prabhāpūra majjat-kāmeśa mānasā || 11 ||
anākalita sādṛśya cubuka śrī virājitā | [cibuka]
kāmeśabaddha māṃgalya sūtraśobhita kaṃdharā || 12 ||
kanakāṃgada keyūra kamanīya bhujānvitā |
ratnagraiveya ciṃtāka lolamuktā phalānvitā || 13 ||
kāmeśvara premaratna maṇi pratipaṇastanī|
nābhyālavāla romāḻi latāphala kucadvayī || 14 ||
lakṣyaromalatā dhāratā samunneya madhyamā |
stanabhāra daḻan-madhya paṭṭabaṃdha vaḻitrayā || 15 ||
aruṇāruṇa kausuṃbha vastra bhāsvat-kaṭītaṭī |
ratnakiṃkiṇi kāramya raśanādāma bhūṣitā || 16 ||
kāmeśa jñāta saubhāgya mārdavoru dvayānvitā |
māṇikya makuṭākāra jānudvaya virājitā || 17 ||
iṃdragopa parikṣipta smara tūṇābha jaṃghikā |
gūḍhagulphā kūrmapṛṣṭha jayiṣṇu prapadānvitā || 18 ||
nakhadīdhiti saṃchanna namajjana tamoguṇā |
padadvaya prabhājāla parākṛta saroruhā || 19 ||
śiṃjāna maṇimaṃjīra maṃḍita śrī padāṃbujā |
marāḻī maṃdagamanā, mahālāvaṇya śevadhiḥ || 20 ||
sarvāruṇā’navadyāṃgī sarvābharaṇa bhūṣitā |
śivakāmeśvarāṃkasthā, śivā, svādhīna vallabhā || 21 ||
sumeru madhyaśṛṃgasthā, śrīmannagara nāyikā |
ciṃtāmaṇi gṛhāṃtasthā, paṃcabrahmāsanasthitā || 22 ||
mahāpadmāṭavī saṃsthā, kadaṃba vanavāsinī |
sudhāsāgara madhyasthā, kāmākṣī kāmadāyinī || 23 ||
devarṣi gaṇasaṃghāta stūyamānātma vaibhavā |
bhaṃḍāsura vadhodyukta śaktisenā samanvitā || 24 ||
saṃpatkarī samārūḍha siṃdhura vrajasevitā |
aśvārūḍhādhiṣṭhitāśva koṭikoṭi bhirāvṛtā || 25 ||
cakrarāja rathārūḍha sarvāyudha pariṣkṛtā |
geyacakra rathārūḍha maṃtriṇī parisevitā || 26 ||
kiricakra rathārūḍha daṃḍanāthā puraskṛtā |
jvālāmālini kākṣipta vahniprākāra madhyagā || 27 ||
bhaṃḍasainya vadhodyukta śakti vikramaharṣitā |
nityā parākramāṭopa nirīkṣaṇa samutsukā || 28 ||
bhaṃḍaputra vadhodyukta bālāvikrama naṃditā |
maṃtriṇyaṃbā viracita viṣaṃga vadhatoṣitā || 29 || [viśukra]
viśukra prāṇaharaṇa vārāhī vīryanaṃditā | [viṣaṃga]
kāmeśvara mukhāloka kalpita śrī gaṇeśvarā || 30 ||
mahāgaṇeśa nirbhinna vighnayaṃtra praharṣitā |
bhaṃḍāsureṃdra nirmukta śastra pratyastra varṣiṇī || 31 ||
karāṃguḻi nakhotpanna nārāyaṇa daśākṛtiḥ |
mahāpāśupatāstrāgni nirdagdhāsura sainikā || 32 ||
kāmeśvarāstra nirdagdha sabhaṃḍāsura śūnyakā |
brahmopeṃdra maheṃdrādi devasaṃstuta vaibhavā || 33 ||
