śiva mānasa pūja
ratnaiḥ kalpitamāsanaṃ himajalaiḥ snānaṃ ca divyāṃbaraṃ
nānāratna vibhūṣitaṃ mṛgamadāmodāṃkitaṃ caṃdanam |
jātī caṃpaka bilvapatra racitaṃ puṣpaṃ ca dhūpaṃ tathā
dīpaṃ deva dayānidhe paśupate hṛtkalpitaṃ gṛhyatām || 1 ||
sauvarṇe navaratnakhaṃḍa racite pātre ghṛtaṃ pāyasaṃ
bhakṣyaṃ paṃcavidhaṃ payodadhiyutaṃ raṃbhāphalaṃ pānakam |
śākānāmayutaṃ jalaṃ rucikaraṃ karpūra khaṃḍojjvalaṃ
tāṃbūlaṃ manasā mayā viracitaṃ bhaktyā prabho svīkuru || 2 ||
chatraṃ cāmarayoryugaṃ vyajanakaṃ cādarśakaṃ nirmalaṃ
vīṇā bheri mṛdaṃga kāhalakalā gītaṃ ca nṛtyaṃ tathā |
sāṣṭāṃgaṃ praṇatiḥ stuti-rbahuvidhā-hyetat-samastaṃ mayā
saṃkalpena samarpitaṃ tava vibho pūjāṃ gṛhāṇa prabho || 3 ||
ātmā tvaṃ girijā matiḥ sahacarāḥ prāṇāḥ śarīraṃ gṛhaṃ
pūjā te viṣayopabhoga-racanā nidrā samādhisthitiḥ |
saṃcāraḥ padayoḥ pradakṣiṇavidhiḥ stotrāṇi sarvā giro
yadyatkarma karomi tattadakhilaṃ śaṃbho tavārādhanam || 4 ||
kara caraṇa kṛtaṃ vākkāyajaṃ karmajaṃ vā
śravaṇa nayanajaṃ vā mānasaṃ vāparādham |
vihitamavihitaṃ vā sarvametat-kṣamasva
jaya jaya karuṇābdhe śrī mahādeva śaṃbho || 5 ||
