bhaja goviṃdaṃ (moha mudgaraṃ)
bhaja goviṃdaṃ bhaja goviṃdaṃ
goviṃdaṃ bhaja mūḍhamate |
saṃprāpte sannihite kāle
nahi nahi rakṣati ḍukṛṃkaraṇe || 1 ||
bhaja goviṃdaṃ bhaja goviṃdaṃ …
mūḍha jahīhi dhanāgamatṛṣṇāṃ
kuru sadbuddhiṃ manasi vitṛṣṇām |
yallabhase nijakarmopāttaṃ
vittaṃ tena vinodaya cittam || 2 ||
bhaja goviṃdaṃ bhaja goviṃdaṃ …
nārīstanabhara-nābhīdeśaṃ
dṛṣṭvā mā gā mohāveśam |
etanmāṃsavasādivikāraṃ
manasi viciṃtaya vāraṃ vāram || 3 ||
bhaja goviṃdaṃ bhaja goviṃdaṃ …
nalinīdala-gatajalamatitaralaṃ
tadvajjīvitamatiśaya-capalam |
viddhi vyādhyabhimānagrastaṃ
lokaṃ śokahataṃ ca samastam || 4 ||
bhaja goviṃdaṃ bhaja goviṃdaṃ …
yāvadvittopārjanasaktaḥ
tāvannijaparivāro raktaḥ |
paścājjīvati jarjaradehe
vārtāṃ ko’pi na pṛcchati gehe || 5 ||
bhaja goviṃdaṃ bhaja goviṃdaṃ …
yāvatpavano nivasati dehe
tāvatpṛcchati kuśalaṃ gehe |
gatavati vāyau dehāpāye
bhāryā bibhyati tasminkāye || 6 ||
bhaja goviṃdaṃ bhaja goviṃdaṃ …
bālastāvatkrīḍāsaktaḥ
taruṇastāvattaruṇīsaktaḥ |
vṛddhastāvacciṃtāsaktaḥ
parame brahmaṇi ko’pi na saktaḥ || 7 ||
bhaja goviṃdaṃ bhaja goviṃdaṃ …
kā te kāṃtā kaste putraḥ
saṃsāro’yamatīva vicitraḥ |
kasya tvaṃ kaḥ kuta āyātaḥ
tattvaṃ ciṃtaya tadiha bhrātaḥ || 8 ||
bhaja goviṃdaṃ bhaja goviṃdaṃ …
satsaṃgatve nissaṃgatvaṃ
nissaṃgatve nirmohatvam |
nirmohatve niścalatattvaṃ
niścalatattve jīvanmuktiḥ || 9 ||
bhaja goviṃdaṃ bhaja goviṃdaṃ …
vayasi gate kaḥ kāmavikāraḥ
śuṣke nīre kaḥ kāsāraḥ |
kṣīṇe vitte kaḥ parivāraḥ
jñāte tattve kaḥ saṃsāraḥ || 10 ||
bhaja goviṃdaṃ bhaja goviṃdaṃ …
mā kuru dhana-jana-yauvana-garvaṃ
harati nimeṣātkālaḥ sarvam |
māyāmayamidamakhilaṃ hitvā
brahmapadaṃ tvaṃ praviśa viditvā || 11 ||
bhaja goviṃdaṃ bhaja goviṃdaṃ …
dinayāminyau sāyaṃ prātaḥ
śiśiravasaṃtau punarāyātaḥ |
kālaḥ krīḍati gacchatyāyuḥ
tadapi na muṃcatyāśāvāyuḥ || 12 ||
bhaja goviṃdaṃ bhaja goviṃdaṃ …
kā te kāṃtā dhanagataciṃtā
vātula kiṃ tava nāsti niyaṃtā |
trijagati sajjanasaṃgatirekā
bhavati bhavārṇavataraṇe naukā || 13 ||
bhaja goviṃdaṃ bhaja goviṃdaṃ …
dvādaśa-maṃjarikābhiraśeṣaḥ
kathito vaiyākaraṇasyaiṣaḥ |
upadeśo’bhūdvidyā-nipuṇaiḥ
śrīmacchaṃkara-bhagavaccharaṇaiḥ || 14 ||
bhaja goviṃdaṃ bhaja goviṃdaṃ …
jaṭilo muṃḍī luṃchitakeśaḥ
kāṣāyāṃbara-bahukṛtaveṣaḥ |
paśyannapi ca na paśyati mūḍhaḥ
udaranimittaṃ bahukṛtaveṣaḥ || 15 ||
bhaja goviṃdaṃ bhaja goviṃdaṃ …
aṃgaṃ galitaṃ palitaṃ muṃḍaṃ
daśanavihīnaṃ jātaṃ tuṃḍam |
vṛddho yāti gṛhītvā daṃḍaṃ
tadapi na muṃcatyāśāpiṃḍam || 16 ||
bhaja goviṃdaṃ bhaja goviṃdaṃ …
agre vahniḥ pṛṣṭhe bhānuḥ
rātrau cubuka-samarpita-jānuḥ |
karatala-bhikṣastarutalavāsaḥ
tadapi na muṃcatyāśāpāśaḥ || 17 ||
bhaja goviṃdaṃ bhaja goviṃdaṃ …
