śrī rāma paṃca ratna stotraṃ
kaṃjātapatrāyata locanāya karṇāvataṃsojjvala kuṃḍalāya
kāruṇyapātrāya suvaṃśajāya namo’stu rāmāya salakṣmaṇāya || 1 ||
vidyunnibhāṃbhoda suvigrahāya vidyādharaissaṃstuta sadguṇāya
vīrāvatārāya virodhihartre [virādhahaṃtre] namo’stu rāmāya salakṣmaṇāya || 2 ||
saṃsakta divyāyudha kārmukāya samudra garvāpaharāyudhāya
sugrīvamitrāya surārihaṃtre namo’stu rāmāya salakṣmaṇāya || 3 ||
pītāṃbarālaṃkṛta madhyakāya pitāmaheṃdrāmara vaṃditāya
pitre svabhaktasya janasya mātre namo’stu rāmāya salakṣmaṇāya || 4 ||
namo namaste’khila pūjitāya namo namasteṃdunibhānanāya [namo namaścaṃdranibhānanāya]
namo namaste raghuvaṃśajāya namo’stu rāmāya salakṣmaṇāya || 5 ||
imāni paṃcaratnāni trisaṃdhyaṃ yaḥ paṭhennaraḥ
sarvapāpa vinirmuktaḥ sa yāti paramāṃ gatim ||
iti śrīśaṃkarācārya viracita śrīrāmapaṃcaratnaṃ saṃpūrṇaṃ
