kanakadhārā stotraṃ
vaṃde vaṃdāru maṃdāramiṃdirānaṃdakaṃdalam |
amaṃdānaṃdasaṃdoha baṃdhuraṃ siṃdhurānanam ||
aṃgaṃ hareḥ pulakabhūṣaṇamāśrayaṃtī
bhṛṃgāṃganeva mukuḻābharaṇaṃ tamālam |
aṃgīkṛtākhilavibhūtirapāṃgalīlā
māṃgaḻyadāstu mama maṃgaḻadevatāyāḥ || 1 ||
mugdhā muhurvidadhatī vadane murāreḥ
prematrapāpraṇihitāni gatāgatāni |
mālā dṛśormadhukarīva mahotpale yā
sā me śriyaṃ diśatu sāgarasaṃbhavāyāḥ || 2 ||
āmīlitākṣamadhigamya mudā mukuṃdaṃ-
ānaṃdakaṃdamanimeṣamanaṃgataṃtram |
ākekarasthitakanīnikapakṣmanetraṃ
bhūtyai bhavenmama bhujaṃgaśayāṃganāyāḥ || 3 ||
bāhvaṃtare madhujitaḥ śritakaustubhe yā
hārāvaḻīva harinīlamayī vibhāti |
kāmapradā bhagavato’pi kaṭākṣamālā
kalyāṇamāvahatu me kamalālayāyāḥ || 4 ||
kālāṃbudāḻilalitorasi kaiṭabhāreḥ
dhārādhare sphurati yā taṭidaṃganeva |
mātussamastajagatāṃ mahanīyamūrtiḥ
bhadrāṇi me diśatu bhārgavanaṃdanāyāḥ || 5 ||
prāptaṃ padaṃ prathamataḥ khalu yatprabhāvāt
māṃgaḻyabhāji madhumāthini manmathena |
mayyāpatettadiha maṃtharamīkṣaṇārdhaṃ
maṃdālasaṃ ca makarālayakanyakāyāḥ || 6 ||
viśvāmareṃdrapadavibhramadānadakṣaṃ
ānaṃdaheturadhikaṃ muravidviṣo’pi |
īṣanniṣīdatu mayi kṣaṇamīkṣaṇārthaṃ [kṣaṇamīkṣaṇārdhaṃ]
iṃdīvarodarasahodaramiṃdirāyāḥ || 7 ||
iṣṭā viśiṣṭamatayo’pi yayā dayārdra
dṛṣṭyā triviṣṭapapadaṃ sulabhaṃ labhaṃte |
dṛṣṭiḥ prahṛṣṭakamalodaradīpti-riṣṭāṃ
puṣṭiṃ kṛṣīṣṭa mama puṣkaraviṣṭarāyāḥ || 8 ||
dadyāddayānupavano draviṇāṃbudhārā-
masmi-nnakiṃcana vihaṃgaśiśau viṣaṇṇe |
duṣkarmagharmamapanīya cirāya dūraṃ
nārāyaṇapraṇayinīnayanāṃbuvāhaḥ || 9 ||
gīrdevateti garuḍadhvajasuṃdarīti
śākaṃbharīti śaśiśekharavallabheti |
sṛṣṭisthitipraḻayakeliṣu saṃsthitāyai
tasyai namastribhuvanaikagurostaruṇyai || 10 ||
śrutyai namo’stu śubhakarmaphalaprasūtyai
ratyai namo’stu ramaṇīyaguṇārṇavāyai |
śaktyai namo’stu śatapatraniketanāyai
puṣṭyai namo’stu puruṣottamavallabhāyai || 11 ||
namo’stu nāḻīkanibhānanāyai
namo’stu dugdhodadhijanmabhūmyai |
namo’stu somāmṛtasodarāyai
namo’stu nārāyaṇavallabhāyai || 12 ||
namo’stu hemāṃbujapīṭhikāyai
namo’stu bhūmaṃḍalanāyikāyai |
namo’stu devādidayāparāyai
namo’stu śāraṃgāyudhavallabhāyai || 13 ||
namo’stu devyai bhṛgunaṃdanāyai
namo’stu viṣṇorurasisthitāyai |
namo’stu lakṣmyai kamalālayāyai
namo’stu dāmodaravallabhāyai || 14 ||
namo’stu kāṃtyai kamalekṣaṇāyai
namo’stu bhūtyai bhuvanaprasūtyai |
namo’stu devādibhirarcitāyai
namo’stu naṃdātmajavallabhāyai || 15 ||
saṃpatkarāṇi sakaleṃdriyanaṃdanāni
sāmrājyadānavibhavāni saroruhākṣi |
tvadvaṃdanāni duritoddharaṇodyatāni
māmeva mātaraniśaṃ kalayaṃtu mānye || 16 ||
yatkaṭākṣasamupāsanāvidhiḥ
sevakasya sakalārthasaṃpadaḥ |
saṃtanoti vacanāṃgamānasaiḥ
tvāṃ murārihṛdayeśvarīṃ bhaje || 17 ||
sarasijanilaye sarojahaste [sarasijanayane]
dhavaḻatamāṃśukagaṃdhamālyaśobhe |
bhagavati harivallabhe manojñe
tribhuvanabhūtikari prasīda mahyam || 18 ||
digghastibhiḥ kanakakuṃbhamukhāvasṛṣṭa
svarvāhinīvimalacārujalaplutāṃgīm |
prātarnamāmi jagatāṃ jananīmaśeṣa
lokādhinātha-gṛhiṇīṃ-amṛtābdhiputrīm || 19 ||
kamale kamalākṣavallabhe tvaṃ
karuṇāpūrataraṃgitairapāṃgaiḥ |
avalokaya māmakiṃcanānāṃ
prathamaṃ pātramakṛtrimaṃ dayāyāḥ || 20 ||
stuvaṃti ye stutibhiramūbhiranvahaṃ
trayīmayīṃ tribhuvanamātaraṃ ramām |
guṇādhikā gurutara-bhāgya-bhāgino [bhāginaḥ]
bhavaṃti te bhuvi budhabhāvitāśayāḥ || 21 ||
suvarṇadhārāstotraṃ yacchaṃkarācārya nirmitam |
trisaṃdhyaṃ yaḥ paṭhennityaṃ sa kuberasamo bhavet ||
iti śrīmatparamahaṃsaparivrājakācāryasya śrīgoviṃdabhagavatpūjyapādaśiṣyasya śrīmacchaṃkarabhagavataḥ kṛtau kanakadhārāstotraṃ saṃpūrṇam |
