śrī durgā sahasra nāma stotraṃ
|| atha śrī durgā sahasranāmastotram ||
nārada uvāca –
kumāra guṇagaṃbhīra devasenāpate prabho |
sarvābhīṣṭapradaṃ puṃsāṃ sarvapāpapraṇāśanam || 1||
guhyādguhyataraṃ stotraṃ bhaktivardhakamaṃjasā |
maṃgalaṃ grahapīḍādiśāṃtidaṃ vaktumarhasi || 2||
skaṃda uvāca –
śṛṇu nārada devarṣe lokānugrahakāmyayā |
yatpṛcchasi paraṃ puṇyaṃ tatte vakṣyāmi kautukāt || 3||
mātā me lokajananī himavannagasattamāt |
menāyāṃ brahmavādinyāṃ prādurbhūtā harapriyā || 4||
mahatā tapasā”rādhya śaṃkaraṃ lokaśaṃkaram |
svameva vallabhaṃ bheje kaleva hi kalānidhim || 5||
nagānāmadhirājastu himavān virahāturaḥ |
svasutāyāḥ parikṣīṇe vasiṣṭhena prabodhitaḥ || 6||
trilokajananī seyaṃ prasannā tvayi puṇyataḥ |
prādurbhūtā sutātvena tadviyogaṃ śubhaṃ tyaja || 7||
bahurūpā ca durgeyaṃ bahunāmnī sanātanī |
sanātanasya jāyā sā putrīmohaṃ tyajādhunā || 8||
iti prabodhitaḥ śailaḥ tāṃ tuṣṭāva parāṃ śivām |
tadā prasannā sā durgā pitaraṃ prāha naṃdinī || 9||
matprasādātparaṃ stotraṃ hṛdaye pratibhāsatām |
tena nāmnāṃ sahasreṇa pūjayan kāmamāpnuhi || 10||
ityuktvāṃtarhitāyāṃ tu hṛdaye sphuritaṃ tadā |
nāmnāṃ sahasraṃ durgāyāḥ pṛcchate me yaduktavān || 11||
maṃgalānāṃ maṃgalaṃ tad durgānāma sahasrakam |
sarvābhīṣṭapradāṃ puṃsāṃ bravīmyakhilakāmadam || 12||
durgādevī samākhyātā himavānṛṣirucyate |
chaṃdonuṣṭup japo devyāḥ prītaye kriyate sadā || 13||
asya śrīdurgāstotramahāmaṃtrasya | himavān ṛṣiḥ | anuṣṭup chaṃdaḥ |
durgābhagavatī devatā | śrīdurgāprasādasiddhyarthe jape viniyogaḥ | |
śrībhagavatyai durgāyai namaḥ |
devīdhyānaṃ
oṃ hrīṃ kālābhrābhāṃ kaṭākṣairarikulabhayadāṃ maulibaddheṃdurekhāṃ
śaṃkhaṃ cakraṃ kṛpāṇaṃ triśikhamapi karairudvahaṃtīṃ trinetrām |
siṃhaskaṃdhādhirūḍhāṃ tribhuvanamakhilaṃ tejasā pūrayaṃtīṃ
dhyāyed durgāṃ jayākhyāṃ tridaśaparivṛtāṃ sevitāṃ siddhikāmaiḥ ||
śrī jayadurgāyai namaḥ |
oṃ śivāthomā ramā śaktiranaṃtā niṣkalā’malā |
śāṃtā māheśvarī nityā śāśvatā paramā kṣamā || 1||
aciṃtyā kevalānaṃtā śivātmā paramātmikā |
anādiravyayā śuddhā sarvajñā sarvagā’calā || 2||
ekānekavibhāgasthā māyātītā sunirmalā |
mahāmāheśvarī satyā mahādevī niraṃjanā || 3||
kāṣṭhā sarvāṃtarasthā’pi cicchaktiścātrilālitā |
sarvā sarvātmikā viśvā jyotīrūpākṣarāmṛtā || 4||
śāṃtā pratiṣṭhā sarveśā nivṛttiramṛtapradā |
vyomamūrtirvyomasaṃsthā vyomadhārā’cyutā’tulā || 5||
anādinidhanā’moghā kāraṇātmakalākulā |
ṛtuprathamajā’nābhiramṛtātmasamāśrayā || 6||
prāṇeśvarapriyā namyā mahāmahiṣaghātinī |
prāṇeśvarī prāṇarūpā pradhānapuruṣeśvarī || 7||