haranetrāgni saṃdagdha kāma saṃjīvanauṣadhiḥ |
śrīmadvāgbhava kūṭaika svarūpa mukhapaṃkajā || 34 ||
kaṃṭhādhaḥ kaṭiparyaṃta madhyakūṭa svarūpiṇī |
śaktikūṭaika tāpanna kaṭyadhobhāga dhāriṇī || 35 ||
mūlamaṃtrātmikā, mūlakūṭa traya kaḻevarā |
kuḻāmṛtaika rasikā, kuḻasaṃketa pālinī || 36 ||
kuḻāṃganā, kuḻāṃtaḥsthā, kauḻinī, kuḻayoginī |
akuḻā, samayāṃtaḥsthā, samayācāra tatparā || 37 ||
mūlādhāraika nilayā, brahmagraṃthi vibhedinī |
maṇipūrāṃta ruditā, viṣṇugraṃthi vibhedinī || 38 ||
ājñā cakrāṃtarāḻasthā, rudragraṃthi vibhedinī |
sahasrārāṃbujā rūḍhā, sudhāsārābhi varṣiṇī || 39 ||
taṭillatā samaruciḥ, ṣaṭ-cakropari saṃsthitā | [taḍillatā]
mahāśaktiḥ, kuṃḍalinī, bisataṃtu tanīyasī || 40 ||
bhavānī, bhāvanāgamyā, bhavāraṇya kuṭhārikā |
bhadrapriyā, bhadramūrti, rbhaktasaubhāgya dāyinī || 41 ||
bhaktipriyā, bhaktigamyā, bhaktivaśyā, bhayāpahā |
śāṃbhavī, śāradārādhyā, śarvāṇī, śarmadāyinī || 42 ||
śāṃkarī, śrīkarī, sādhvī, śaraccaṃdranibhānanā |
śātodarī, śāṃtimatī, nirādhārā, niraṃjanā || 43 ||
nirlepā, nirmalā, nityā, nirākārā, nirākulā |
nirguṇā, niṣkaḻā, śāṃtā, niṣkāmā, nirupaplavā || 44 ||
nityamuktā, nirvikārā, niṣprapaṃcā, nirāśrayā |
nityaśuddhā, nityabuddhā, niravadyā, niraṃtarā || 45 ||
niṣkāraṇā, niṣkaḻaṃkā, nirupādhi, rnirīśvarā |
nīrāgā, rāgamathanī, nirmadā, madanāśinī || 46 ||
niściṃtā, nirahaṃkārā, nirmohā, mohanāśinī |
nirmamā, mamatāhaṃtrī, niṣpāpā, pāpanāśinī || 47 ||
niṣkrodhā, krodhaśamanī, nirlobhā, lobhanāśinī |
niḥsaṃśayā, saṃśayaghnī, nirbhavā, bhavanāśinī || 48 ||
nirvikalpā, nirābādhā, nirbhedā, bhedanāśinī |
nirnāśā, mṛtyumathanī, niṣkriyā, niṣparigrahā || 49 ||
nistulā, nīlacikurā, nirapāyā, niratyayā |
durlabhā, durgamā, durgā, duḥkhahaṃtrī, sukhapradā || 50 ||
duṣṭadūrā, durācāra śamanī, doṣavarjitā |
sarvajñā, sāṃdrakaruṇā, samānādhikavarjitā || 51 ||
sarvaśaktimayī, sarvamaṃgaḻā, sadgatipradā |
sarveśvarī, sarvamayī, sarvamaṃtra svarūpiṇī || 52 ||
sarvayaṃtrātmikā, sarvataṃtrarūpā, manonmanī |
māheśvarī, mahādevī, mahālakṣmī, rmṛḍapriyā || 53 ||
mahārūpā, mahāpūjyā, mahāpātaka nāśinī |
mahāmāyā, mahāsattvā, mahāśakti rmahāratiḥ || 54 ||
mahābhogā, mahaiśvaryā, mahāvīryā, mahābalā |
