śrī annapūrṇā stotraṃ
nityānaṃdakarī varābhayakarī sauṃdarya ratnākarī
nirdhūtākhila ghora pāvanakarī pratyakṣa māheśvarī |
prāleyācala vaṃśa pāvanakarī kāśīpurādhīśvarī
bhikṣāṃ dehi kṛpāvalaṃbanakarī mātānnapūrṇeśvarī || 1 ||
nānā ratna vicitra bhūṣaṇakarī hemāṃbarāḍaṃbarī
muktāhāra vilaṃbamāna vilasat-vakṣoja kuṃbhāṃtarī |
kāśmīrāgaru vāsitā rucikarī kāśīpurādhīśvarī
bhikṣāṃ dehi kṛpāvalaṃbanakarī mātānnapūrṇeśvarī || 2 ||
yogānaṃdakarī ripukṣayakarī dharmaikya niṣṭhākarī
caṃdrārkānala bhāsamāna laharī trailokya rakṣākarī |
sarvaiśvaryakarī tapaḥ phalakarī kāśīpurādhīśvarī
bhikṣāṃ dehi kṛpāvalaṃbanakarī mātānnapūrṇeśvarī || 3 ||
kailāsācala kaṃdarālayakarī gaurī-hyumāśāṃkarī
kaumārī nigamārtha-gocarakarī-hyoṃkāra-bījākṣarī |
mokṣadvāra-kavāṭapāṭanakarī kāśīpurādhīśvarī
bhikṣāṃ dehi kṛpāvalaṃbanakarī mātānnapūrṇeśvarī || 4 ||
dṛśyādṛśya-vibhūti-vāhanakarī brahmāṃḍa-bhāṃḍodarī
līlā-nāṭaka-sūtra-khelanakarī vijñāna-dīpāṃkurī |
śrīviśveśamanaḥ-prasādanakarī kāśīpurādhīśvarī
bhikṣāṃ dehi kṛpāvalaṃbanakarī mātānnapūrṇeśvarī || 5 ||
urvīsarvajayeśvarī bhagavatī [jayakarī] mātā kṛpāsāgarī
veṇī-nīlasamāna-kuṃtaladharī nityānna-dāneśvarī |
sākṣānmokṣakarī sadā śubhakarī kāśīpurādhīśvarī
bhikṣāṃ dehi kṛpāvalaṃbanakarī mātānnapūrṇeśvarī || 6 ||
ādikṣāṃta-samastavarṇanakarī śaṃbhostribhāvākarī
kāśmīrā tripureśvarī trinayanī viśveśvarī śarvarī |
svargadvāra-kapāṭa-pāṭanakarī kāśīpurādhīśvarī
bhikṣāṃ dehi kṛpāvalaṃbanakarī mātānnapūrṇeśvarī || 7 ||
devī sarvavicitra-ratnarucitā dākṣāyiṇī suṃdarī
vāmā-svādupayodharā priyakarī saubhāgyamāheśvarī |
bhaktābhīṣṭakarī sadā śubhakarī kāśīpurādhīśvarī
bhikṣāṃ dehi kṛpāvalaṃbanakarī mātānnapūrṇeśvarī || 8 ||
caṃdrārkānala-koṭikoṭi-sadṛśī caṃdrāṃśu-biṃbādharī
caṃdrārkāgni-samāna-kuṃḍala-dharī caṃdrārka-varṇeśvarī
mālā-pustaka-pāśasāṃkuśadharī kāśīpurādhīśvarī
bhikṣāṃ dehi kṛpāvalaṃbanakarī mātānnapūrṇeśvarī || 9 ||
kṣatratrāṇakarī mahābhayakarī mātā kṛpāsāgarī
sarvānaṃdakarī sadā śivakarī viśveśvarī śrīdharī |
dakṣākraṃdakarī nirāmayakarī kāśīpurādhīśvarī
bhikṣāṃ dehi kṛpāvalaṃbanakarī mātānnapūrṇeśvarī || 10 ||
annapūrṇe sadāpūrṇe śaṃkara-prāṇavallabhe |
jñāna-vairāgya-siddhyarthaṃ bhikṣāṃ dehi ca pārvati || 11 ||
mātā ca pārvatīdevī pitādevo maheśvaraḥ |
bāṃdhavāḥ śivabhaktāśca svadeśo bhuvanatrayaṃ || 12 ||
sarva-maṃgaḻa-māṃgaḻye śive sarvārtha-sādhike |
śaraṇye tryaṃbake gauri nārāyaṇi namo’stu te || 13 ||
iti śrīmatparamahaṃsaparivrājakācāryasya śrīgoviṃdabhagavatpūjyapādaśiṣyasya śrīmacchaṃkarabhagavataḥ kṛtau annapūrṇā stotram |