sarvaśaktikalā’kāmā mahiṣeṣṭavināśinī |
sarvakāryaniyaṃtrī ca sarvabhūteśvareśvarī || 8||
aṃgadādidharā caiva tathā mukuṭadhāriṇī |
sanātanī mahānaṃdā”kāśayonistathecyate || 9||
citprakāśasvarūpā ca mahāyogeśvareśvarī |
mahāmāyā saduṣpārā mūlaprakṛtirīśikā || 10||
saṃsārayoniḥ sakalā sarvaśaktisamudbhavā |
saṃsārapārā durvārā durnirīkṣā durāsadā || 11||
prāṇaśaktiśca sevyā ca yoginī paramākalā |
mahāvibhūtirdurdarśā mūlaprakṛtisaṃbhavā || 12||
anādyanaṃtavibhavā parārthā puruṣāraṇiḥ |
sargasthityaṃtakṛccaiva sudurvācyā duratyayā || 13||
śabdagamyā śabdamāyā śabdākhyānaṃdavigrahā |
pradhānapuruṣātītā pradhānapuruṣātmikā || 14||
purāṇī cinmayā puṃsāmiṣṭadā puṣṭirūpiṇī |
pūtāṃtarasthā kūṭasthā mahāpuruṣasaṃjñitā || 15||
janmamṛtyujarātītā sarvaśaktisvarūpiṇī |
vāṃchāpradā’navacchinnapradhānānupraveśinī || 16||
kṣetrajñā’ciṃtyaśaktistu procyate’vyaktalakṣaṇā |
malāpavarjitā”nādimāyā tritayatattvikā || 17||
prītiśca prakṛtiścaiva guhāvāsā tathocyate |
mahāmāyā nagotpannā tāmasī ca dhruvā tathā || 18||
vyaktā’vyaktātmikā kṛṣṇā raktā śuklā hyakāraṇā |
procyate kāryajananī nityaprasavadharmiṇī || 19||
sargapralayamuktā ca sṛṣṭisthityaṃtadharmiṇī |
brahmagarbhā caturviṃśasvarūpā padmavāsinī || 20||
acyutāhlādikā vidyudbrahmayonirmahālayā |
mahālakṣmī samudbhāvabhāvitātmāmaheśvarī || 21||
mahāvimānamadhyasthā mahānidrā sakautukā |
sarvārthadhāriṇī sūkṣmā hyaviddhā paramārthadā || 22||
anaṃtarūpā’naṃtārthā tathā puruṣamohinī |
anekānekahastā ca kālatrayavivarjitā || 23||
brahmajanmā haraprītā matirbrahmaśivātmikā |
brahmeśaviṣṇusaṃpūjyā brahmākhyā brahmasaṃjñitā || 24||
vyaktā prathamajā brāhmī mahārātrīḥ prakīrtitā |
jñānasvarūpā vairāgyarūpā hyaiśvaryarūpiṇī || 25||
dharmātmikā brahmamūrtiḥ pratiśrutapumarthikā |
apāṃyoniḥ svayaṃbhūtā mānasī tattvasaṃbhavā || 26||
īśvarasya priyā proktā śaṃkarārdhaśarīriṇī |
bhavānī caiva rudrāṇī mahālakṣmīstathā’ṃbikā || 27||
maheśvarasamutpannā bhuktimukti pradāyinī |
sarveśvarī sarvavaṃdyā nityamuktā sumānasā || 28||
maheṃdropeṃdranamitā śāṃkarīśānuvartinī |
īśvarārdhāsanagatā māheśvarapativratā || 29||
saṃsāraśoṣiṇī caiva pārvatī himavatsutā |
paramānaṃdadātrī ca guṇāgryā yogadā tathā || 30||
jñānamūrtiśca sāvitrī lakṣmīḥ śrīḥ kamalā tathā |
anaṃtaguṇagaṃbhīrā hyuronīlamaṇiprabhā || 31||
sarojanilayā gaṃgā yogidhyeyā’surārdinī |
sarasvatī sarvavidyā jagajjyeṣṭhā sumaṃgalā || 32||
vāgdevī varadā varyā kīrtiḥ sarvārthasādhikā |
vāgīśvarī brahmavidyā mahāvidyā suśobhanā || 33||
