maheṃdra kṛta mahālakṣmī stotraṃ
maheṃdra uvāca
namaḥ kamalavāsinyai nārāyaṇyai namo namaḥ |
kṛṣṇapriyāyai sārāyai padmāyai ca namo namaḥ || 1 ||
padmapatrekṣaṇāyai ca padmāsyāyai namo namaḥ |
padmāsanāyai padminyai vaiṣṇavyai ca namo namaḥ || 2 ||
sarvasaṃpatsvarūpāyai sarvadātryai namo namaḥ |
sukhadāyai mokṣadāyai siddhidāyai namo namaḥ || 3 ||
haribhaktipradātryai ca harṣadātryai namo namaḥ |
kṛṣṇavakṣaḥsthitāyai ca kṛṣṇeśāyai namo namaḥ || 4 ||
kṛṣṇaśobhāsvarūpāyai ratnāḍhyāyai namo namaḥ |
saṃpatyadhiṣṭhātṛdevyai mahādevyai namo namaḥ || 5 ||
sasyādhiṣṭhātṛdevyai ca sasyalakṣmyai namo namaḥ |
namo buddhisvarūpāyai buddhidāyai namo namaḥ || 6 ||
vaikuṃṭhe ca mahālakṣmīrlakṣmīḥ kṣīrodasāgare |
svargalakṣmīriṃdragehe rājalakṣmīrnṛpālaye || 7 ||
gṛhalakṣmīśca gṛhiṇāṃ gehe ca gṛhadevatā |
surabhiḥ sā gavāṃ mātā dakṣiṇā yajñakāminī || 8 ||
aditirdevamātā tvaṃ kamalā kamalālaye |
svāhā tvaṃ ca havirdāne kavyadāne svadhā smṛtā || 9 ||
tvaṃ hi viṣṇusvarūpā ca sarvādhārā vasuṃdharā |
śuddhasattvasvarūpā tvaṃ nārāyaṇaparāyāṇā || 10 ||
krodhahiṃsāvarjitā ca varadā ca śubhānanā |
paramārthapradā tvaṃ ca haridāsyapradā parā || 11 ||
yayā vinā jagatsarvaṃ bhasmībhūtamasārakam |
jīvanmṛtaṃ ca viśvaṃ ca śavatulyaṃ yayā vinā || 12 ||
sarveṣāṃ ca parā tvaṃ hi sarvabāṃdhavarūpiṇī |
yayā vinā na saṃbhāṣyo bāṃdhavairbāṃdhavaḥ sadā || 13 ||
tvayā hīno baṃdhuhīnastvayā yuktaḥ sabāṃdhavaḥ |
dharmārthakāmamokṣāṇāṃ tvaṃ ca kāraṇarūpiṇī || 14 ||
stanaṃdhayānāṃ tvaṃ mātā śiśūnāṃ śaiśave yathā |
tathā tvaṃ sarvadā mātā sarveṣāṃ sarvaviśvataḥ || 15 ||
tyaktastano mātṛhīnaḥ sa cejjīvati daivataḥ |
tvayā hīno janaḥ ko’pi na jīvatyeva niścitam || 16 ||
suprasannasvarūpā tvaṃ me prasannā bhavāṃbike |
vairigrastaṃ ca viṣayaṃ dehi mahyaṃ sanātani || 17 ||
vayaṃ yāvattvayā hīnā baṃdhuhīnāśca bhikṣukāḥ |
sarvasaṃpadvihīnāśca tāvadeva haripriye || 18 ||
rājyaṃ dehi śriyaṃ dehi balaṃ dehi sureśvari |
kīrtiṃ dehi dhanaṃ dehi putrānmahyaṃ ca dehi vai || 19 ||
kāmaṃ dehi matiṃ dehi bhogān dehi haripriye |
jñānaṃ dehi ca dharmaṃ ca sarvasaubhāgyamīpsitam || 20 ||
sarvādhikāramevaṃ vai prabhāvāṃ ca pratāpakam |
jayaṃ parākramaṃ yuddhe paramaiśvaryamaiva ca || 21 ||
ityuktvā tu maheṃdraśca sarvaiḥ suragaṇaiḥ saha |
nanāma sāśrunetro’yaṃ mūrdhnā caiva punaḥ punaḥ || 22 ||
brahmā ca śaṃkaraścaiva śeṣo dharmaśca keśavaḥ |
sarve cakruḥ parīhāraṃ surārthe ca punaḥ punaḥ || 23 ||
devebhyaśca varaṃ dattvā puṣpamālāṃ manoharām |
keśavāya dadau lakṣmīḥ saṃtuṣṭā surasaṃsadi || 24 ||
yayurdaivāśca saṃtuṣṭāḥ svaṃ svaṃ sthānaṃ ca nārada |
devī yayau hareḥ kroḍaṃ hṛṣṭā kṣīrodaśāyinaḥ || 25 ||
yayatustau svasvagṛhaṃ brahmeśānau ca nārada |
dattvā śubhāśiṣaṃ tau ca devebhyaḥ prītipūrvakam || 26 ||
idaṃ stotraṃ mahāpuṇyaṃ trisaṃdhyaṃ yaḥ paṭhennaraḥ |
kuberatulyaḥ sa bhavedrājarājeśvaro mahān || 27 ||
siddhastotraṃ yadi paṭhet so’pi kalpatarurnaraḥ |
paṃcalakṣajapenaiva stotrasiddhirbhavennṛṇām || 28 ||
siddhastotraṃ yadi paṭhenmāsamekaṃ ca saṃyataḥ |
mahāsukhī ca rājeṃdro bhaviṣyati na saṃśayaḥ || 29 ||
iti śrībrahmavaivarte mahāpurāṇe dvitīye prakṛtikhaṃḍe nāradanārāyaṇasaṃvāde ekonacatvāriṃśattamo’dhyāye maheṃdra kṛta śrī mahālakṣmī stotram |