kurute gaṃgāsāgaragamanaṃ
vrata-paripālanamathavā dānam |
jñānavihīnaḥ sarvamatena
bhajati na muktiṃ janmaśatena || 18 ||
bhaja goviṃdaṃ bhaja goviṃdaṃ …
suramaṃdira-taru-mūla-nivāsaḥ
śayyā bhūtalamajinaṃ vāsaḥ |
sarva-parigraha-bhogatyāgaḥ
kasya sukhaṃ na karoti virāgaḥ || 19 ||
bhaja goviṃdaṃ bhaja goviṃdaṃ …
yogarato vā bhogarato vā
saṃgarato vā saṃgavihīnaḥ |
yasya brahmaṇi ramate cittaṃ
naṃdati naṃdati naṃdatyeva || 20 ||
bhaja goviṃdaṃ bhaja goviṃdaṃ …
bhagavadgītā kiṃcidadhītā
gaṃgājala-lavakaṇikā pītā |
sakṛdapi yena murārisamarcā
kriyate tasya yamena na carcā || 21 ||
bhaja goviṃdaṃ bhaja goviṃdaṃ …
punarapi jananaṃ punarapi maraṇaṃ
punarapi jananījaṭhare śayanam |
iha saṃsāre bahudustāre
kṛpayā’pāre pāhi murāre || 22 ||
bhaja goviṃdaṃ bhaja goviṃdaṃ …
rathyācarpaṭa-viracita-kaṃthaḥ
puṇyāpuṇya-vivarjita-paṃthaḥ |
yogī yoganiyojita-cittaḥ
ramate bālonmattavadeva || 23 ||
bhaja goviṃdaṃ bhaja goviṃdaṃ …
kastvaṃ ko’haṃ kuta āyātaḥ
kā me jananī ko me tātaḥ |
iti paribhāvaya sarvamasāraṃ
viśvaṃ tyaktvā svapnavicāram || 24 ||
bhaja goviṃdaṃ bhaja goviṃdaṃ …
tvayi mayi cānyatraiko viṣṇuḥ
vyarthaṃ kupyasi mayyasahiṣṇuḥ |
bhava samacittaḥ sarvatra tvaṃ
vāṃchasyacirādyadi viṣṇutvam || 25 ||
bhaja goviṃdaṃ bhaja goviṃdaṃ …
śatrau mitre putre baṃdhau
mā kuru yatnaṃ vigrahasaṃdhau |
sarvasminnapi paśyātmānaṃ
sarvatrotsṛja bhedājñānam || 26 ||
bhaja goviṃdaṃ bhaja goviṃdaṃ …
kāmaṃ krodhaṃ lobhaṃ mohaṃ
tyaktvā”tmānaṃ paśyati so’ham |
ātmajñānavihīnā mūḍhāḥ
te pacyaṃte narakanigūḍhāḥ || 27 ||
bhaja goviṃdaṃ bhaja goviṃdaṃ …
geyaṃ gītā-nāmasahasraṃ
dhyeyaṃ śrīpati-rūpamajasram |
neyaṃ sajjana-saṃge cittaṃ
deyaṃ dīnajanāya ca vittam || 28 ||
bhaja goviṃdaṃ bhaja goviṃdaṃ …
sukhataḥ kriyate kāmābhogaḥ
paścāddhaṃta śarīre rogaḥ |
yadyapi loke maraṇaṃ śaraṇaṃ
tadapi na muṃcati pāpācaraṇam || 29 ||
bhaja goviṃdaṃ bhaja goviṃdaṃ …
arthamanarthaṃ bhāvaya nityaṃ
nāstitataḥ sukhaleśaḥ satyam |
putrādapi dhanabhājāṃ bhītiḥ
sarvatraiṣā vihitā rītiḥ || 30 ||
bhaja goviṃdaṃ bhaja goviṃdaṃ …
prāṇāyāmaṃ pratyāhāraṃ
nityānitya vivekavicāram |
jāpyasametasamādhividhānaṃ
kurvavadhānaṃ mahadavadhānam || 31 ||
bhaja goviṃdaṃ bhaja goviṃdaṃ …
gurucaraṇāṃbuja-nirbharabhaktaḥ
saṃsārādacirādbhava muktaḥ |
seṃdriyamānasa-niyamādevaṃ
drakṣyasi nijahṛdayasthaṃ devam || 32 ||
bhaja goviṃdaṃ bhaja goviṃdaṃ …
mūḍhaḥ kaścana vaiyākaraṇo
ḍuḥkṛṃkaraṇādhyayanadhurīṇaḥ |
śrīmacchaṃkara-bhagavacchiṣyaiḥ
bodhita āsīcchodhita-karaṇaḥ || 33 ||
bhaja goviṃdaṃ bhaja goviṃdaṃ …
bhaja goviṃdaṃ bhaja goviṃdaṃ
goviṃdaṃ bhaja mūḍhamate |
nāmasmaraṇādanyamupāyaṃ
nahi paśyāmo bhavataraṇe || 34 ||
bhaja goviṃdaṃ bhaja goviṃdaṃ …