grāhyavidyā vedavidyā dharmavidyā”tmabhāvitā |
svāhā viśvaṃbharā siddhiḥ sādhyā medhā dhṛtiḥ kṛtiḥ || 34||
sunītiḥ saṃkṛtiścaiva kīrtitā naravāhinī |
pūjāvibhāvinī saumyā bhogyabhāg bhogadāyinī || 35||
śobhāvatī śāṃkarī ca lolā mālāvibhūṣitā |
parameṣṭhipriyā caiva trilokīsuṃdarī mātā || 36||
naṃdā saṃdhyā kāmadhātrī mahādevī susāttvikā |
mahāmahiṣadarpaghnī padmamālā’ghahāriṇī || 37||
vicitramukuṭā rāmā kāmadātā prakīrtitā |
pitāṃbaradharā divyavibhūṣaṇa vibhūṣitā || 38||
divyākhyā somavadanā jagatsaṃsṛṣṭivarjitā |
niryaṃtrā yaṃtravāhasthā naṃdinī rudrakālikā || 39||
ādityavarṇā kaumārī mayūravaravāhinī |
padmāsanagatā gaurī mahākālī surārcitā || 40||
aditirniyatā raudrī padmagarbhā vivāhanā |
virūpākṣā keśivāhā guhāpuranivāsinī || 41||
mahāphalā’navadyāṃgī kāmarūpā saridvarā |
bhāsvadrūpā muktidātrī praṇatakleśabhaṃjanā || 42||
kauśikī gominī rātristridaśārivināśinī |
bahurūpā surūpā ca virūpā rūpavarjitā || 43||
bhaktārtiśamanā bhavyā bhavabhāvavināśinī |
sarvajñānaparītāṃgī sarvāsuravimardikā || 44||
pikasvanī sāmagītā bhavāṃkanilayā priyā |
dīkṣā vidyādharī dīptā maheṃdrāhitapātinī || 45||
sarvadevamayā dakṣā samudrāṃtaravāsinī |
akalaṃkā nirādhārā nityasiddhā nirāmayā || 46||
kāmadhenubṛhadgarbhā dhīmatī maunanāśinī |
niḥsaṃkalpā nirātaṃkā vinayā vinayapradā || 47||
jvālāmālā sahasrāḍhyā devadevī manomayā |
subhagā suviśuddhā ca vasudevasamudbhavā || 48||
maheṃdropeṃdrabhaginī bhaktigamyā parāvarā |
jñānajñeyā parātītā vedāṃtaviṣayā matiḥ || 49||
dakṣiṇā dāhikā dahyā sarvabhūtahṛdisthitā |
yogamāyā vibhāgajñā mahāmohā garīyasī || 50||
saṃdhyā sarvasamudbhūtā brahmavṛkṣāśriyāditiḥ |
bījāṃkurasamudbhūtā mahāśaktirmahāmatiḥ || 51||
khyātiḥ prajñāvatī saṃjñā mahābhogīṃdraśāyinī |
hīṃkṛtiḥ śaṃkarī śāṃtirgaṃdharvagaṇasevitā || 52||
vaiśvānarī mahāśūlā devasenā bhavapriyā |
mahārātrī parānaṃdā śacī duḥsvapnanāśinī || 53||
īḍyā jayā jagaddhātrī durvijñeyā surūpiṇī |
guhāṃbikā gaṇotpannā mahāpīṭhā marutsutā || 54||
havyavāhā bhavānaṃdā jagadyoniḥ prakīrtitā |
jaganmātā jaganmṛtyurjarātītā ca buddhidā || 55||
siddhidātrī ratnagarbhā ratnagarbhāśrayā parā |
daityahaṃtrī sveṣṭadātrī maṃgalaikasuvigrahā || 56||
puruṣāṃtargatā caiva samādhisthā tapasvinī |
divisthitā triṇetrā ca sarveṃdriyamanādhṛtiḥ || 57||
sarvabhūtahṛdisthā ca tathā saṃsāratāriṇī |
vedyā brahmavivedyā ca mahālīlā prakīrtitā || 58||
brāhmaṇibṛhatī brāhmī brahmabhūtā’ghahāriṇī |
hiraṇmayī mahādātrī saṃsāraparivartikā || 59||
sumālinī surūpā ca bhāsvinī dhāriṇī tathā |