mahābuddhi, rmahāsiddhi, rmahāyogeśvareśvarī || 55 ||
mahātaṃtrā, mahāmaṃtrā, mahāyaṃtrā, mahāsanā |
mahāyāga kramārādhyā, mahābhairava pūjitā || 56 ||
maheśvara mahākalpa mahātāṃḍava sākṣiṇī |
mahākāmeśa mahiṣī, mahātripura suṃdarī || 57 ||
catuḥṣaṣṭyupacārāḍhyā, catuṣṣaṣṭi kaḻāmayī |
mahā catuṣṣaṣṭi koṭi yoginī gaṇasevitā || 58 ||
manuvidyā, caṃdravidyā, caṃdramaṃḍalamadhyagā |
cārurūpā, cāruhāsā, cārucaṃdra kaḻādharā || 59 ||
carācara jagannāthā, cakrarāja niketanā |
pārvatī, padmanayanā, padmarāga samaprabhā || 60 ||
paṃcapretāsanāsīnā, paṃcabrahma svarūpiṇī |
cinmayī, paramānaṃdā, vijñāna ghanarūpiṇī || 61 ||
dhyānadhyātṛ dhyeyarūpā, dharmādharma vivarjitā |
viśvarūpā, jāgariṇī, svapaṃtī, taijasātmikā || 62 ||
suptā, prājñātmikā, turyā, sarvāvasthā vivarjitā |
sṛṣṭikartrī, brahmarūpā, goptrī, goviṃdarūpiṇī || 63 ||
saṃhāriṇī, rudrarūpā, tirodhānakarīśvarī |
sadāśivānugrahadā, paṃcakṛtya parāyaṇā || 64 ||
bhānumaṃḍala madhyasthā, bhairavī, bhagamālinī |
padmāsanā, bhagavatī, padmanābha sahodarī || 65 ||
unmeṣa nimiṣotpanna vipanna bhuvanāvaḻiḥ |
sahasraśīrṣavadanā, sahasrākṣī, sahasrapāt || 66 ||
ābrahma kīṭajananī, varṇāśrama vidhāyinī |
nijājñārūpanigamā, puṇyāpuṇya phalapradā || 67 ||
śruti sīmaṃta siṃdhūrīkṛta pādābjadhūḻikā |
sakalāgama saṃdoha śuktisaṃpuṭa mauktikā || 68 ||
puruṣārthapradā, pūrṇā, bhoginī, bhuvaneśvarī |
aṃbikā,’nādi nidhanā, haribrahmeṃdra sevitā || 69 ||
nārāyaṇī, nādarūpā, nāmarūpa vivarjitā |
hrīṃkārī, hrīmatī, hṛdyā, heyopādeya varjitā || 70 ||
rājarājārcitā, rājñī, ramyā, rājīvalocanā |
raṃjanī, ramaṇī, rasyā, raṇatkiṃkiṇi mekhalā || 71 ||
ramā, rākeṃduvadanā, ratirūpā, ratipriyā |
rakṣākarī, rākṣasaghnī, rāmā, ramaṇalaṃpaṭā || 72 ||
kāmyā, kāmakaḻārūpā, kadaṃba kusumapriyā |
kaḻyāṇī, jagatīkaṃdā, karuṇārasa sāgarā || 73 ||
kaḻāvatī, kaḻālāpā, kāṃtā, kādaṃbarīpriyā |
varadā, vāmanayanā, vāruṇīmadavihvalā || 74 ||
viśvādhikā, vedavedyā, viṃdhyācala nivāsinī |
vidhātrī, vedajananī, viṣṇumāyā, vilāsinī || 75 ||
kṣetrasvarūpā, kṣetreśī, kṣetra kṣetrajña pālinī |
kṣayavṛddhi vinirmuktā, kṣetrapāla samarcitā || 76 ||
vijayā, vimalā, vaṃdyā, vaṃdāru janavatsalā |
vāgvādinī, vāmakeśī, vahnimaṃḍala vāsinī || 77 ||
