brahmajñānāvaḻīmālā
sakṛcchravaṇamātreṇa brahmajñānaṃ yato bhavet |
brahmajñānāvalīmālā sarveṣāṃ mokṣasiddhaye || 1||
asaṃgo’hamasaṃgo’hamasaṃgo’haṃ punaḥ punaḥ |
saccidānaṃdarūpo’hamahamevāhamavyayaḥ || 2||
nityaśuddhavimukto’haṃ nirākāro’hamavyayaḥ |
bhūmānaṃdasvarūpo’hamahamevāhamavyayaḥ || 3||
nityo’haṃ niravadyo’haṃ nirākāro’hamucyate |
paramānaṃdarūpo’hamahamevāhamavyayaḥ || 4||
śuddhacaitanyarūpo’hamātmārāmo’hameva ca |
akhaṃḍānaṃdarūpo’hamahamevāhamavyayaḥ || 5||
pratyakcaitanyarūpo’haṃ śāṃto’haṃ prakṛteḥ paraḥ |
śāśvatānaṃdarūpo’hamahamevāhamavyayaḥ || 6||
tattvātītaḥ parātmāhaṃ madhyātītaḥ paraḥ śivaḥ |
māyātītaḥ paraṃjyotirahamevāhamavyayaḥ || 7||
nānārūpavyatīto’haṃ cidākāro’hamacyutaḥ |
sukharūpasvarūpo’hamahamevāhamavyayaḥ || 8||
māyātatkāryadehādi mama nāstyeva sarvadā |
svaprakāśaikarūpo’hamahamevāhamavyayaḥ || 9||
guṇatrayavyatīto’haṃ brahmādīnāṃ ca sākṣyaham |
anaṃtānaṃtarūpo’hamahamevāhamavyayaḥ || 10||
aṃtaryāmisvarūpo’haṃ kūṭasthaḥ sarvago’smyaham |
paramātmasvarūpo’hamahamevāhamavyayaḥ || 11||
niṣkalo’haṃ niṣkriyo’haṃ sarvātmādyaḥ sanātanaḥ |
aparokṣasvarūpo’hamahamevāhamavyayaḥ || 12||
dvaṃdvādisākṣirūpo’hamacalo’haṃ sanātanaḥ |
sarvasākṣisvarūpo’hamahamevāhamavyayaḥ || 13||
prajñānaghana evāhaṃ vijñānaghana eva ca |
akartāhamabhoktāhamahamevāhamavyayaḥ || 14||
nirādhārasvarūpo’haṃ sarvādhāro’hameva ca |
āptakāmasvarūpo’hamahamevāhamavyayaḥ || 15||
tāpatrayavinirmukto dehatrayavilakṣaṇaḥ |
avasthātrayasākṣyasmi cāhamevāhamavyayaḥ || 16||
dṛgdṛśyau dvau padārthau staḥ parasparavilakṣaṇau |
dṛgbrahma dṛśyaṃ māyeti sarvavedāṃtaḍiṃḍimaḥ || 17||
ahaṃ sākṣīti yo vidyādvivicyaivaṃ punaḥ punaḥ |
sa eva muktaḥ so vidvāniti vedāṃtaḍiṃḍimaḥ || 18||
ghaṭakuḍyādikaṃ sarvaṃ mṛttikāmātrameva ca |
tadvadbrahma jagatsarvamiti vedāṃtaḍiṃḍimaḥ || 19||
brahma satyaṃ jaganmithyā jīvo brahmaiva nāparaḥ |
anena vedyaṃ sacchāstramiti vedāṃtaḍiṃḍimaḥ || 20||
aṃtarjyotirbahirjyotiḥ pratyagjyotiḥ parātparaḥ |
jyotirjyotiḥ svayaṃjyotirātmajyotiḥ śivo’smyaham || 21||
iti śrīmatparamahaṃsaparivrājakācāryasya
śrīgoviṃdabhagavatpūjyapādaśiṣyasya
śrīmacchaṃkarabhagavataḥ kṛtau
brahmajñānāvalīmālā saṃpūrṇā ||