unmūlinī sarvasabhā sarvapratyayasākṣiṇī || 60||
susaumyā caṃdravadanā tāṃḍavāsaktamānasā |
sattvaśuddhikarī śuddhā malatrayavināśinī || 61||
jagatttrayī jaganmūrtistrimūrtiramṛtāśrayā |
vimānasthā viśokā ca śokanāśinyanāhatā || 62||
hemakuṃḍalinī kālī padmavāsā sanātanī |
sadākīrtiḥ sarvabhūtaśayā devī satāṃpriyā || 63||
brahmamūrtikalā caiva kṛttikā kaṃjamālinī |
vyomakeśā kriyāśaktiricchāśaktiḥ parāgatiḥ || 64||
kṣobhikā khaṃḍikābhedyā bhedābhedavivarjitā |
abhinnā bhinnasaṃsthānā vaśinī vaṃśadhāriṇī || 65||
guhyaśaktirguhyatattvā sarvadā sarvatomukhī |
bhaginī ca nirādhārā nirāhārā prakīrtitā || 66||
niraṃkuśapadodbhūtā cakrahastā viśodhikā |
sragviṇī padmasaṃbhedakāriṇī parikīrtitā || 67||
parāvaravidhānajñā mahāpuruṣapūrvajā |
parāvarajñā vidyā ca vidyujjihvā jitāśrayā || 68||
vidyāmayī sahasrākṣī sahasravadanātmajā |
sahasraraśmiḥsatvasthā maheśvarapadāśrayā || 69||
jvālinī sanmayā vyāptā cinmayā padmabhedikā |
mahāśrayā mahāmaṃtrā mahādevamanoramā || 70||
vyomalakṣmīḥ siṃharathā cekitānā’mitaprabhā |
viśveśvarī bhagavatī sakalā kālahāriṇī || 71||
sarvavedyā sarvabhadrā guhyā dūḍhā guhāraṇī |
pralayā yogadhātrī ca gaṃgā viśveśvarī tathā || 72||
kāmadā kanakā kāṃtā kaṃjagarbhaprabhā tathā |
puṇyadā kālakeśā ca bhokttrī puṣkariṇī tathā || 73||
sureśvarī bhūtidātrī bhūtibhūṣā prakīrtitā |
paṃcabrahmasamutpannā paramārthā’rthavigrahā || 74||
varṇodayā bhānumūrtirvāgvijñeyā manojavā |
manoharā mahoraskā tāmasī vedarūpiṇī || 75||
vedaśaktirvedamātā vedavidyāprakāśinī |
yogeśvareśvarī māyā mahāśaktirmahāmayī || 76||
viśvāṃtaḥsthā viyanmūrtirbhārgavī surasuṃdarī |
surabhirnaṃdinī vidyā naṃdagopatanūdbhavā || 77||
bhāratī paramānaṃdā parāvaravibhedikā |
sarvapraharaṇopetā kāmyā kāmeśvareśvarī || 78||
anaṃtānaṃdavibhavā hṛllekhā kanakaprabhā |
kūṣmāṃḍā dhanaratnāḍhyā sugaṃdhā gaṃdhadāyinī || 79||
trivikramapadodbhūtā caturāsyā śivodayā |
sudurlabhā dhanādhyakṣā dhanyā piṃgalalocanā || 80||
śāṃtā prabhāsvarūpā ca paṃkajāyatalocanā |
iṃdrākṣī hṛdayāṃtaḥsthā śivā mātā ca satkriyā || 81||
girijā ca sugūḍhā ca nityapuṣṭā niraṃtarā |
durgā kātyāyanī caṃḍī caṃdrikā kāṃtavigrahā || 82||
hiraṇyavarṇā jagatī jagadyaṃtrapravartikā |
maṃdarādrinivāsā ca śāradā svarṇamālinī || 83||
ratnamālā ratnagarbhā vyuṣṭirviśvapramāthinī |
padmānaṃdā padmanibhā nityapuṣṭā kṛtodbhavā || 84||
nārāyaṇī duṣṭaśikṣā sūryamātā vṛṣapriyā |
maheṃdrabhaginī satyā satyabhāṣā sukomalā || 85||
vāmā ca paṃcatapasāṃ varadātrī prakīrtitā |