bhaktimat-kalpalatikā, paśupāśa vimocanī |
saṃhṛtāśeṣa pāṣaṃḍā, sadācāra pravartikā || 78 ||
tāpatrayāgni saṃtapta samāhlādana caṃdrikā |
taruṇī, tāpasārādhyā, tanumadhyā, tamo’pahā || 79 ||
citi, statpadalakṣyārthā, cideka rasarūpiṇī |
svātmānaṃdalavībhūta brahmādyānaṃda saṃtatiḥ || 80 ||
parā, pratyakcitī rūpā, paśyaṃtī, paradevatā |
madhyamā, vaikharīrūpā, bhaktamānasa haṃsikā || 81 ||
kāmeśvara prāṇanāḍī, kṛtajñā, kāmapūjitā |
śṛṃgāra rasasaṃpūrṇā, jayā, jālaṃdharasthitā || 82 ||
oḍyāṇa pīṭhanilayā, biṃdumaṃḍala vāsinī |
rahoyāga kramārādhyā, rahastarpaṇa tarpitā || 83 ||
sadyaḥ prasādinī, viśvasākṣiṇī, sākṣivarjitā |
ṣaḍaṃgadevatā yuktā, ṣāḍguṇya paripūritā || 84 ||
nityaklinnā, nirupamā, nirvāṇa sukhadāyinī |
nityā, ṣoḍaśikārūpā, śrīkaṃṭhārdha śarīriṇī || 85 ||
prabhāvatī, prabhārūpā, prasiddhā, parameśvarī |
mūlaprakṛti ravyaktā, vyaktā’vyakta svarūpiṇī || 86 ||
vyāpinī, vividhākārā, vidyā’vidyā svarūpiṇī |
mahākāmeśa nayanā kumudāhlāda kaumudī || 87 ||
bhaktahārda tamobheda bhānumad-bhānusaṃtatiḥ |
śivadūtī, śivārādhyā, śivamūrti, śśivaṃkarī || 88 ||
śivapriyā, śivaparā, śiṣṭeṣṭā, śiṣṭapūjitā |
aprameyā, svaprakāśā, manovācāma gocarā || 89 ||
cicchakti, ścetanārūpā, jaḍaśakti, rjaḍātmikā |
gāyatrī, vyāhṛti, ssaṃdhyā, dvijabṛṃda niṣevitā || 90 || [dvijavṛṃda]
tattvāsanā, tattvamayī, paṃcakośāṃtarasthitā |
nissīmamahimā, nityayauvanā, madaśālinī || 91 ||
madaghūrṇita raktākṣī, madapāṭala gaṃḍabhūḥ |
caṃdana dravadigdhāṃgī, cāṃpeya kusuma priyā || 92 ||
kuśalā, komalākārā, kurukuḻḻā, kuleśvarī |
kuḻakuṃḍālayā, kauḻa mārgatatpara sevitā || 93 ||
kumāra gaṇanāthāṃbā, tuṣṭiḥ, puṣṭi, rmati, rdhṛtiḥ |
śāṃtiḥ, svastimatī, kāṃti, rnaṃdinī, vighnanāśinī || 94 ||
tejovatī, trinayanā, lolākṣī kāmarūpiṇī |
mālinī, haṃsinī, mātā, malayācala vāsinī || 95 ||
sumukhī, naḻinī, subhrūḥ, śobhanā, suranāyikā |
kālakaṃṭhī, kāṃtimatī, kṣobhiṇī, sūkṣmarūpiṇī || 96 ||
vajreśvarī, vāmadevī, vayo’vasthā vivarjitā |
siddheśvarī, siddhavidyā, siddhamātā, yaśasvinī || 97 ||
viśuddhi cakranilayā,”raktavarṇā, trilocanā |
khaṭvāṃgādi praharaṇā, vadanaika samanvitā || 98 ||
pāyasānnapriyā, tvaksthā, paśuloka bhayaṃkarī |
