nirvāṇa daśakaṃ
na bhūmirna toyaṃ na tejo na vāyuḥ
na khaṃ neṃdriyaṃ vā na teṣāṃ samūhaḥ
anekāṃtikatvātsuṣuptyekasiddhaḥ
tadeko’vaśiṣṭaḥ śivaḥ kevalo’ham || 1 ||
na varṇā na varṇāśramācāradharmā
na me dhāraṇādhyānayogādayopi
anātmāśrayāhaṃ mamādhyāsahānā-
tadeko’vaśiṣṭaḥ śivaḥ kevalo’ham || 2 ||
na mātā pitā vā na devā na lokā
na vedā na yajñā na tīrtha bruvaṃti
suṣuptau nirastātiśūnyātmakatvā-
tadeko’vaśiṣṭaḥ śivaḥ kevalo’ham || 3 ||
na sāṃkhyaṃ na śaivaṃ na tatpāṃcarātraṃ
na jainaṃ na mīmāṃsakādermataṃ vā
viśiṣṭānubhūtyā viśuddhātmakatvā-
tadeko’vaśiṣṭaḥ śivaḥ kevalo’ham || 4 ||
na cordhvaṃ na cādho na cāṃtarna bāhyaṃ
na madhyaṃ na tiryanna pūrvā’parā dik
viyadvyāpakatvādakhaṃḍaikarūpaḥ
tadeko’vaśiṣṭaḥ śivaḥ kevalo’ham || 5 ||
na śuklaṃ na kṛṣṇaṃ na raktaṃ na pītaṃ
na kubjaṃ na pīnaṃ na hrasvaṃ na dīrghaṃ
arūpaṃ tathā jyotirākārakatvā-
tadeko’vaśiṣṭaḥ śivaḥ kevalo’ham || 6 ||
na śāstā na śāstraṃ na śiṣyo na śikṣā
na ca tvaṃ na cāhaṃ na cāyaṃ prapaṃcaḥ
svarūpāvabodhī vikalpāsahiṣṇuḥ
tadeko’vaśiṣṭaḥ śivaḥ kevalo’ham || 7 ||
na jāgranna me svapnako vā suṣuptiḥ
na viśvo na vā taijasaḥ pājñako vā
avidyātmakatvāttrayāṇaṃ turīyaḥ
tadeko’vaśiṣṭaḥ śivaḥ kevalo’ham || 8 ||
api vyāpakatvāddhitatvaprayogā-
tsvataḥ siddhabhāvādananyāśrayatvāt
jagattucchametatsamastaṃ tadanya-
tadeko’vaśiṣṭaḥ śivaḥ kevalo’ham || 9 ||
na caikaṃ tadanyaddvitīyaṃ kutaḥ syāt
na kevalatvaṃ na cākevalatvaṃ
na śūnyaṃ na cāśūnyamadvaitakatvā-
kathaṃ sarvavedāṃtasiddhiṃ bravīmi || 10 ||