vācyavarṇeśvarī vidyā durjayā duratikramā || 86||
kālarātrirmahāvegā vīrabhadrapriyā hitā |
bhadrakālī jaganmātā bhaktānāṃ bhadradāyinī || 87||
karālā piṃgalākārā kāmabhettrī mahāmanāḥ |
yaśasvinī yaśodā ca ṣaḍadhvaparivartikā || 88||
śaṃkhinī padminī saṃkhyā sāṃkhyayogapravartikā |
caitrādirvatsarārūḍhā jagatsaṃpūraṇīṃdrajā || 89||
śuṃbhaghnī khecarārādhyā kaṃbugrīvā balīḍitā |
khagārūḍhā mahaiśvaryā supadmanilayā tathā || 90||
viraktā garuḍasthā ca jagatīhṛdguhāśrayā |
śuṃbhādimathanā bhaktahṛdgahvaranivāsinī || 91||
jagatttrayāraṇī siddhasaṃkalpā kāmadā tathā |
sarvavijñānadātrī cānalpakalmaṣahāriṇī || 92||
sakalopaniṣadgamyā duṣṭaduṣprekṣyasattamā |
sadvṛtā lokasaṃvyāptā tuṣṭiḥ puṣṭiḥ kriyāvatī || 93||
viśvāmareśvarī caiva bhuktimuktipradāyinī |
śivādhṛtā lohitākṣī sarpamālāvibhūṣaṇā || 94||
nirānaṃdā triśūlāsidhanurbāṇādidhāriṇī |
aśeṣadhyeyamūrtiśca devatānāṃ ca devatā || 95||
varāṃbikā gireḥ putrī niśuṃbhavinipātinī |
suvarṇā svarṇalasitā’naṃtavarṇā sadādhṛtā || 96||
śāṃkarī śāṃtahṛdayā ahorātravidhāyikā |
viśvagoptrī gūḍharūpā guṇapūrṇā ca gārgyajā || 97||
gaurī śākaṃbharī satyasaṃdhā saṃdhyātrayīdhṛtā |
sarvapāpavinirmuktā sarvabaṃdhavivarjitā || 98||
sāṃkhyayogasamākhyātā aprameyā munīḍitā |
viśuddhasukulodbhūtā biṃdunādasamādṛtā || 99||
śaṃbhuvāmāṃkagā caiva śaśitulyanibhānanā |
vanamālāvirājaṃtī anaṃtaśayanādṛtā || 100||
naranārāyaṇodbhūtā nārasiṃhī prakīrtitā |
daityapramāthinī śaṃkhacakrapadmagadādharā || 101||
saṃkarṣaṇasamutpannā aṃbikā sajjanāśrayā |
suvṛtā suṃdarī caiva dharmakāmārthadāyinī || 102||
mokṣadā bhaktinilayā purāṇapuruṣādṛtā |
mahāvibhūtidā”rādhyā sarojanilayā’samā || 103||
aṣṭādaśabhujā’nādirnīlotpaladalākṣiṇī |
sarvaśaktisamārūḍhā dharmādharmavivarjitā || 104||
vairāgyajñānaniratā nirālokā niriṃdriyā |
vicitragahanādhārā śāśvatasthānavāsinī || 105||
jñāneśvarī pītacelā vedavedāṃgapāragā |
manasvinī manyumātā mahāmanyusamudbhavā || 106||
amanyuramṛtāsvādā puraṃdarapariṣṭutā |
aśocyā bhinnaviṣayā hiraṇyarajatapriyā || 107||
hiraṇyajananī bhīmā hemābharaṇabhūṣitā |
vibhrājamānā durjñeyā jyotiṣṭomaphalapradā || 108||
mahānidrāsamutpattiranidrā satyadevatā |
dīrghā kakudminī piṃgajaṭādhārā manojñadhīḥ || 109||
mahāśrayā ramotpannā tamaḥpāre pratiṣṭhitā |
tritattvamātā trividhā susūkṣmā padmasaṃśrayā || 110||
śāṃtyatītakalā’tītavikārā śvetacelikā |
citramāyā śivajñānasvarūpā daityamāthinī || 111||
kāśyapī kālasarpābhaveṇikā śāstrayonikā |
trayīmūrtiḥ kriyāmūrtiścaturvargā ca darśinī || 112||