amṛtādi mahāśakti saṃvṛtā, ḍākinīśvarī || 99 ||
anāhatābja nilayā, śyāmābhā, vadanadvayā |
daṃṣṭrojjvalā,’kṣamālādidharā, rudhira saṃsthitā || 100 ||
kāḻarātryādi śaktyaughavṛtā, snigdhaudanapriyā |
mahāvīreṃdra varadā, rākiṇyaṃbā svarūpiṇī || 101 ||
maṇipūrābja nilayā, vadanatraya saṃyutā |
vajrādikāyudhopetā, ḍāmaryādibhi rāvṛtā || 102 ||
raktavarṇā, māṃsaniṣṭhā, guḍānna prītamānasā |
samasta bhaktasukhadā, lākinyaṃbā svarūpiṇī || 103 ||
svādhiṣṭhānāṃbujagatā, caturvaktra manoharā |
śūlādyāyudha saṃpannā, pītavarṇā,’tigarvitā || 104 ||
medoniṣṭhā, madhuprītā, baṃdinyādi samanvitā | [baṃdhinyādi]
dadhyannāsakta hṛdayā, kākinī-rūpadhāriṇī || 105 ||
mūlādhārāṃbujārūḍhā, paṃcavaktrā,’sthisaṃsthitā |
aṃkuśādi praharaṇā, varadādi niṣevitā || 106 ||
mudgaudanāsakta cittā, sākinyaṃbāsvarūpiṇī |
ājñā cakrābjanilayā, śuklavarṇā, ṣaḍānanā || 107 ||
majjāsaṃsthā, haṃsavatī-mukhyaśakti-samanvitā |
haridrānnaika rasikā, hākinī-rūpadhāriṇī || 108 ||
sahasradaḻa padmasthā, sarvavarṇopa śobhitā |
sarvāyudhadharā, śukla saṃsthitā, sarvatomukhī || 109 ||
sarvaudana prītacittā, yākinyaṃbā svarūpiṇī |
svāhā, svadhā,’mati, rmedhā, śrutiḥ, smṛti, ranuttamā || 110 ||
puṇyakīrtiḥ, puṇyalabhyā, puṇyaśravaṇa kīrtanā |
pulomajārcitā, baṃdhamocanī, baṃdhurālakā || 111 ||
vimarśarūpiṇī, vidyā, viyadādi jagatprasūḥ |
sarvavyādhi praśamanī, sarvamṛtyu nivāriṇī || 112 ||
agragaṇyā,’ciṃtyarūpā, kalikalmaṣa nāśinī |
kātyāyanī, kālahaṃtrī, kamalākṣa niṣevitā || 113 ||
tāṃbūla pūrita mukhī, dāḍimī kusumaprabhā |
mṛgākṣī, mohinī, mukhyā, mṛḍānī, mitrarūpiṇī || 114 ||
nityatṛptā, bhaktanidhi, rniyaṃtrī, nikhileśvarī |
maitryādi vāsanālabhyā, mahāpraḻaya sākṣiṇī || 115 ||
parāśaktiḥ, parāniṣṭhā, prajñāna ghanarūpiṇī |
mādhvīpānālasā, mattā, mātṛkā varṇa rūpiṇī || 116 ||
mahākailāsa nilayā, mṛṇāla mṛdudorlatā |
mahanīyā, dayāmūrti, rmahāsāmrājyaśālinī || 117 ||
ātmavidyā, mahāvidyā, śrīvidyā, kāmasevitā |
śrīṣoḍaśākṣarī vidyā, trikūṭā, kāmakoṭikā || 118 ||
kaṭākṣakiṃkarī bhūta kamalā koṭisevitā |
śiraḥsthitā, caṃdranibhā, phālastheṃdra dhanuḥprabhā || 119 || [bhālastheṃdra]
hṛdayasthā, raviprakhyā, trikoṇāṃtara dīpikā |
dākṣāyaṇī, daityahaṃtrī, dakṣayajña vināśinī || 120 ||
