kalyāṇavṛṣṭi stavaḥ
kalyāṇavṛṣṭibhirivāmṛtapūritābhi-
-rlakṣmīsvayaṃvaraṇamaṃgaladīpikābhiḥ |
sevābhiraṃba tava pādasarojamūle
nākāri kiṃ manasi bhāgyavatāṃ janānām || 1 ||
etāvadeva janani spṛhaṇīyamāste
tvadvaṃdaneṣu salilasthagite ca netre |
sāṃnidhyamudyadaruṇāyutasodarasya
tvadvigrahasya parayā sudhayāplutasya || 2 ||
īśatvanāmakaluṣāḥ kati vā na saṃti
brahmādayaḥ pratibhavaṃ pralayābhibhūtāḥ |
ekaḥ sa eva janani sthirasiddhirāste
yaḥ pādayostava sakṛtpraṇatiṃ karoti || 3 ||
labdhvā sakṛttripurasuṃdari tāvakīnaṃ
kāruṇyakaṃdalitakāṃtibharaṃ kaṭākṣam |
kaṃdarpakoṭisubhagāstvayi bhaktibhājaḥ
saṃmohayaṃti taruṇīrbhuvanatraye’pi || 4 ||
hrīṃkārameva tava nāma gṛṇaṃti vedā
mātastrikoṇanilaye tripure trinetre |
tvatsaṃsmṛtau yamabhaṭābhibhavaṃ vihāya
dīvyaṃti naṃdanavane saha lokapālaiḥ || 5 ||
haṃtuḥ purāmadhigalaṃ paripīyamānaḥ
krūraḥ kathaṃ na bhavitā garalasya vegaḥ |
nāśvāsanāya yadi mātaridaṃ tavārthaṃ
dehasya śaśvadamṛtāplutaśītalasya || 6 ||
sarvajñatāṃ sadasi vākpaṭutāṃ prasūte
devi tvadaṃghrisarasīruhayoḥ praṇāmaḥ |
kiṃ ca sphuranmakuṭamujjvalamātapatraṃ
dve cāmare ca mahatīṃ vasudhāṃ dadāti || 7 ||
kalpadrumairabhimatapratipādaneṣu
kāruṇyavāridhibhiraṃba bhavātkaṭākṣaiḥ |
ālokaya tripurasuṃdari māmanāthaṃ
tvayyeva bhaktibharitaṃ tvayi baddhatṛṣṇam || 8 ||
haṃtetareṣvapi manāṃsi nidhāya cānye
bhaktiṃ vahaṃti kila pāmaradaivateṣu |
tvāmeva devi manasā samanusmarāmi
tvāmeva naumi śaraṇaṃ janani tvameva || 9 ||
lakṣyeṣu satsvapi kaṭākṣanirīkṣaṇānā-
-mālokaya tripurasuṃdari māṃ kadācit |
nūnaṃ mayā tu sadṛśaḥ karuṇaikapātraṃ
jāto janiṣyati jano na ca jāyate vā || 10 ||
hrīṃ hrīmiti pratidinaṃ japatāṃ tavākhyāṃ
kiṃ nāma durlabhamiha tripurādhivāse |
mālākirīṭamadavāraṇamānanīyā
tānsevate vasumatī svayameva lakṣmīḥ || 11 ||
saṃpatkarāṇi sakaleṃdriyanaṃdanāni
sāmrājyadānaniratāni saroruhākṣi |
tvadvaṃdanāni duritāharaṇodyatāni
māmeva mātaraniśaṃ kalayaṃtu nānyam || 12 ||
kalpopasaṃhṛtiṣu kalpitatāṃḍavasya
devasya khaṃḍaparaśoḥ parabhairavasya |
pāśāṃkuśaikṣavaśarāsanapuṣpabāṇā
sā sākṣiṇī vijayate tava mūrtirekā || 13 ||
lagnaṃ sadā bhavatu mātaridaṃ tavārdhaṃ
tejaḥ paraṃ bahulakuṃkumapaṃkaśoṇam |
bhāsvatkirīṭamamṛtāṃśukalāvataṃsaṃ
madhye trikoṇanilayaṃ paramāmṛtārdram || 14 ||
hrīṃkārameva tava nāma tadeva rūpaṃ
tvannāma durlabhamiha tripure gṛṇaṃti |
tvattejasā pariṇataṃ viyadādibhūtaṃ
saukhyaṃ tanoti sarasīruhasaṃbhavādeḥ || 15 ||
hrīṃkāratrayasaṃpuṭena mahatā maṃtreṇa saṃdīpitaṃ
stotraṃ yaḥ prativāsaraṃ tava puro mātarjapenmaṃtravit |
tasya kṣoṇibhujo bhavaṃti vaśagā lakṣmīścirasthāyinī
vāṇī nirmalasūktibhārabhāritā jāgarti dīrghaṃ vayaḥ || 16 ||
iti śrīmatparamahaṃsaparivrājakācāryasya śrīgoviṃdabhagavatpūjyapādaśiṣyasya śrīmacchaṃkarabhagavataḥ kṛtau kalyāṇavṛṣṭi stavaḥ |