nārāyaṇī narotpannā kaumudī kāṃtidhāriṇī |
kauśikī lalitā līlā parāvaravibhāvinī || 113||
vareṇyā’dbhutamahātmyā vaḍavā vāmalocanā |
subhadrā cetanārādhyā śāṃtidā śāṃtivardhinī || 114||
jayādiśaktijananī śakticakrapravartikā |
triśaktijananī janyā ṣaṭsūtraparivarṇitā || 115||
sudhautakarmaṇā”rādhyā yugāṃtadahanātmikā |
saṃkarṣiṇī jagaddhātrī kāmayoniḥ kirīṭinī || 116||
aiṃdrī trailokyanamitā vaiṣṇavī parameśvarī |
pradyumnajananī biṃbasamoṣṭhī padmalocanā || 117||
madotkaṭā haṃsagatiḥ pracaṃḍā caṃḍavikramā |
vṛṣādhīśā parātmā ca viṃdhyā parvatavāsinī || 118||
himavanmerunilayā kailāsapuravāsinī |
cāṇūrahaṃtrī nītijñā kāmarūpā trayītanuḥ || 119||
vratasnātā dharmaśīlā siṃhāsananivāsinī |
vīrabhadrādṛtā vīrā mahākālasamudbhavā || 120||
vidyādharārcitā siddhasādhyārādhitapādukā |
śraddhātmikā pāvanī ca mohinī acalātmikā || 121||
mahādbhutā vārijākṣī siṃhavāhanagāminī |
manīṣiṇī sudhāvāṇī vīṇāvādanatatparā || 122||
śvetavāhaniṣevyā ca lasanmatiraruṃdhatī |
hiraṇyākṣī tathā caiva mahānaṃdapradāyinī || 123||
vasuprabhā sumālyāptakaṃdharā paṃkajānanā |
parāvarā varārohā sahasranayanārcitā || 124||
śrīrūpā śrīmatī śreṣṭhā śivanāmnī śivapriyā |
śrīpradā śritakalyāṇā śrīdharārdhaśarīriṇī || 125||
śrīkalā’naṃtadṛṣṭiśca hyakṣudrārātisūdanī |
raktabījanihaṃtrī ca daityasaṃgavimardinī || 126||
siṃhārūḍhā siṃhikāsyā daityaśoṇitapāyinī |
sukīrtisahitācchinnasaṃśayā rasavedinī || 127||
guṇābhirāmā nāgārivāhanā nirjarārcitā |
nityoditā svayaṃjyotiḥ svarṇakāyā prakīrtitā || 128||
vajradaṃḍāṃkitā caiva tathāmṛtasaṃjīvinī |
vajracchannā devadevī varavajrasvavigrahā || 129||
māṃgalyā maṃgalātmā ca mālinī mālyadhāriṇī |
gaṃdharvī taruṇī cāṃdrī khaḍgāyudhadharā tathā || 130||
saudāminī prajānaṃdā tathā proktā bhṛgūdbhavā |
ekānaṃgā ca śāstrārthakuśalā dharmacāriṇī || 131||
dharmasarvasvavāhā ca dharmādharmaviniścayā |
dharmaśaktirdharmamayā dhārmikānāṃ śivapradā || 132||
vidharmā viśvadharmajñā dharmārthāṃtaravigrahā |
dharmavarṣmā dharmapūrvā dharmapāraṃgatāṃtarā || 133||
dharmopadeṣṭrī dharmātmā dharmagamyā dharādharā |
kapālinī śākalinī kalākalitavigrahā || 134||
sarvaśaktivimuktā ca karṇikāradharā’kṣarā|
kaṃsaprāṇaharā caiva yugadharmadharā tathā || 135||
yugapravartikā proktā trisaṃdhyā dhyeyavigrahā |
svargāpavargadātrī ca tathā pratyakṣadevatā || 136||
ādityā divyagaṃdhā ca divākaranibhaprabhā |
padmāsanagatā proktā khaḍgabāṇaśarāsanā || 137||
śiṣṭā viśiṣṭā śiṣṭeṣṭā śiṣṭaśreṣṭhaprapūjitā |
śatarūpā śatāvartā vitatā rāsamodinī || 138||