darāṃdoḻita dīrghākṣī, darahāsojjvalanmukhī |
gurumūrti, rguṇanidhi, rgomātā, guhajanmabhūḥ || 121 ||
deveśī, daṃḍanītisthā, daharākāśa rūpiṇī |
pratipanmukhya rākāṃta tithimaṃḍala pūjitā || 122 ||
kaḻātmikā, kaḻānāthā, kāvyālāpa vinodinī |
sacāmara ramāvāṇī savyadakṣiṇa sevitā || 123 ||
ādiśakti, rameyā,”tmā, paramā, pāvanākṛtiḥ |
anekakoṭi brahmāṃḍa jananī, divyavigrahā || 124 ||
klīṃkārī, kevalā, guhyā, kaivalya padadāyinī |
tripurā, trijagadvaṃdyā, trimūrti, stridaśeśvarī || 125 ||
tryakṣarī, divyagaṃdhāḍhyā, siṃdhūra tilakāṃcitā |
umā, śaileṃdratanayā, gaurī, gaṃdharva sevitā || 126 ||
viśvagarbhā, svarṇagarbhā,’varadā vāgadhīśvarī |
dhyānagamyā,’paricchedyā, jñānadā, jñānavigrahā || 127 ||
sarvavedāṃta saṃvedyā, satyānaṃda svarūpiṇī |
lopāmudrārcitā, līlākḷpta brahmāṃḍamaṃḍalā || 128 ||
adṛśyā, dṛśyarahitā, vijñātrī, vedyavarjitā |
yoginī, yogadā, yogyā, yogānaṃdā, yugaṃdharā || 129 ||
icchāśakti jñānaśakti kriyāśakti svarūpiṇī |
sarvādhārā, supratiṣṭhā, sadasad-rūpadhāriṇī || 130 ||
aṣṭamūrti, rajājaitrī, lokayātrā vidhāyinī |
ekākinī, bhūmarūpā, nirdvaitā, dvaitavarjitā || 131 ||
annadā, vasudā, vṛddhā, brahmātmaikya svarūpiṇī |
bṛhatī, brāhmaṇī, brāhmī, brahmānaṃdā, balipriyā || 132 ||
bhāṣārūpā, bṛhatsenā, bhāvābhāva vivarjitā |
sukhārādhyā, śubhakarī, śobhanā sulabhāgatiḥ || 133 ||
rājarājeśvarī, rājyadāyinī, rājyavallabhā |
rājat-kṛpā, rājapīṭha niveśita nijāśritā || 134 ||
rājyalakṣmīḥ, kośanāthā, caturaṃga baleśvarī |
sāmrājyadāyinī, satyasaṃdhā, sāgaramekhalā || 135 ||
dīkṣitā, daityaśamanī, sarvaloka vaśaṃkarī |
sarvārthadātrī, sāvitrī, saccidānaṃda rūpiṇī || 136 ||
deśakālā’paricchinnā, sarvagā, sarvamohinī |
sarasvatī, śāstramayī, guhāṃbā, guhyarūpiṇī || 137 ||
sarvopādhi vinirmuktā, sadāśiva pativratā |
saṃpradāyeśvarī, sādhvī, gurumaṃḍala rūpiṇī || 138 ||
kulottīrṇā, bhagārādhyā, māyā, madhumatī, mahī |
gaṇāṃbā, guhyakārādhyā, komalāṃgī, gurupriyā || 139 ||
svataṃtrā, sarvataṃtreśī, dakṣiṇāmūrti rūpiṇī |
sanakādi samārādhyā, śivajñāna pradāyinī || 140 ||
citkaḻā,”naṃdakalikā, premarūpā, priyaṃkarī |
nāmapārāyaṇa prītā, naṃdividyā, naṭeśvarī || 141 ||
mithyā jagadadhiṣṭhānā muktidā, muktirūpiṇī |
