śrī mīnākṣī stotraṃ
śrīvidye śivavāmabhāganilaye śrīrājarājārcite
śrīnāthādigurusvarūpavibhave ciṃtāmaṇīpīṭhike |
śrīvāṇīgirijānutāṃghrikamale śrīśāṃbhavi śrīśive
madhyāhne malayadhvajādhipasute māṃ pāhi mīnāṃbike || 1 ||
cakrasthe’capale carācarajagannāthe jagatpūjite
ārtālīvarade natābhayakare vakṣojabhārānvite |
vidye vedakalāpamauḻividite vidyullatāvigrahe
mātaḥ pūrṇasudhārasārdrahṛdaye māṃ pāhi mīnāṃbike || 2 ||
koṭīrāṃgadaratnakuṃḍaladhare kodaṃḍabāṇāṃcite
kokākārakucadvayoparilasatprālaṃbahārāṃcite |
śiṃjannūpurapādasārasamaṇīśrīpādukālaṃkṛte
maddāridryabhujaṃgagāruḍakhage māṃ pāhi mīnāṃbike || 3 ||
brahmeśācyutagīyamānacarite pretāsanāṃtasthite
pāśodaṃkuśacāpabāṇakalite bāleṃducūḍāṃcite |
bāle bālakuraṃgalolanayane bālārkakoṭyujjvale
mudrārādhitadaivate munisute māṃ pāhi mīnāṃbike || 4 ||
gaṃdharvāmarayakṣapannaganute gaṃgādharāliṃgite
gāyatrīgaruḍāsane kamalaje suśyāmale susthite |
khātīte khaladārupāvakaśikhe khadyotakoṭyujjvale
maṃtrārādhitadaivate munisute māṃ pāhī mīnāṃbike || 5 ||
nāde nāradatuṃburādyavinute nādāṃtanādātmike
nitye nīlalatātmike nirupame nīvāraśūkopame |
kāṃte kāmakale kadaṃbanilaye kāmeśvarāṃkasthite
madvidye madabhīṣṭakalpalatike māṃ pāhi mīnāṃbike || 6 ||
vīṇānādanimīlitārdhanayane visrastacūlībhare
tāṃbūlāruṇapallavādharayute tāṭaṃkahārānvite |
śyāme caṃdrakaḻāvataṃsakalite kastūrikāphālike
pūrṇe pūrṇakalābhirāmavadane māṃ pāhi mīnāṃbike || 7 ||
śabdabrahmamayī carācaramayī jyotirmayī vāṅmayī
nityānaṃdamayī niraṃjanamayī tattvaṃmayī cinmayī |
tattvātītamayī parātparamayī māyāmayī śrīmayī
sarvaiśvaryamayī sadāśivamayī māṃ pāhi mīnāṃbike || 8 ||
iti śrīmatparamahaṃsaparivrājakācāryasya śrīgoviṃdabhagavatpūjyapādaśiṣyasya śrīmacchaṃkarabhagavataḥ kṛtau mīnākṣī stotram |