sūryeṃdunetrā pradyumnajananī suṣṭhumāyinī |
sūryāṃtarasthitā caiva satpratiṣṭhatavigrahā || 139||
nivṛttā procyate jñānapāragā parvatātmajā |
kātyāyanī caṃḍikā ca caṃḍī haimavatī tathā || 140||
dākṣāyaṇī satī caiva bhavānī sarvamaṃgalā |
dhūmralocanahaṃtrī ca caṃḍamuṃḍavināśinī || 141||
yoganidrā yogabhadrā samudratanayā tathā |
devapriyaṃkarī śuddhā bhaktabhaktipravardhinī || 142||
triṇetrā caṃdramukuṭā pramathārcitapādukā |
arjunābhīṣṭadātrī ca pāṃḍavapriyakāriṇī || 143||
kumāralālanāsaktā harabāhūpadhānikā |
vighneśajananī bhaktavighnastomaprahāriṇī || 144||
susmiteṃdumukhī namyā jayāpriyasakhī tathā |
anādinidhanā preṣṭhā citramālyānulepanā || 145||
koṭicaṃdrapratīkāśā kūṭajālapramāthinī |
kṛtyāprahāriṇī caiva māraṇoccāṭanī tathā || 146||
surāsurapravaṃdyāṃghrirmohaghnī jñānadāyinī |
ṣaḍvairinigrahakarī vairividrāviṇī tathā || 147||
bhūtasevyā bhūtadātrī bhūtapīḍāvimardikā |
nāradastutacāritrā varadeśā varapradā || 148||
vāmadevastutā caiva kāmadā somaśekharā |
dikpālasevitā bhavyā bhāminī bhāvadāyinī || 149||
strīsaubhāgyapradātrī ca bhogadā roganāśinī |
vyomagā bhūmigā caiva munipūjyapadāṃbujā |
vanadurgā ca durbodhā mahādurgā prakīrtitā || 150||
phalaśrutiḥ
itīdaṃ kīrtidaṃ bhadra durgānāmasahasrakam |
trisaṃdhyaṃ yaḥ paṭhennityaṃ tasya lakṣmīḥ sthirā bhavet || 1||
grahabhūtapiśācādipīḍā naśyatyasaṃśayam |
bālagrahādipīḍāyāḥ śāṃtirbhavati kīrtanāt || 2||
mārikādimahāroge paṭhatāṃ saukhyadaṃ nṛṇām |
vyavahāre ca jayadaṃ śatrubādhānivārakam || 3||
daṃpatyoḥ kalahe prāpte mithaḥ premābhivardhakam |
āyurārogyadaṃ puṃsāṃ sarvasaṃpatpradāyakam || 4||
vidyābhivardhakaṃ nityaṃ paṭhatāmarthasādhakam |
śubhadaṃ śubhakāryeṣu paṭhatāṃ śṛṇutāmapi || 5||
yaḥ pūjayati durgāṃ tāṃ durgānāmasahasrakaiḥ |
puṣpaiḥ kuṃkumasammiśraiḥ sa tu yatkāṃkṣate hṛdi || 6||
tatsarvaṃ samavāpnoti nāsti nāstyatra saṃśayaḥ |
yanmukhe dhriyate nityaṃ durgānāmasahasrakam || 7||
kiṃ tasyetaramaṃtraughaiḥ kāryaṃ dhanyatamasya hi |
durgānāmasahasrasya pustakaṃ yadgṛhe bhavet || 8||
na tatra grahabhūtādibādhā syānmaṃgalāspade |
tadgṛhaṃ puṇyadaṃ kṣetraṃ devīsānnidhyakārakam || 9||
etasya stotramukhyasya pāṭhakaḥ śreṣṭhamaṃtravit |
devatāyāḥ prasādena sarvapūjyaḥ sukhī bhavet || 10||
ityetannagarājena kīrtitaṃ munisattama |
guhyādguhyataraṃ stotraṃ tvayi snehāt prakīrtitam || 11||
bhaktāya śraddhadhānāya kevalaṃ kīrtyatāmidam |
hṛdi dhāraya nityaṃ tvaṃ devyanugrahasādhakam || 12|| ||
iti śrīskāṃdapurāṇe skaṃdanāradasaṃvāde durgāsahasranāmastotraṃ saṃpūrṇam ||