lāsyapriyā, layakarī, lajjā, raṃbhādi vaṃditā || 142 ||
bhavadāva sudhāvṛṣṭiḥ, pāpāraṇya davānalā |
daurbhāgyatūla vātūlā, jarādhvāṃta raviprabhā || 143 ||
bhāgyābdhicaṃdrikā, bhaktacittakeki ghanāghanā |
rogaparvata daṃbhoḻi, rmṛtyudāru kuṭhārikā || 144 ||
maheśvarī, mahākāḻī, mahāgrāsā, mahā’śanā |
aparṇā, caṃḍikā, caṃḍamuṃḍā’sura niṣūdinī || 145 ||
kṣarākṣarātmikā, sarvalokeśī, viśvadhāriṇī |
trivargadātrī, subhagā, tryaṃbakā, triguṇātmikā || 146 ||
svargāpavargadā, śuddhā, japāpuṣpa nibhākṛtiḥ |
ojovatī, dyutidharā, yajñarūpā, priyavratā || 147 ||
durārādhyā, durādharṣā, pāṭalī kusumapriyā |
mahatī, merunilayā, maṃdāra kusumapriyā || 148 ||
vīrārādhyā, virāḍrūpā, virajā, viśvatomukhī |
pratyagrūpā, parākāśā, prāṇadā, prāṇarūpiṇī || 149 ||
mārtāṃḍa bhairavārādhyā, maṃtriṇī nyastarājyadhūḥ |
tripureśī, jayatsenā, nistraiguṇyā, parāparā || 150 ||
satyajñānā’naṃdarūpā, sāmarasya parāyaṇā |
kapardinī, kalāmālā, kāmadhuk,kāmarūpiṇī || 151 ||
kaḻānidhiḥ, kāvyakaḻā, rasajñā, rasaśevadhiḥ |
puṣṭā, purātanā, pūjyā, puṣkarā, puṣkarekṣaṇā || 152 ||
paraṃjyotiḥ, paraṃdhāma, paramāṇuḥ, parātparā |
pāśahastā, pāśahaṃtrī, paramaṃtra vibhedinī || 153 ||
mūrtā,’mūrtā,’nityatṛptā, muni mānasa haṃsikā |
satyavratā, satyarūpā, sarvāṃtaryāminī, satī || 154 ||
brahmāṇī, brahmajananī, bahurūpā, budhārcitā |
prasavitrī, pracaṃḍā”jñā, pratiṣṭhā, prakaṭākṛtiḥ || 155 ||
prāṇeśvarī, prāṇadātrī, paṃcāśat-pīṭharūpiṇī |
viśṛṃkhalā, viviktasthā, vīramātā, viyatprasūḥ || 156 ||
mukuṃdā, mukti nilayā, mūlavigraha rūpiṇī |
bhāvajñā, bhavarogaghnī bhavacakra pravartinī || 157 ||
chaṃdassārā, śāstrasārā, maṃtrasārā, talodarī |
udārakīrti, ruddāmavaibhavā, varṇarūpiṇī || 158 ||
janmamṛtyu jarātapta jana viśrāṃti dāyinī |
sarvopaniṣa-dudghuṣṭā, śāṃtyatīta kaḻātmikā || 159 ||
gaṃbhīrā, gaganāṃtaḥsthā, garvitā, gānalolupā |
kalpanārahitā, kāṣṭhā,’kāṃtā, kāṃtārdha vigrahā || 160 ||
kāryakāraṇa nirmuktā, kāmakeḻi taraṃgitā |
kanat-kanakatāṭaṃkā, līlāvigraha dhāriṇī || 161 ||
ajākṣaya vinirmuktā, mugdhā kṣipraprasādinī |
aṃtarmukha samārādhyā, bahirmukha sudurlabhā || 162 ||
trayī, trivarga nilayā, tristhā, tripuramālinī |
nirāmayā, nirālaṃbā, svātmārāmā, sudhāsṛtiḥ || 163 ||
