gaṇeśa bhujaṃgaṃ
raṇatkṣudraghaṃṭāninādābhirāmaṃ
calattāṃḍavoddaṃḍavatpadmatālam |
lasattuṃdilāṃgoparivyālahāraṃ
gaṇādhīśamīśānasūnuṃ tamīḍe || 1 ||
dhvanidhvaṃsavīṇālayollāsivaktraṃ
sphuracchuṃḍadaṃḍollasadbījapūram |
galaddarpasaugaṃdhyalolālimālaṃ
gaṇādhīśamīśānasūnuṃ tamīḍe || 2 ||
prakāśajjapāraktaratnaprasūna-
pravālaprabhātāruṇajyotirekam |
pralaṃbodaraṃ vakratuṃḍaikadaṃtaṃ
gaṇādhīśamīśānasūnuṃ tamīḍe || 3 ||
vicitrasphuradratnamālākirīṭaṃ
kirīṭollasaccaṃdrarekhāvibhūṣam |
vibhūṣaikabhūṣaṃ bhavadhvaṃsahetuṃ
gaṇādhīśamīśānasūnuṃ tamīḍe || 4 ||
udaṃcadbhujāvallarīdṛśyamūlo-
ccaladbhrūlatāvibhramabhrājadakṣam |
marutsuṃdarīcāmaraiḥ sevyamānaṃ
gaṇādhīśamīśānasūnuṃ tamīḍe || 5 ||
sphuranniṣṭhurālolapiṃgākṣitāraṃ
kṛpākomalodāralīlāvatāram |
kalābiṃdugaṃ gīyate yogivaryai-
rgaṇādhīśamīśānasūnuṃ tamīḍe || 6 ||
yamekākṣaraṃ nirmalaṃ nirvikalpaṃ
guṇātītamānaṃdamākāraśūnyam |
paraṃ pāramoṃkāramāmnāyagarbhaṃ
vadaṃti pragalbhaṃ purāṇaṃ tamīḍe || 7 ||
cidānaṃdasāṃdrāya śāṃtāya tubhyaṃ
namo viśvakartre ca hartre ca tubhyam |
namo’naṃtalīlāya kaivalyabhāse
namo viśvabīja prasīdeśasūno || 8 ||
imaṃ sustavaṃ prātarutthāya bhaktyā
paṭhedyastu martyo labhetsarvakāmān |
gaṇeśaprasādena siddhyaṃti vāco
gaṇeśe vibhau durlabhaṃ kiṃ prasanne || 9 ||