saṃsārapaṃka nirmagna samuddharaṇa paṃḍitā |
yajñapriyā, yajñakartrī, yajamāna svarūpiṇī || 164 ||
dharmādhārā, dhanādhyakṣā, dhanadhānya vivardhinī |
viprapriyā, viprarūpā, viśvabhramaṇa kāriṇī || 165 ||
viśvagrāsā, vidrumābhā, vaiṣṇavī, viṣṇurūpiṇī |
ayoni, ryoninilayā, kūṭasthā, kularūpiṇī || 166 ||
vīragoṣṭhīpriyā, vīrā, naiṣkarmyā, nādarūpiṇī |
vijñāna kalanā, kalyā vidagdhā, baiṃdavāsanā || 167 ||
tattvādhikā, tattvamayī, tattvamartha svarūpiṇī |
sāmagānapriyā, saumyā, sadāśiva kuṭuṃbinī || 168 ||
savyāpasavya mārgasthā, sarvāpadvi nivāriṇī |
svasthā, svabhāvamadhurā, dhīrā, dhīra samarcitā || 169 ||
caitanyārghya samārādhyā, caitanya kusumapriyā |
sadoditā, sadātuṣṭā, taruṇāditya pāṭalā || 170 ||
dakṣiṇā, dakṣiṇārādhyā, darasmera mukhāṃbujā |
kauḻinī kevalā,’narghyā kaivalya padadāyinī || 171 ||
stotrapriyā, stutimatī, śrutisaṃstuta vaibhavā |
manasvinī, mānavatī, maheśī, maṃgaḻākṛtiḥ || 172 ||
viśvamātā, jagaddhātrī, viśālākṣī, virāgiṇī|
pragalbhā, paramodārā, parāmodā, manomayī || 173 ||
vyomakeśī, vimānasthā, vajriṇī, vāmakeśvarī |
paṃcayajñapriyā, paṃcapreta maṃcādhiśāyinī || 174 ||
paṃcamī, paṃcabhūteśī, paṃca saṃkhyopacāriṇī |
śāśvatī, śāśvataiśvaryā, śarmadā, śaṃbhumohinī || 175 ||
dharā, dharasutā, dhanyā, dharmiṇī, dharmavardhinī |
lokātītā, guṇātītā, sarvātītā, śamātmikā || 176 ||
baṃdhūka kusuma prakhyā, bālā, līlāvinodinī |
sumaṃgaḻī, sukhakarī, suveṣāḍhyā, suvāsinī || 177 ||
suvāsinyarcanaprītā,”śobhanā, śuddha mānasā |
biṃdu tarpaṇa saṃtuṣṭā, pūrvajā, tripurāṃbikā || 178 ||
daśamudrā samārādhyā, tripurā śrīvaśaṃkarī |
jñānamudrā, jñānagamyā, jñānajñeya svarūpiṇī || 179 ||
yonimudrā, trikhaṃḍeśī, triguṇāṃbā, trikoṇagā |
anaghādbhuta cāritrā, vāṃchitārtha pradāyinī || 180 ||
abhyāsāti śayajñātā, ṣaḍadhvātīta rūpiṇī |
avyāja karuṇāmūrti, rajñānadhvāṃta dīpikā || 181 ||
ābālagopa viditā, sarvānullaṃghya śāsanā |
śrī cakrarājanilayā, śrīmattripura suṃdarī || 182 ||
śrī śivā, śivaśaktyaikya rūpiṇī, lalitāṃbikā |
evaṃ śrīlalitādevyā nāmnāṃ sāhasrakaṃ jaguḥ || 183 ||
|| iti śrī brahmāṃḍapurāṇe, uttarakhaṃḍe, śrī hayagrīvāgastya saṃvāde, śrī lalitā rahasyanāma sāhasrastotra kathanaṃ nāma dvitīyo’dhyāyaḥ ||
